2019/11/22

《對自己有要求的浪漫》

105-BartendersHands
 
網上資料圖片
 
今日要講一杯雞尾酒嘅故事,你可能會話有乜咁特別?酒,我相信大家都飲唔少,咩八二年拉菲咩八五年可樂就唔好計喇,我飲嘅只係一杯雞尾酒,基酒絕對唔會係咩貴嘢 ,成杯價錢亦只係百零蚊,但點解佢係一杯特別嘅酒,就因為一個調酒師。
 
雞尾酒需要人調,喺工聯會一個課程都係千零蚊,專業少少都係幾千蚊,要入行話易唔易,話難唔難,簡單一杯馬天尼有邊個唔知個分量係點,做法係點?上網隨便搵都搵到啦。
 
所以你話一個調酒師同一部機器有咩分別?可能就係你坐係吧前面,佢喺你面前搖出一杯酒嘅過程。
 
調酒,可以幾好睇,咩水割威士忌,咩十大令調酒師想打人嘅酒,佢做得愈多,你可能就愈開心,但我只係叫咗杯簡單嘅Margarita,過程好認真,好集中,調完之後佢上比我之前,輕輕聞咗一聞,然後露出一個滿意嘅神情再俾我,令呢一杯雞尾酒變得特別。
 
有幾多人係可以做到敬業樂業呢?我相信連我都唔得,一個調酒師可以喺每日調數以百計嘅酒時,仲可以對每一杯自己搖出嘅酒,抱住一份滿足感,令我覺得佢真心係喜歡呢份工,喜歡調酒。
 
好多人想將自己夢想變成職業,但當變成之後夢想變得現實,然後就無以前咁喜歡呢件事,因為佢已經唔係興趣,更多係金錢,更多係生活,呢份初心好少人可以保持到。
 
我同佢傾起酒,佢話,當你做得多時,你會悶,而我令件事唔悶嘅方法係,將件事再變得更好,即使係有幾咁微小都好,我聽到覺得呢位仁兄係真男人。
 
要洞察到差唔多嘅事分別係點已經難,再搵方法去改善呢種微不足道嘅分別,更難。
 
難怪佢可以喺一間消費水平都唔低,而格局都高級嘅酒吧調酒,一杯雞尾酒你喺太子飲可能係happy hour 50蚊杯,而呢度happy hour係100蚊杯,相差一倍價錢,我平時好計算,呢樣嘢貴一倍,係唔係好一倍先?當然,通常好少少都已經貴一倍,但今次我覺得成杯酒真係好飲一倍,飲佢一杯頂得住兩杯。
 
對自己有要求,對工作有要求,係一種男人嘅浪漫,或者有人會覺得係奴性,但亦有人形容呢種係匠心,香港一向求快求效率求方便,愈來愈少人有呢種匠心精神。
 
一杯雞尾酒,飲落去唔一定特別,但佢嘅來歷同過程,令佢變得不簡單。
 
蔣薇
www.fb.com/maydreaming
IG:maydreaming1123

COMMENT