2020/01/20

《小強的生存之道》

2020_01_17_ May MenClub
 
網上資料圖片
 
正所謂人無恥則無敵,作為一隻小強,生命力非常頑強,一直都俾人覺得神憎鬼厭但突然升上神台之上,其實都係一個勵志故事。
 
但人紅就實有是非,人衰就實有天收,突然有前度出嚟聲討佢惡行,兩個人一齊都係種緣份,但估唔到遇到個咁賤格就係孽緣喇。
 
女方話成日唔見嘢,講真,屋就得兩個人,唔通有鬼咩,唔係你就係我啦,兩個人一齊,有起事上嚟無理由唔幫,但點解要做到偷呢,點解偷仲要唔認呢?問就發脾氣,想分手換鎖仲要搞大件事郁手,如果真係發生呢件事就真係拍得住周永恆。
 
戴返個頭盔先,呢個係片面之辭,我哋唔一定要信,但男方又唔回應喎,有咩事同我律師講咁款,同林鄭有乜分別呢?唔係要開誠佈公,成立獨立調查委員會都係想要個公道,還個清白,無做過,大家拎出嚟講,實有個說法。
 
不過呢種家事,我個人覺得都係自己解決就得,講真兩個人感情,有乜嘢好拎出嚟講,自己拆就算啦,但小強佢前排又拎老婆之前俾“巨星”撩嘅事出嚟講,喂,私人生活拎出嚟做新聞,真係睇到都唔知自己睇咗乜。
 
如果我老婆俾人撩,一個電話打過去你咪再搵我老婆就得啦,狼少少嘅分分鐘去打鑊佢添,但無,小強佢決定將呢件事同傳媒講,我唔知自己老婆俾巨星撩算唔算一種馨香嘅事,又或者佢想以社會公論去討回公道。
 
人哋拎自己事就唔回應,自己就拎人哋事出嚟講,係,無指名道姓,大家估估吓,係男人就開名,仲要打格仔算係點呢?大家想幫你都幫唔到,我真係唔多明呢種做法個意義何在。
 
小強之道,在於打不死,你想打佢,佢就走,你唔理佢,佢就突然出嚟露個面。
 
每個人都有佢生存之道,實有fans肯同佢埋單,每個人都有選擇權。
 
但我想講,無論咩立場都好,都總會有好人壞人,唔係打個旗號出嚟呢個就係聖人,叫聲兄弟就真係兄弟咩。
 
任何人都可能曾經年少無知,一時做錯咗事,但人可以改,可以為自己曾經犯錯而承擔,如果逃避的話,就好似政府唔回應市民一樣,利疊利,終有一日要付出更高代價。
 
蔣薇
www.fb.com/maydreaming
IG:maydreaming1123

COMMENT