2020/01/31

《兒時偶像的離去》

kobe-bryant-killer-instinct-vault-lakers-lead_0
 
網上資料圖片
 
人來人往,生命總有盡頭,係人生必修嘅課題,呢個新年,除咗毫無新年氣氛外,仲有一個令人傷心嘅消息,高比拜仁永遠離開我哋了……
 
朝早仲未醒晒時,老婆睇新聞讀出一句:高比拜仁空難享年四十一歲……
 
我完全唔敢相信呢句新聞,當望到整段新聞時真係呆咗喺度成分鐘……
 
作為一個已經開始打養生籃球嘅中年人,高比陪伴住我哋成長,當年米高佐敦全盛時期嘅時候,我哋仲未好有感受,只知道佢有幾強,佢就只係一個高高在上嘅籃球之神,但高比係我哋開始每日朝早七點就打波嘅學生時代同我哋一齊成長,望住佢就好似一個朋友,就算唔打籃球嘅都會知道佢有幾強。
 
湖人最風光時,可以話係我哋青春歲月,而高比佢係場上面就好似一個皇者一樣,面對咩對手都會硬砌,絕不退縮,佢唔單止強,令人仰望佢仲有心態,一種永不服輸嘅心態。
 
隨學生時代結束,我哋步入社會,打波愈來愈少,波友愈來愈難搵,喺街場已經係一個好似格格不入嘅阿叔,當全世界都講居里講占士時,我哋仲停留係高比嘅年代。
 
仲會睇波嘅我哋已經唔會再有偶像,因為比我哋仲細嘅年輕天才,我哋下意識選擇無視,會一句講如果全盛時期高比同佢哋打一定贏,呢句說話就好似我哋講c朗定美斯勁時有班老嘢會講比利同老馬一樣,佢哋定格咗係當年,而我哋已經變成呢班老嘢,停係當年了,亦老了。
 
八十後嘅我哋,開始面對失去同離去,偶像離去,四十一,算唔算英年早逝?有好多人連四字都未到就離開,我哋亦只可以接受。
 
當我哋去到六十歲時,偶像們都七字頭八字頭,要走嘅走晒,未走嘅你都聽唔到咩消息,因為無消息已經係最好消息。
 
去到呢個年紀,我哋嘅回憶,我哋嘅青春,都會一一消失,餘下一個已經唔可以虛心接受新事物嘅老嘢。
 
高比離開了,我哋傷心,然後如常生活,好似無任何唔同咁,但其實,我哋不知不覺地失去太多太多。
 
蔣薇
www.fb.com/maydreaming
IG:maydreaming1123

COMMENT