2020/02/18

《玫瑰酒精液》

mask 214 pack
 
網上資料圖片
 
情人節,對於情侶嚟講係一年之中最重要嘅節日,每年網上都會有直擊辦公室收花大賽,但今年Work From Home嘅大公司太多,呢個比賽亦石沉大海。
 
過去呢一年香港經歷太多,過咗最驚心嘅中秋節、最無氣氛嘅聖誕、唔敢拜年嘅新年,直到情人節,星期五晚街上都極少人,高級餐廳直行直入就得……
 
有機構調查,三成人希望情人節收到口罩同酒精搓手液做禮物,真係一種好大嘅諷刺,而有朋友睇到新聞之後笑笑口講,以前情人節,玫瑰、酒、精液係一種combo,估唔到依家加埋先係最夠愛意。
 
仲記得上幾年未結婚,慶祝情人節要成個月前book枱,然後同大陸自遊行一齊爭酒店,三星四星酒店已經差唔多一千蚊一晚,時鐘嘅話,你眼望我望好似輪街症咁,遲過八點你可能搵定殘廁都得。
 
結婚之後,情人節變得只有象徵式,送份禮物,喺屋企食餐好嘅,然後一齊睇吓戲就瞓覺,已經唔會好似年輕情侶咁要搞場大龍鳳。
 
今年仲誇張,我問老婆去食乜好,佢話早一兩日提早慶祝就算,唔好去人多地方,盡快返屋企安全少少。
 
返到屋企,我哋要用消毒水全身消毒,然後即刻沖涼,玫瑰、酒、精液完全變成口罩、酒精搓手液了。
 
作為成年人,大家都會有晚上嘅床上運動,特別係大時大節,起碼都要做個節啦,但一切都好平靜,唔好講做節,錫都唔太好,口水交流都係高危嘛,你都唔想害咗自己另一半,點知之前會唔會遇到咩人係有病毒。
 
我同老婆講,今年無乜禮物無乜驚喜無乜特別,不過喺呢個時間,我覺得最重要係原來只係同身邊嘅人可以一齊安安全全健健康康咁過,一切都歸於平凡。
 
佢話無所謂,可以無花,可以無禮物,可以無食飯,情人節,最重要嘅係情人嘛。
 
我問佢,可唔可以錫啖佢,佢話最好唔好啦!
 
然後我拎咗個口罩出嚟,戴上之後話,平時要安全戴套,依家非常時期,我戴罩錫你啦。
 
呢一幕,應該可以記一世。
 
蔣薇
www.fb.com/maydreaming
IG:maydreaming1123

COMMENT