2020/05/26

《青春流過的淚水》

2020_05_26_May menclub
網上資料圖片
 
有人問過井上雄彥點解唔寫到湘北隊拎到冠軍,佢答因為青春都應該係留有遺憾嘅。
 
男兒當入樽之所以係神作,或者就係佢擁有一個不完美嘅結局,所以年紀愈大睇愈覺得感受甚多,對於好似足球小將啊,黑子的籃球啊,光速蒙面俠,網球王子呢種既誇張,又好似戰鬥漫畫咁愈打愈勁,打完全國又要打全世界,差在未大戰外星人嘅漫畫,真係覺得好攰。
 
或者年輕時,大家都會追求完美,追求幻想,追求熱血,仲會覺得人生係有無限可能,唔到最後都唔應該放棄,有機會贏,會贏,一定贏!
 
但現實世界,有邊個係不敗,最強嘅西班牙都有日會落敗,巴塞亦唔係永遠嘅王者,今日你係主角,聽日人哋就係主角,我哋學識勝負乃兵家常事,人生唔同遊戲,你要完美可以save and load,但人生無得重來,唔通你一輸就斬掉重練咩。
 
我曾經喺中學運動會,特登去搵一個無乜人玩又極易贏嘅項目去玩,最後贏咗,但心中嘅喜悅其實唔大,贏係咪咁重要,為贏而贏去迴避失敗,今日睇返轉頭,覺得同呃自己無分別。
 
反而我記我最深刻係當年一場班際比賽,明明實力覺得唔錯,而自己都係主力,最後比低一級嘅人屌打,打到最後,我已經發脾氣唔想再打落去,然後師弟走埋嚟同我講,贏輸都要盡全力打落去,最後我喺更衣室忍唔住喊咗出嚟。
 
人生唔同漫畫,人人都可以係主角,唔係你一個人努力,唔係你一個人在意,可以做嘅,就係盡全力去令自己唔好後悔,輸同贏背後太多因素,人哋可能比你努力更多,比你強更多。
 
呢次嘅淚水,當年嘅隊友都久唔久拎出嚟講吓,而我都會話,喺球場上面喊過,都真係不枉此生,因為我在意,我努力過先會喊。
 
而呢年係我form7嘅比賽,已經唔可以再嚟一次了,亦成為青春嘅遺憾。
 
今日,我已經唔會再喺球場上面流淚,因為我已經唔再在意太多,輸又好,贏又好,都係當友誼波,成年人嘅淚水,太罕有,因為唔青春嘅你同我,已經因為生活同工作被磨滅咗其他追求。
 
但最重要嘅一點係,我哋都知道今日做乜都好,青春都已經唔再存在,同你一齊打波嘅都唔再存在,偶爾係WhatsApp同酒局中講返從前時,只能回憶。
 
蔣薇
www.fb.com/maydreaming
IG:maydreaming1123

COMMENT