2020/06/05

《打機贏係咪咁重要?》

2020_06_05_may menclub
 
最近有個唔太熟嘅前輩突然問我有冇玩某隻遊戲,我話有,都玩咗好幾年,呢款遊戲係打技術,課金都只係求美觀,真正落場係要靠實力,而佢有錢,平時係玩課金以萬計嘅手遊,突然見佢玩呢款遊戲我有少少驚訝。
 
然後佢問我可唔可以帶佢玩,話晒識我都唔會拒絕,一睇佢數據係好好,勝率有六成以上,但睇佢真係全部都係搵人帶佢玩,唔係自己玩。
 
一打落去我就明,佢技術唔太好,連好基本嘅概念都唔太識,我帶佢打真係打得好吃力,如果我失誤就基本上唔可以靠佢贏。
 
我不禁反思到底佢玩遊戲係為乜,贏係贏,但唔係贏自己,而係靠隊友勁,輸又係害埋人哋扣分,每晚佢都叫我,我得閒就應酬佢兩場咁。
 
成年人打機,真係好易呃,因為反應慢咗,又無咁多時間去練去理解遊戲,課金遊戲可以令佢哋得到勝利,但只係一種金錢壓制,有錢過你嘅人太多,你鬥有錢?我曾經識過一個廣西富二代,佢話唔駛做,每日打機,每日課最少一萬,同佢傾多幾句佢話去廣西可以搵佢,仲話包食住玩,我心諗係咪好似暴龍哥咁,打死人只要唔太出名嘅都無事咁。
 
因為見到呢種無限金錢嘅人,我棄咗遊戲,轉咗玩技術為主嘅,但就算係技術流,你都可以俾錢請人帶你打,包贏先收錢,而呢個世界就係咁運作。
 
課金我都得,唔可以多,但總有一班無課金嘅人你可以玩到佢哋死,但我無,或者我仲保留住玩遊戲嘅初心,享受一種挑戰同未知,而唔係純粹想贏。
 
贏係快樂,但係過程入面你點樣面對逆境,面對挑戰,最後即使輸都無辦法,睇返回放,諗吓輸乜,如果點點點頭先就可以贏等等,我進步緊。
 
好多時輸,我都會唔開心,但比起輕鬆地贏,我更想係遊戲入面面對困難,迎難而上,好似熱血漫畫咁把握機會反勝。
 
我問佢,佢點解會玩呢個遊戲,佢話因為多人玩,想跟下潮流,我聽完,不禁諗起今日仲有玩Pokemon Go嘅中年人,佢哋唔係玩潮流,而係真心喜歡,享受緊遊戲樂趣,喺規則同困難之中堅持。
 
贏係重要,但點解會贏,更重要。
 
蔣薇
www.fb.com/maydreaming
IG:maydreaming1123

COMMENT