2020年04月23日

《疫情下暴升的離婚率》

2020_04_23_May Menclub
網上資料圖片
 
疫市之下,幾乎行行都死,但總有例外,有朋友專做離婚嘅,反而喺呢個時勢勁多查詢,到底係發生咩回事呢?我哋試試去分析一下。
 
二月嗰陣,有人話要搶避孕套,因為疫情,大家都留喺屋企多,當然親熱機會都比較大,我亦覺得,係一個好機會比忙於生活嘅夫妻一個相處時間,但親熱係一時,生活係一世,自從WFH之後,好多情侶夫妻生活完全打亂,每日朝夕相對,加上小朋友唔駛返學,喺屋企就好似一個戰場咁,大家都無咗喘息機會。
 
之前網上流行一張圖講媽媽係幾辛苦,一日嘅行程係鬧老公鬧老公同鬧老公,呢張圖竟然可以獲得大量讚好,證明一個男人喺屋企放假係幾咁令老婆討厭,當老婆做家務照顧小朋友時,老公好似悠悠閒咁,自然令人燥底,最後就用鬧去發洩。
 
被鬧得多嘅男人又會好受咩?但男人連返公司去逃避嘅機會都無,同朋友見、飲酒、呻都唔得,心理可以有幾健康?好多人會反思呢段關係到底係發生咩事。
 
有更多人係因為疫情失去工作、減少工作,搵少咗,要供樓要養小朋友嘅人又點可以平心靜氣,香港已經算好,你睇美國,毫無積蓄嘅美國人,竟然係每日上萬宗感染之下都要返工,因為佢哋再唔返工,就會破產。
 
疫情之下,逆境之下,無咗二月時嘅熱情,伴隨嘅係,生活同經濟夾擊嘅感情。
 
一齊生活嘅人,你係接觸得最多,亦係最多磨擦嘅人,更有好多人覺得,大家咁熟,唔需要客氣,有乜就屌乜,語氣比得上係仇人見面,即係你對仇人,同最親嘅伴侶,都可以去到咁盡,一時口角,進而爭執,結下心病,然後每一眼見到對方,都係唔妥。
 
共富貴易,但貧窮同逆境呢?貧窮逆境總會過去,但過程中,兩個人可以如常相處嗎?我哋唔係唔可以窮,唔可以黑,而係唔可以接受一個伴侶喺呢段時間入面嘅改變,比起體諒,我哋更偏向要求更多。
 
想離婚嘅人,請你諗清楚,換咗另一個人,喺同一情況下,會唔會都係一樣?
 
尊重,體諒,關心,講就易,離婚前,請你諗吓自己係咪做足先。
 
蔣薇
www.fb.com/maydreaming
IG:maydreaming1123

Read More
2020年04月12日

《森友會病毒》

打機女人
 
網上資料圖片
 
你唔好再打機喇,呢句令千千萬萬男人為之煩惱嘅說話,男人只可以返工放工時間搭巴士搏塞車打兩舖,廁所開大打一陣,甚至夜晚喺被入面偷偷打。
 
直到,有一日,有一隻叫動物森友會嘅遊戲推出,疫情之下,大家少咗多門,一部Switch同Ring Fit都被抄貴成千銀,作為佛系遊戲代表,森友會好快就令一班女人迷上……而我老婆,係其中之一。
 
遊戲好簡單,你有一個無人島,上面有屬於你嘅屋,你可以採集周邊嘅資源,然後還你嘅房貸,亦可以種植,買衫換衫,去其他朋友嘅島,係咪好好玩呢!!!
 
男人心目中,絕對唔會愛上呢隻遊戲,悶都悶死,牧場物語都有挑戰性過佢,我一再問老婆係咪認真想玩,唔好玩一兩日就唔玩浪費晒,佢話唔會,結果,佢真係做到。
 
自從上星期買完之後,佢就一直沉迷遊戲,點沉迷法?我只知道如果係我咁打機法,絕對已經死無全屍了……起身打,因為朝早有唔同嘅生物,放工打,連涼都唔肯沖,臨瞓打,仲比我夜瞓……
 
我係佢身邊打機,佢已經無再鬧我,因為佢都打緊,我哋打機已經養成眼觀八方嘅技能,隨時要睇住老婆會唔會發脾氣,當我望佢時,發現佢眼尾都無望我,而係好專心地換衫,遊戲人物嘅衫啊!!!!
 
有次我同佢話好夜你快沖涼啦,佢話好,然後拎部機入去廁所,話要去廁所先,玩咗十五分鐘我終於忍唔住,喂,你打機定去廁所啊,平時成日話我,依家你咪一樣,好學唔學。
 
跟住有一晚仲痴線,佢約咗兩個好姐妹,一齊睇流星……三條友,喺遊戲角色入面,一齊望住個夜空,我問佢觀星啊,佢話等流星,見到許願會有道具拎,最後,佢由十一點睇到兩點……一路睇一路用電話同fd吹水,交換遊戲心得,仲要一齊換衫影相……
 
見到我老婆成魔之路,我感受到一句話:If you can’t beat them, join them
 
老婆加入咗打機一族,係佢玩厭之前,我都可以享受平靜自由時光,男士們,呢啲錢唔慳得,記得叫佢地姐妹一齊玩,有交流,佢先唔會同你交流。
 
蔣薇
www.fb.com/maydreaming
IG:maydreaming1123

Read More
2020年03月25日

《男與女的五個電話》

2020_03_25_May MenClub
 
網上資料圖片
 
有晚同朋友食飯,當時我接到老婆電話,講完收線,隔一陣又再打過嚟,再隔一陣又一個電話。
 
朋友佢突然問我,知唔知頭先打個幾個電話唔係咁簡單。
 
佢懶高深咁講,第一個電話,應該係佢收工之時打俾你,話你知佢收咗工啦,咁自然地收線之後,佢隔一陣又再打俾你問你嘢,再隔一陣打俾你同你講你有咩錯咗,知唔知其實呢幾個電話,都係代表一件事。
 
當一個女人知道你同朋友食飯約會,而佢亦會不斷打俾你時,意味住,佢打俾你唔係好似電話入面講嘅咁簡單,而係問你條粉腸幾時返啊!
 
相信唔少男人都俾伴侶奪命追魂call,喺朋友面前要唔好意思地行開,一輪操作之後拖延一陣時間,然後再返去坐陣又會收到第二個電話,大家男人都只會在心中,明嘅兄弟,又要走喇嘛,咁飲返兩杯先啦。
 
朋友佢話,當第三個電話時,佢已經要搵嘢鬧你,咁下一次打俾你,就會真係屌你幾時先返,因為佢已經俾咗三次機會(咁都算係)你而你無珍惜。
 
我再問,大師,咁如果第五次又係點?佢吐出一啖氣:「佢會同你講你唔駛返喇。」
 
實在太真實了,到底要經過幾多不愉快經歷先可以歸納出一個理論……
 
反觀男人,當你收工或者等伴侶之時,第一個電話,係為咗確認自己仲有幾多自由時間,佢話就返,你會好珍惜餘下嘅時間,如果佢要遲,你不知幾開心;當你開始做自己事,包括打機打飛機上網睇片之類後,感覺一切都好滿足時,你望望個鐘,咦,咁遲都未返嘅,你就會打第二個電話,睇吓咩事,而亦純粹係睇佢有冇意外,一聽電話你就安心了,呢個時候佢話你知食完飯,你仲會好關懷咁問,要唔要去飲杯嘢,食個甜品啊,務求佢再遲返,如果係角色互換,你都遲咗仲想加鐘,可以直接收屍。
 
第三個電話,係你講定自己要瞓覺,原因係乜,太夜你唔想出街接佢,所以要先下手為強地講瞓先,第四個電話,就係你瞓之餘,都仲好擔心佢,所以決定幫佢call車,至於第五個電話,就係佢上咗車之後,等佢報個平安。
 
男嘅心態係,你開心,我就會開心,但女嘅心態係,我唔開心,你都唔駛旨意開心。
 
蔣薇
www.fb.com/maydreaming
IG:maydreaming1123

Read More
2020年03月16日

《武漢肺炎與意外懷孕》

2020_03_16_may menclub
 
網上資料圖片
 
疫情間期,街又唔敢出,工又唔駛返,會做乜?都係成年人會做嘅事啦,剛剛收到一個喜訊,有朋友突然中咗第三件,但喺佢眼中就係一件晴天霹靂嘅事,第三件喎,唔好玩啦。
 
早排朋友仲同我講,呢排肺炎得閒,真係多咗好多夫妻相處時間,仲同我講,試吓買支按摩油,嚟個夫妻間嘅推拿會增進感情,仲會令感覺上昇好多添。
 
Well,咁我當然替佢開心啦,佢仲話有次忍唔住無用到套,然後要食事後丸,但估唔到一排之後,就突然聽到佢話老婆未有月經,怕出大事,我同佢講,食完事後丸應該都係會遲咗或者亂咗,帽事嘅!
 
佢今朝唔放心用驗孕棒一驗,咦,一條線喎,放心晒!然後佢老婆一睇,唔係喎大佬,有一條若有若無嘅線係度,佢當然問兄弟們,喂,咁係咩意思?我一睇,同佢講,有第二條的話,深同淺都係中喎,佢突然好似秦沛咁大叫,你大我啊!我話你不如再買一支另外牌子睇吓。
 
我當然陪住佢去買,佢心情忐忑到,我心諗你都唔係第一次做爸爸啦,怕什麼,但佢話呢個時勢,仲整多件想死咩,佢話依家最需要係一個心安理得,話唔想接受呢個現實,想買支唔準嘅去呃自己,我大笑,同佢講咁你買支假嘢囉!
 
呢種男人之間嘅友誼女人真係好難想像,有兄弟仆街,真係仲會大笑三聲,然後插多兩刀,當然,口頭係咁講,心入面都係想佢好嘅,你明啦,爸爸爸爸,唔好唔要我!哈哈哈。
 
最後,都係兩條,心死了,我問咗佢一個問題,如果呢個時間,武漢肺炎同生多件你揀一樣你會點,佢話中肺炎會好返,得2%死,但生多件,真係百分百死,你話呢?
 
我靈機一觸同佢講,不如你生落嚟,然後紀念呢件事而出現嘅生命,將佢改名做「武漢」啦!
 
佢笑到收唔到聲,係咁話我痴撚線,問我有冇同理心,我話,兄弟,你食埋事後丸都中,只可以話你精子實在太強大,係命運,係天意,係緣份呢!
 
然後我幫佢搵晒家計會資料,再教埋佢點去,佢就帶住沉重心情出發,佢最後話咗句,今次去家計會扎Q埋佢算喇!
 
武漢肺炎最恐怖唔係病,而係佢不停咁影響你生活,將你生活打亂,令你生命變得不一樣,講真,有咗都算係喜事,另外有朋友因此而失業嘅,真係無仇報。
 
蔣薇
www.fb.com/maydreaming
IG:maydreaming1123

Read More
2020年02月28日

《打舖機都要好似乞求的男人》

2020_02_28_May menclub
 
網上資料圖片
 
最近放假同home office多,可以話係悶到一個極點,朋友係要見嘅,但你都唔敢有乜聚會啦,大家係WhatsApp傾傾吓,有人提議不如一齊上網打吓機,重拾返當年年輕嘅情懷,大家都好興奮舉腳贊成,點知……迎面而嚟嘅係一場悲劇。
 
第一次打完之後,大家都好開心,一路連咪一路叫,喂喂喂,你唔好亂行;哈哈哈,你又死咗乜咁水皮啊;頂頂頂,等我一打五殺晒對面。歡笑聲好多,大家都好開心,但係你身邊嘅老婆或者女朋友就會粒聲唔出……
 
我一笑佢已經黑咗面,然後我收細咗聲量,另一個朋友仲慘,話唔可以再講嘢,因為老婆話個女就比佢嘈醒,快樂時光過得特別快,打完兩場之後大家就自動自覺收手。
 
今日有朋友呻,佢打咗一陣機,得到老婆一句評語:你就掛住打機!
 
須知道呢個朋友佢平時好少打機,一打就俾人鬧,話佢唔陪自己,仲有冇下一場?我唔知,亦唔敢諗……
 
女人最憎男人打機,同每個老母都一樣,你打機就係不務正業,細個老母話你打機唔讀書,最後書讀好喇,出嚟做嘢喇,自己住喇,就到女朋友話你不務正業,儘管你朝早九點到晚上八點都工作,帶住一身疲倦返到屋企,做完家務,沖好涼之後坐喺沙發想打機都好,佢都會覺得不務正業。
 
對於女人講,你每分每刻都要陪住佢,就算佢睇你完全無興趣嘅韓劇都好,你都要陪佢睇,佢睇劇就正業,你打機,就不務正業,就算你之前做咗乜都好,你都要陪佢,你都唔可以打機。
 
有朋友佢仲要用一種乞求嘅態度去問,老婆,我做晒所有嘢,可唔可以同朋友打兩場啊?佢唔出聲,或者好不滿咁講,你打囉。如果你真係打,一個bgm就會出現,佢就會同你講,你真係打,你又唔陪我,你陪你班朋友得啦,係咪打機重要過我先,係咪朋友重要過我先,你有冇理過我感受啊?
 
當你受咗呢三連擊之後,我相信就算你打到,都已經輸咗九成,因為你已經無心情去打機。
 
其實打機真係一種又低消費,又開心嘅行為,比起玩錶玩hifi玩車玩女人,一個宅男可以打成百個鐘都零花費,有乜嘢係可以開心咁耐得嚟又免費呢?無。
 
講真,男人喺呢個年紀,打機已經唔係為開心,而係為散心,想喺遊戲入面拎返少少成就感,想從遊戲中搵返當年同朋友一齊打機嘅青春,而女人,從來唔會覺得呢種係散心,係一種同朋友聚會,係一種抒發情緒。
 
問心,一個唔打機,無豬朋狗友嘅男人係唔係理想伴侶?我有好大疑問,一個咁完美,完美到好似機械人嘅男人,真係好可怕,因為你唔知佢做緊乜,因為佢乜都無所謂,因為你唔知點去了解去內心點諗。
 
我想講,打機,可以一句講,唔好打咁耐啊,怕你攰,玩得開開心心就好瞓喇,唔好沉迷。
 
其實咁好好聽,比起兩個人互相埋怨,咁先係王道。
 
蔣薇
www.fb.com/maydreaming
IG:maydreaming1123

Read More