2019年12月24日

《整容迷思》

2019_12_25_May
 
網上資料圖片
 
有次同班兄弟吹水飲酒,講講吓提出一個題目好有趣,就係整容對於男人講接唔接受到。
 
最初問題係,如果一個整完靚到爆嘅,同一個純天然但平庸嘅女仔俾你揀,你會揀邊個?
 
當然,假設除樣之外所有因素相同情況之下計啦。
 
大部份男人會講,揀個靚嘅,始終都係對一世嘛,起碼賞心悅目先啦;亦有朋友提出,第時生小朋友都係唔靚咁點算,但俾人一句講你同個一向平庸嘅生都會係唔靚啦;理智型朋友會話,唔知就算,知就要諗諗。
 
如果大整係唔得,咁小整又得唔得,整個雙眼皮啊,打吓針瘦面啊,修吓眼袋咁,如果少少絕大部份人都可以接受。
 
但如果好似網上美妝片嘅素人化到鬼火咁靚就一落妝就完全唔同,呢個情況大部份人都會反感,學子華講,你唔係化妝,你係喬裝啊!
 
分析出幾個點,一係你就整得盡少少,整得自然少少,化妝你反差太大,係仲令人難接受。
 
有朋友講,相處係睇個性,唔係睇外表,我哋又問佢,咁你揀好佢之後,相處得好好,但佢之後先再整容,整靚少少又點計?咁佢又好似可以接受喎。
 
其實男人都係好睇外表,同一個人如果靚咗又點會拒絕先?
 
但整容都有分好多層次,去韓國整同返大陸整都好大分別,有時喺街見到一睇就會覺得佢整咗,個鼻係好高好直啊,對眼係好大好靚,但睇落去真係好兀突,又或者去到一個層次係整得太完美,完美到令人覺得好假,咁都會令男人好卻步。
 
如果你知自己伴侶整過容,你介唔介意俾身邊家人或者朋友知道呢件事呢?原來大家都唔會講,唔會認,自己知就算,咁指出其實大家都反感呢件事,喺道德層面上,同埋面子層面上,大家都傾向想人哋覺得自己伴侶係天生咁靚。
 
最後一個問題,隆胸又得唔得呢?
 
答案好一致,不了。
 
蔣薇
www.fb.com/maydreaming
IG:maydreaming1123

Read More
2019年12月15日

《夾餸》

unnamed-3
網上資料圖片
 
早排同朋友出去食飯,佢女朋友我都識,食飯之時,女方叫男方夾餸俾自己,男方都已經唔太願意咁,但都為咗和平,佢都幫佢夾咗。
 

之後我哋忍唔住開始討論呢個夾餸問題,究竟男朋友應唔應該要幫女朋友夾餸呢?

 

首先,男人一面倒覺得唔應該,而女人當然覺得無問題啦。
 

女仔會覺得,食飯唔係都應該愛錫女朋友咩,幫夾係好應該喎,又唔係咩難事,都係舉手之勞姐。

 

男仔會覺得,愛錫女朋友還愛錫,但應該係一種主動,而唔係俾人開口要求,同埋夾餸同愛錫又有咩直接關係呢?喂你平時自己一個食飯唔識夾野?咁平時係咪會餓死先?唔係喎,咁你有手點解要人幫?自己動手豐衣足食嘛。
 

女仔又會話,咁成班朋友一齊食飯,女仔會怕醜,唔敢夾餸嘛,你幫吓唔得咩?

 

我即時講,呢度個個都識都熟嘅,又唔係第一次食飯,但你都係要求幫你夾喎,咁即係唔係熟唔熟嘅問題啦,既然你唔係怕醜,又唔係無手,點解要人幫呢?明顯你就係享受被服務嘅感覺。
 

女仔都好老實,係,我就係想佢幫我夾,咁有乜問題,愛錫女朋友係正常事。
 

好,解決咗原因之後我哋就開始講咩場景之下唔應該咁做,同男朋友兄弟第一次食飯就唔太好,講真,兄弟們見到呢一幕都會覺得呢條女麻麻煩煩,起碼唔獨立先,之後自己兄弟都幾難有好日子過喇。
 

另外就係同屋企人食飯,所謂嘅婆媳紛爭就從此起,喂我個仔咁多年都係我夾俾佢,佢都未夾過俾我,今日你喺我面前叫佢夾嘢,咩新鮮蘿蔔皮啊!食個飯都無手夾,咁仲邊有手做家務、煮飯、洗衫啊!
 

再推去同公司老闆啊,重要客戶食飯,唔通你都要喺咁正式場合入面要人夾嘢咩?完全不在乎餐桌禮儀,喺其他人眼中,佢可以係好紳士,但亦可以係無眼光搵咗個唔識體面嘅女朋友咁。
 

當然呢幾個case喺女士們眼中都唔太在乎,反正佢就係要愛,有乜後果,人哋點睇,Who cares?
 
蔣薇
www.fb.com/maydreaming
IG:maydreaming1123

Read More
2019年12月09日

《寵物》

2019_12_09_dog and man
 
網上資料圖片
 
仲記得好細嗰時,喺街邊見到貓貓狗狗,都總會用一種羨慕同期盼目光去望,有好幾次鼓起勇氣去問爸媽可唔可以養返隻時,都總會被教訓,養你一個都夠煩,仲養寵物係咪想死?
 
久而久之,由期望變失望,慢慢就死咗條心,但唔算係一種痛苦,因為未擁有過又點會痛呢。
 
小學時,有一期好興養倉鼠,唔記得係唔係哈姆太郎出嘅時間,幾十蚊一隻,少少零用錢都可以買到,而屋企唔養得,只可以買完放喺養開嘅朋友度,得閒就去玩一下。
 
兩三星期後,倉鼠好唔妥,唔食嘢,唔肯郁,我知佢病咗,太細個唔知點做,一班細路一齊帶返佢去寵物店問,求佢哋醫返佢,最後係點?去睇醫生啦,寵物店講咗句,睇醫生都唔一定可以醫好佢,筆錢仲可以買成十隻新嘅,我第一次覺得原來生命係可以用錢去衡量的,係好涼薄,你無錢時,真係可以好現實,最後倉鼠到了彩虹橋,為此都喊咗一排。
 
成年之後,有能力養寵物,自己住之後,你養乜都可以,父母一直問幾時生小朋友,而我就選擇咗養寵物。
 
今時今日生小朋友責任太大,養寵物相對輕鬆,起碼唔需要驚佢學壞、驚佢讀書、驚佢將來搵食等等。
 
養寵物之後,你嘅生活就會有好大變化,因為寵物只有你照顧,你連旅行都去唔到,朝早起身,返屋企第一件事都係照顧佢哋先。
 
好多人覺得男人對小動物無咁大愛心,但事實上我覺得,男人比起女人更在乎寵物,唔係因為佢哋可愛、聽話、好玩,而係一種伙伴,就好似當年嘅數碼暴龍、寵物小精靈咁,我哋係一世嘅朋友,一直並肩。
 
身邊有朋友生咗小朋友,望住佢哋我終於明白當年阿媽講句:養你一個都夠煩嘅意思。
 
我每日返去執屎餵食抹嘢都係小事,養小朋友你係要同佢交流,佢會對你有要求,要你陪佢要你理佢,困身程度無限大,無論你做乜事都好,小朋友有咩事你都要即時停去理佢哋。
 
養寵物都唔易,但一同生仔比,就知道一個係easy mode,一個係地獄mode。
 
喺父母眼中,照顧咗我哋足足十幾廿年三十年,你對寵物嘅情感有幾多?父母對你嘅情感應該係倍數上去。
 
幻想一下,如果寵物唔聽話、唔理你、受傷、病、死等等,你會有幾心痛,當年有一次同父母嘈起上嚟,阿媽鬧我,你每日返屋企叫人都無,養隻狗都好過養你,我不以為然,叫唔叫有幾閒,會唔會咁小題大做啊?
 
將心比己,今日我返屋企寵物的確會喺門口叫兩聲然後期盼你摸下佢,而我個心亦因此滿足;反而父母照顧咁多年,我哋又點對佢哋呢?
 
太多事,我哋想得太簡單;亦有太多事,我哋未學識感受;太多太多事,到你醒覺時,已經太遲。
 
蔣薇
www.fb.com/maydreaming
IG:maydreaming1123

Read More
2019年12月02日

《政府與公廁》

toilet
 
網上資料圖片
 
仲記得細細個對於人有三急係好有堅持,喺街只可以小便,大便點都忍到返屋企先算,特別係學校入面,你痾屎!?哦!你痾屎!會俾人笑,今日我睇返,真係唔明有乜咁好笑,唔通你唔痾屎咩?今日要講嘅就係公廁問題。
 
對於我呢種腸胃極之敏感嘅人,食辣少少、食油少少、食奶少少都會突然肚痛,由於太有經驗,所以對於廁所資訊好有心得,如果要我排,一定係商場廁所最好,其次就係餐廳,最後先會係公廁。
 
審計署發表咗個廁所報告,講政府原來呢幾年準備一大筆錢去重建同整修公廁,但大部份都係未做同做得好差,最可怕係有公廁係要設計九年都未完成,我屌,九年啊!你起個金字塔都得啦!反映咩?就係呢個政府可以有幾廢,唔講咩大型基建,連人最基本嘅如廁問題都可以做到咁差真係無說話好講。
 
去過日本嘅朋友一定體驗過日本廁所嘅偉大,無論公廁定私人都好,都有一個極好如廁體驗,有保溫廁板令你唔會凍親,有音樂聲令你唔會尷尬,有洗屎眼功能令你覺得乾淨,香港呢?最簡單連廁紙都未必有啊!
 
政府做嘢係幾慢你一定知,佢哋得過且過,唔會同你追時間,睇吓咩四千蚊資助,竟然要親身交表而唔係上網apply,再望吓誠哥基金簡單直接就已經高下立見,做唔到網上咩?唔係,因為唔想煩,用人手做咪得囉,行政費仲多過你俾出去嘅錢?政府錢唔怕,仲可以當係創造就業啊!
 
公廁長期失修,硬件上,廁板、沖水、廁紙、洗手、通風、消毒有幾多你可以接受?造就好多馬步高手;軟件上,人手不足,阿叔外判hea做,周地水無人理,久而久之使用者都唔會同你講衛生,行到遠一遠射,企係廁所上面亂痾等等。
 
有時真係怕貨比貨,一個連去廁所都唔合格嘅地方,叫人點自豪呢?
 
官僚主義之下,一個設計九年廁所,我真係想知係唔係可以拎到世界級大獎,裡面係唔可以直空抽上太空。
 
用廁所比,大商家做得最好,其次係小商戶,因為大家都係搵食,對於客戶體驗好有要求,而政府?一個服務市民,不計成本嘅機構,竟然先係做得最差嘅,講出嚟唔好怪人唔撐建制喇!
 
我有時心諗,你林鄭同食環署局長敢係公廁痾一次而覺得無問題嘅,我撐你又有乜所謂。
 
蔣薇
www.fb.com/maydreaming
IG:maydreaming1123

Read More
2019年11月22日

《對自己有要求的浪漫》

105-BartendersHands
 
網上資料圖片
 
今日要講一杯雞尾酒嘅故事,你可能會話有乜咁特別?酒,我相信大家都飲唔少,咩八二年拉菲咩八五年可樂就唔好計喇,我飲嘅只係一杯雞尾酒,基酒絕對唔會係咩貴嘢 ,成杯價錢亦只係百零蚊,但點解佢係一杯特別嘅酒,就因為一個調酒師。
 
雞尾酒需要人調,喺工聯會一個課程都係千零蚊,專業少少都係幾千蚊,要入行話易唔易,話難唔難,簡單一杯馬天尼有邊個唔知個分量係點,做法係點?上網隨便搵都搵到啦。
 
所以你話一個調酒師同一部機器有咩分別?可能就係你坐係吧前面,佢喺你面前搖出一杯酒嘅過程。
 
調酒,可以幾好睇,咩水割威士忌,咩十大令調酒師想打人嘅酒,佢做得愈多,你可能就愈開心,但我只係叫咗杯簡單嘅Margarita,過程好認真,好集中,調完之後佢上比我之前,輕輕聞咗一聞,然後露出一個滿意嘅神情再俾我,令呢一杯雞尾酒變得特別。
 
有幾多人係可以做到敬業樂業呢?我相信連我都唔得,一個調酒師可以喺每日調數以百計嘅酒時,仲可以對每一杯自己搖出嘅酒,抱住一份滿足感,令我覺得佢真心係喜歡呢份工,喜歡調酒。
 
好多人想將自己夢想變成職業,但當變成之後夢想變得現實,然後就無以前咁喜歡呢件事,因為佢已經唔係興趣,更多係金錢,更多係生活,呢份初心好少人可以保持到。
 
我同佢傾起酒,佢話,當你做得多時,你會悶,而我令件事唔悶嘅方法係,將件事再變得更好,即使係有幾咁微小都好,我聽到覺得呢位仁兄係真男人。
 
要洞察到差唔多嘅事分別係點已經難,再搵方法去改善呢種微不足道嘅分別,更難。
 
難怪佢可以喺一間消費水平都唔低,而格局都高級嘅酒吧調酒,一杯雞尾酒你喺太子飲可能係happy hour 50蚊杯,而呢度happy hour係100蚊杯,相差一倍價錢,我平時好計算,呢樣嘢貴一倍,係唔係好一倍先?當然,通常好少少都已經貴一倍,但今次我覺得成杯酒真係好飲一倍,飲佢一杯頂得住兩杯。
 
對自己有要求,對工作有要求,係一種男人嘅浪漫,或者有人會覺得係奴性,但亦有人形容呢種係匠心,香港一向求快求效率求方便,愈來愈少人有呢種匠心精神。
 
一杯雞尾酒,飲落去唔一定特別,但佢嘅來歷同過程,令佢變得不簡單。
 
蔣薇
www.fb.com/maydreaming
IG:maydreaming1123

Read More