2019年11月16日

《成年人的妥協》

unnamed-1
 
網上資料圖片
 
政治問題大家都早有定論,今日要講嘅係妥協。
 
同一個朋友討論過現時香港嘅情況,大家都不自覺地認為,有時會唔會作出少少讓步呢?
 
一講完我就話,講得出呢句,證明我哋已經唔後生,證明我哋已經被世界磨平了。
 
曾經幾時,我哋都熱血過,我哋都會好有自己一套,我想點,我覺得應該點,我認為可以點去做等等;今日我哋會去猜想對方想要乜,然後做一套佢想要嘅,再講一個佢認為可行嘅計劃。
 
咁自己呢?重要嗎?
 
俾現實打磨過之後,我哋發現自己嗰一套未必好,我自己想點又可能係一廂情願,我點做原來係好困難,計畫趕不上變化,伴隨住係失敗,以及失望……
 
年輕時會認為自己係世界主角,做乜都可以,總有方法,總有轉機;當你失敗後你先發現原來自己並不特別,一次又一次失敗令你唔想再去嘗試。
 
今日聽到學生們對於未來充滿自信嘅一句,將來一定更好,心情無比複雜,作為老屎忽會覺得佢好傻好天真,但你又好似見到以前嘅自己咁,好想佢真係成功,好想迎接美好將來。
 
從來,講都係最易,做先係最難;計畫係最易,執行到計劃係做難。
 
情況就好似你見到一個人話要成為海賊王一樣,講得太虛,不如幻想吓,有人搵工你係老闆,佢同你講可以帶你公司上市,你望一望佢,再望一望份cv,乜經驗都無,憑乜?
 
呢個時候你會唔會笑佢?
 
如果你選擇笑,不如諗吓有多年經驗嘅自己,又有冇能力帶到公司上市?而有上市經驗嘅企業家,再去開新企業又係唔係必贏?再睇吓外國facebook,google等等startup當年上市前,係咪由有經驗嘅老行尊去營運?
 
我哋妥協,我哋唔再有夢想,所以我哋係不二嘅成年人,點解成日話將來係年輕人世界?因為改變世界嘅通常都係年輕人,有夢想嘅人,而成年人唔會有好大改變,唔係一定無,而係少囉,我哋有負擔、有角色、有過去,而將來?仲有幾多年?
 
妥協,從來都唔係罪,係一種選擇,但對於年輕人,請唔好用你一套去覺得佢哋要妥協,係好係壞,做完自有定論。
 
妥協,從來都無問題,但唔好以懂得妥協為傲,因為妥協從來都唔係難做嘅事。
 
蔣薇
www.fb.com/maydreaming
IG:maydreaming1123

Read More
2019年11月08日

《老屎忽》

杜汶澤陳百祥7
 
網上資料圖片
 
陳百祥大戰杜汶澤一戰,都算係一場可以挑戰當日許志安記者會嘅一場直播,當日喺客公司一到四點半大家停晒手一齊睇,抱住食花生心態去睇呢場明知係你有你講,我有我講嘅泥漿摔角。
 
呢場不單單係藍黃之爭,仲係一場世代之爭,俾面陳百祥佢都算係九十年代紅極一時嘅笑匠,但三十年後佢成為老屎忽之後,你會發現佢每句說話都會令你反盡白眼,唔好話講笑,你可以忍手唔打佢都算好本事。
 
同老屎忽傾計,你首先要知道佢會先放出一副阿叔食鹽多過你食米嘅嘴臉,坐係度,唔係傾啊,係教精你啊細路,所以唔係一場辯論,而係一場show,佢只係要講自己嘅睇法,強迫你跟佢套嘢,你唔跟?佢會覺得你自己走寶,如果你想佢聽你講?傻的嗎?
 
你同佢講數據,佢同你講因果,你同佢講因果,佢會同你講情感,你同佢講情感,佢又同你講返數據。
 
佢唔會同你拉喺同一個擂台打,而係帶你遊花園,遊到咁上下,連杜生就一頭煙,老屎忽唔會同你講邏輯,只會將你智商拉低,最後你只可以選擇走人唔浪費時間,而佢就會好似勝利者咁留喺擂台話自己贏咗。
 
老屎忽嘅問題係,佢唔會聽你講,同職場上人生中嘅老屎忽一樣,佢只會有自己一套,所以點解老屎忽咁討厭?因為佢哋第一,唔會聽後生嘅講;第二,佢唔會聽你講你哋睇法;第三,佢更唔會代入你情況去思考。
 
佢從來都唔會諗後生點解會咁諗,所以佢脫節咗好耐,仲停留喺當年風光之時嘅感覺,覺得自己當年幾威幾威,今日上位後用返同一套都可以work,陳百祥有個位要讚,佢無再拍戲,可能佢知道自己已經唔再適合呢個世界,唔會再有人因成佢而笑,一日唔落手,佢都可以喺幻想上延續自己嘅風光,但呢種人一世就完,佢唔會再有更多成就。
 
比起老拍檔周星馳,心態上佢真係差太遠,周星馳起碼唔會原地踏步,肯去試,肯去闖,有人讚有人罵都好,佢都係活喺現在,但陳生佢只可以活係當年。
 
可怕嘅係,你同我有一日都可能成為老屎忽,而自己唔會知道,當你有日成為老屎忽之後,你表達你意見而後生唔受時,你又會唔會可以放低身段去聽人講呢?
 
蔣薇
www.fb.com/maydreaming
IG:maydreaming1123

Read More
2019年11月01日

《高手》

2019_11_01_蔣薇MenClub
 
網上資料圖片
 
有冇遇過一個令你覺得相處得好舒服嘅女仔?又有冇遇過一個令你覺得好親切嘅同事?有可能你好好彩遇到合適嘅人,但更有可能,佢係一個高手,一個比你各方面都優勝嘅高手。
 
高手在於,佢好清楚你要乜,佢一言一行,同你講嘅所有嘢都好有技巧,令你覺得好舒服,正如一個有小姐脾氣嘅同一個好體貼嘅相比,有人天生就體貼嗎?有機會嘅,但更可能係經驗之談,佢把握到你喜好,去迎合你,因為佢知咁做先對自己最有利。
 
職場上有好多高手,無論係自己友定敵人都好,有兩種學說,一種係拎幾多錢,做幾多嘢;另一種係,做嘅嘢比你拎嘅錢更多。前者會話自己有work life balance,後者會為自己將來打算,更有野心同計劃。
 
人生就係不斷被壓力迫住你前進,讀書如是,工作如是,當你有更好成績就會有更好前途,工作上少咗一種好明顯嘅分數,分數低都可以如常生活,但係上司、客戶眼中,你做幾多嘢,有幾多能力,已經心中有數。
 
今日香港經濟係點,我諗都好清楚,成日講攬炒,今日終於有種火燒到埋身嘅感覺,有好多公司都生意大跌,裁員?有部份裁咗,亦有好多公司係睇埋呢個年尾點,如果市道都唔好的話,過年前後就係郁手之時。
 
邊個會比人裁?我諗大家都好清楚。
 
有計劃有野心嘅人一定比堅持work life balance嘅人有籌碼,甚至仲可以升到職添,因為樓上高薪嘅上司被裁嘛。
 
太平盛世,每個人都可以選擇自己嘅路,但係低谷逆境,就係見真章之時。
 
有好多人覺得,喂,我出力的話,我都可以做到佢哋做嘅嘢,但你太天真,對方一直都超額去做,已經拉開咗一大段距離,每一次做多咗,都係經驗,都係增值,佢得到嘅比你想像中多太多,好似做運動咁,一向都跑開嘅一定好氣過你,你一下子可以跟,但跑多一陣你仲會咁有自信嗎?
 
放眼睇,身邊有邊個係高手,你好快就會知道。
 
蔣薇
www.fb.com/maydreaming
IG:maydreaming1123

Read More
2019年10月25日

《綠帽可大可小》

2019_10_25_May MenClub
 
網上資料圖片
 
反送中修例事件已經差唔多四個幾月,依家大家都好集中喺五大訴求等等,突然主角陳同佳提出自首,好多人突然間再次醒起,整件事嘅最初爆發點原來係呢個綠帽事件!
 
話說陳生同潘小姐相戀後結伴同遊台灣,途中陳生得知潘小姐已經懷孕,仲要係一個月嘅事,bb係前男友,手機仲有同前男友嘅短片……
 
同朋友講起呢件事,我問,如果係發生喺自己身上嘅話你會點?大部份人都會講一句標準答案,中……
 
再追問落去,好多人都覺得,陳生佢殺人,都有幾分可憐,大佬啊,當一個宅男以為自己得到愛情時,你話佢知,其實我係搵你埋單,如果唔覺唔覺咪做埋人便宜老豆?仲要加條片去刺激對方,突然跳制的話,都唔係奇事。
 
講真,有返咁上下年紀對於綠帽都唔會陌生,好彩嘅話自己無戴過,但總會聽朋友講起自己綠咗嘅慘況,如果仆街少少嘅甚至會派過帽比人戴添。
 
兩個人一齊,從來都唔係童話,好似王子公主咁千辛萬苦一齊之後,幸福快樂咁過一世,而係每日都有新挑戰,你會有誘惑,對方都會有。
 
而陳生應該係比較年輕,屬於戀愛初哥,未知道合則來不合則去嘅道理,所以一下子就跳制出事。
 
殺人有罪,愛情之中無論你用乜方式去傷害對方,都唔會有刑事責任,好多人追究緊陳生嘅殺人罪,但如果佢無落手,佢嘅傷痛又有邊個會知?又有邊個會賠償?
 
因為無犯法,所以出軌、派帽、屈人埋單都係常態,呢種灰色地帶就算你結婚都唔會有保障,陳生呢單嘢,點解警世,係今日開始你可以大大聲講,呢種不負責任傷害感情嘅行為係可以去到幾嚴重,會令香港今日只有黃藍之分、黑白不分、交通、政府、經濟都有大量損失。
 
以後每個人派帽之前,都應該諗多一諗,你做嘅嘢可能好嚴重。
 
今日一諗,綠帽唔怕戴,最緊要除得快,都幾有和理非感覺。
 
蔣薇
www.fb.com/maydreaming
IG:maydreaming1123

Read More
2019年10月18日

《生仔?咪玩啦!》

8DEE8CB1-352C-4ABD-B927-9C187028D083
 
網上資料圖片
 
好多兄弟都結咗婚,但生咗小朋友嘅真係極少數,間唔中我哋都會問吓,喂,幾時生仔啊!大家都係同一反應,生仔?咪玩啦!
 
今時今日香港社會同將來,要生小朋友真係好大責任,先唔好講你可唔可以比時間陪佢哋,你睇吓網上討論區,你唔留返幾層樓比仔女的話,真係會比仔女怨,仲話你窮人生仔正仆街,養兒防老正撚樣之類!
 
你再睇吓女性論壇,生完仔女嘅女人,佢已經唔再係你老婆,而係你個仔個阿媽喇!你同佢嘅感情會由直接變成間接,生活同感情已經會有好多磨擦,仲要有小朋友嘅問題,大家真係好易出大事,但你就算幾唔高興幾嬲幾難頂都好,你都會覺得為咗小朋友要忍,兩邊都要忍,你忍我我忍你,何必呢?
 
有時見到同事剛剛生完仔,每晚都係抱佢、餵佢連瞓都無得瞓,然後一頭半個月又會怕小朋友唔舒服,要睇醫生,要擔心、要陪伴等等,唔好講去旅行啊,連少少私人時間想打舖機都唔得啊!
 
唔生仔,一來洗費細咗好多,養少個仔唔係講奶粉尿片錢咁少,而係你唔需要買保險,唔需要換大樓,唔需要為佢買多層樓呢幾種大支出!二來你會有好多時間做自己嘢,起碼你去旅行都唔駛就住就住,夜晚出夜街都唔駛怕個仔無人睇住!三來你唔需要為佢將來擔心,怕佢學壞,怕佢病痛,怕佢生活唔到,怕佢行差踏錯!四來,你同老婆夜晚想親熱都唔駛就住就住啦!
 
對於我哋呢批新一代講,搵到少少,唔算窮,但亦講不上富貴嘅人講,真係好少會諗生仔,特別係男人之間講生仔都好似拎佢命咁,好似唔想打種嘅熊貓咁。
 
你唔好以為我哋想逃避責任先咁講,而係我哋太清楚責任問題,明知自己唔係好得,會有壓力,所以會猶豫好奇怪咩?唔通對自身認知不足,錯估形勢先係勇敢承擔?
 
諗返轉頭,當年我哋細嗰陣,咪一樣咁煩,但父母都係咁照顧自己,所以好好孝敬佢哋啦!
 
蔣薇
www.fb.com/maydreaming
IG:maydreaming1123

Read More