2019年10月11日

《政治下的兄弟情》

2019_10_11_May MenClub
 
photo by 大曹
 
仲記得當年雨傘運動時,出現黃絲同藍絲分類法,當時已經有好多人因為政見而unfriend朋友,今日反送中運動,又迎接另一個浪潮,唔知大家同幾多「朋友」割蓆了。
 
fb上面有百樣人,總會有班唔係熟又唔知點解fd咗嘅人出現喺上面,有時你會發現佢個邏輯同自己有好大分別,eq高既就會當睇唔到,有時會喺上面嘈,亦有人選擇靜靜地unfriend佢。
 
如果一個識咗好多年嘅兄弟同你政見不合你會點?我正正就遇到過呢個情況。
 
大家有傾有笑,風花雪月唔好咩?但少不免就會有時講到政治,一言不合就會屌,講真,平時大家都係屌來屌去,但都係講笑地屌,而有一次你聽到大家係真心互屌時,你就會發現原來粗口係咁難聽,特別係出自一個熟人口中。
 
所謂道不同不相為謀,大家各行各路咪幾好,但總會有common friend,已經去到一個情況係有你無我嘅情況出現,連出嚟食個飯都無心情。
 
有時諗返起曾經大家係幾咁熟,突然變成陌路人,點會唔覺得可惜,你會發現呢個人原來咁陌生,而所謂嘅友情係幾咁薄弱。
 
大家都係香港人,大家都想香港好,只係大家立場係唔同,可惜今日水深火熱嘅香港,幾個月抗爭運動嘅沉重,令大家已經唔可以好好傾,好好溝通。連家人都可以嘈,更何況係朋友呢?
 
有朋友勸,唔好講政治算喇,有返咁上下年紀,大家都好有主見,好有立場,你連說服佢都有困難,更何況你要屌佢,有咩可能屌到佢轉向呢?
 
政治上,有好多同路人,亦有人唔認同,成功爭取達到目的之後,都係血流成河,關係話變就變,唔會返到好似以前咁。
 
我知,你會覺得唔同路嘅有咩可惜,但有返咁上下年紀你會明,今日要有新朋友好難,要熟更難,要稱兄道弟更難,點會唔可惜。
 
唔知有日喺街上面遇見佢,你仲可唔可以同佢打聲招呼。
 
蔣薇
www.fb.com/maydreaming
IG:maydreaming1123

Read More
2019年10月04日

《男人戀愛五部曲--初戀》

2019_10_04_ May MenClub
 
網上資料圖片
 
暗戀,往往得唔到結果,總有一個曾經喜歡而唔能夠一齊嘅女神,年月過去,你對愛情嘅憧憬退減,但你對愛情嘅需要增加,因為身邊朋友一個一個出pool時,你都唔會好受,你好想體驗一次咩叫戀愛,牽手感覺係點?擁抱又係點?
 
學生時代後期,大家急不及待一試戀愛感覺,你好易就會搵到一個好易到手嘅女仔,佢唔係你心目中女神,但佢都算順眼,重點係,佢都想拍拖,而佢都覺得你順眼,大家咪試下囉。
 
短訊傾計、電話傾計、出去約會,表白,一齊,一種簡單直接流程令你真正出pool了。
 
初戀無限好,因為每一件經歷嘅事都係全新,你第一次食麥記、第一次飲可樂、第一次睇戲都係特別嘅,所以初戀永遠都咁美好,你會發現,原來人生有呢種玩法。
 
甜甜嘅感覺,係初戀嘅感覺,好多人推崇初戀都係因為呢種甜蜜,但有幾多人會講,甜之後,或者甜之間,你都品味到人生中第一次苦。
 
第一次鬧交,第一次被迫做某啲事,第一次冷戰,第一次講分手,全部都係第一次,亦係初戀特產品。
 
你會發現,人生多咗一個人,原來唔一定係開心,每個人都會有忍耐值,而忍耐值點計,就係睇你有幾喜歡呢個人,上面提到,好多初戀都係暗戀副產品,佢唔係你最鐘意嘅人,只不過係最易得手嘅人,所以你忍耐值終有一日會爆發。
 
有幾多人真係可以初戀就一世?幸運兒不多,係嘅要珍惜,但無咁好彩嘅我哋,初戀笑過、喊過之後,再次回歸單身,然後就忘記初戀嘅甜,只留下苦,你下定決心之後要搵個開心嘅人一齊,物色一個可以只有甜沒有苦嘅另一半。
 
到多年之後,你有返咁上下年紀,你先會回想起初戀嘅甜,當年大家都只係為愛情而一齊,無現實、無妥協、無物質、無計算,雖然未必開心,但大家都係拎個心出嚟,呢份初戀,你唔會再搵到。
 
蔣薇
www.fb.com/maydreaming
IG:maydreaming1123

Read More
2019年09月27日

《男人戀愛五部曲--暗戀》

2019_09_27_May MenClub
 
網上資料圖片
 
有人話,初戀無限好,但比起初戀,第一次嘅暗戀更令人刻骨銘心,往往暗戀都會發生喺學生時代,喺著住校服嘅青澀歲月。
 
第一次被異性吸引,喺電影、小說被戀愛故事所影響,你會嚮往一場驚天動地嘅戀情,但你會感到無從入手,只可以遠遠咁遙望住呢個人,靜靜地等待戲劇性一刻。
 
暗戀之所以令人回味,係因為時間拉得好長,或者係三五年,甚至係十年八年嘅暗戀,你會將遊戲入面女角名改做佢個名,你會偷偷印佢嘅相放喺銀包深處,你會默默睇佢社交平台更新,你希望知道佢嘅一切,從中你盼望可以搵到自己嘅一個席位。
 
有一次你不經意同自己兄弟、朋友、同學透露出自己嘅暗戀,大嘴巴嘅佢哋當然唔會放過呢個機會,好快全世界都會知道你暗戀佢,有時講起,佢會扮聽唔到,亦會扮無嘢,同你好似正常交流咁。你覺得好驚,怕自己被拒絕,結果好似無事咁,然後每次被人講起呢件事時,你都會暗暗開心,甚至瞓唔著。
 
終於,有好事之徒約唱K,約睇戲,將你同佢拉埋一齊,第一次出街,你扮晒係同兄弟講嘢,而佢亦只同姐妹們傾計,但你亦好留意佢一舉一動,搵緊一個機會同佢傾計。
 
年少無知嘅自己,連接近佢都會覺得有種窒息感,好想扮無嘢,問起你都會話唔係,仲特登迴避,真係可以話係少年太年輕了,比著三十歲嘅你睇返,你會覺得直接約、直接講就搞掂啦,但亦正因為咁,先係青春,先係暗戀,可能睇得太多狗血電影令你覺得欠缺儀式感嘅戀愛無價值。
 
升班,升學,每日朝夕相對嘅時間終有結束,你會諗,不如喺最後一日表白,只係諗,因為到時你都係無膽講出呢句說話。
 
呢段暗戀,亦隨住大家各散東西而結束。
 
多年之後你再次見返呢個人,可能係十年、廿年之後,大家已經各有生活、情人、家室、子女,你已經可以好灑脫咁講。
 
「你知唔知我當年鍾意你?」
「知,但你當年無講出口。」
「無辦法,年少無知嘛,哈哈。」
「如果你當年講咗,你估我哋會唔會一齊呢?」
「如果講咗,今日我哋個仔同女叫咩名我都諗好咗喇!」
「你同當年一樣咁低能!」
 
兩個人,重溫暗戀嘅感覺,完場之後,各自歸家,或者當晚會發一個如果嘅夢。
 
蔣薇
www.fb.com/maydreaming
IG:maydreaming1123

Read More
2019年09月20日

《如何令男女朋友開心》

alone
 
網上資料圖片
 
網上流傳一個笑話,要令女朋友開心,你需要陪佢食好西、陪佢行街買嘢、陪佢睇戲煲劇等等,總之就有你有我有情有天有海有義;而要令男朋友開心就簡單得多,就係唔管佢做乜由佢自己一個。
 
有朋友提出一個問題,究竟點先為之係休息,同伴侶出去玩算唔算休息,男女答案好唔同,女嘅覺得係,男嘅就覺得唔係,有時陪女仲攰過返工。
 
男同女嘅興趣真係好唔同,你有幾可聽到一件事係兩個人都好喜歡?
 
用睇戲做例子,商業片其實都幾對大家口味,男女都照殺,但如果係另類少少嘅就已經有喜好不同,一個好想睇,一個無乜特別,咁唯有就係陪你去睇,嗱,我就無乜興趣,不過可以陪你嘅。
 
好似之前套獅子王咁,我好眼瞓,入場之後真係有好多次唔小心瞓咗,然後就俾人話我唔專心睇戲,唔認真陪佢咁,之但係獅子王我細細個就睇過,真人版又無乜劇情嘅唔同,睇住假嘅獅子同動物,我真係睇個特效咋,叫我點投入呢?
 
戲都算,劇先出事,男女睇劇真係勁唔同,好似之前好紅嘅後宮劇,六七十集,我真係唔明呢種宮廷戲有乜咁好睇,仲要拉到咁長……但女仔就會睇到喊出嚟;反之有時上新動畫,我睇,佢又真係無興趣喎,睇波又無、睇新聞都會覺得煩。
 
兩個人係一齊,第一件事就係了解對方,慢慢進入大家嘅世界,我進入你,你又進入我,幾動人呢!
 
但相處得耐了解得耐,就會發現始終係兩個人,大家有唔同愛好,點解要迫對方一齊做?
 
女人想大家世界一致,佢就會強迫你接受佢嘅世界,大佬啊,咁唔係進入,而係改變另一個人變成你想要嘅模樣。
 
男人就簡單得多,好明白我喜歡嘅你唔一定喜歡,就算幾好嘅兄弟都會有唔同興趣,大家開心就一齊玩,唔開心就分開玩。
 
女人世界就係,做得密友的話,大家就要一齊嘻嘻哈哈,呢種就係女人嘅世界。
 
相處係種藝術,如果你認定係一生一世嘅人,時間仲有好長,好多嘢唔需要一下子做晒。
 
無一個人嘅時間,又點會明有人喺身邊嘅好呢?
 
蔣薇
www.fb.com/maydreaming
IG:maydreaming1123

Read More
2019年09月13日

《現代的婚前性行為》

2019_09_13_May MenClub
 
網上資料圖片
 
一生只愛一愛,將第一次留給和你共渡一輩子的人,有一種忠誠同貞潔嘅感覺,試諗吓今日要搵處男處女分分鐘要係初中先有,實在係難能可貴啊。
 
但事實上,今時今日呢種想法到底可唔可行呢?
 
有朋友佢真係初戀走完八年結婚,結婚都已經兩年,係旁人眼中係一對模範夫妻,但有一次同佢飲酒飲到醉醉地先知,原來佢並唔幸福,因為佢發現兩人性方面唔協調嘅情況已經去到不可收拾嘅地步。
 
「八年啊,我足足等咗八年,每一次都話要尊重,要等,要忍耐,我等咗喇,結婚當日我真係幾攰都堅持要洞房,但你知唔知當晚我滿心期待,紮咗一星期炮唔打飛機得到嘅係一句好攰,遲少少先。OK,八年我唔差在八年加一日,第二晚我哋嘗試,又話痛又話唔鐘意,我足足等咗一星期先勉強體驗過性嘅感覺。
 
有人話第一次係麻煩,但之後會好,我唔覺囉,每次我一講佢就好迴避咁,又話做嘢又話夜又話無感覺,我唔耐煩講多幾句就會發脾氣,跟住成個星期就明正言順話我唔好迫佢。
 
呢兩年,你知唔知我只係試過十五次,每次我都有數住,如果我仲有三十年命的話,我預計我只有唔到二百次性生活,仲係未計我同佢年紀大唔想做!」
 
「一早叫你正正經經叫隻雞啦!」
 
「我二十二歲嗰陣你講到依家,我唔想依家先破戒囉!每次我都諗,點解我自己有老婆仲要叫雞?我有同佢商量過,佢次次都含糊以對,提出問題,而我係男人我當然信,佢話我唔夠大隻我去操,佢話無mood我放埋音樂點埋香薰,佢話攰我搵長假期先做,但結果係乜?佢話我太大,會痛會唔舒服,我屌啊!我太大唔通去切咩?何況我自問唔係連登仔,講藉口都搵個好少少啊!」
 
「唔滿意嘅咪離婚囉!」
 
「離婚?我真係有衝動啊!但我覺得因為性生活而離婚好肉酸,實俾人講,喂大佬啊,我自問無錯啊!」
 
「一早叫你你正正經經叫隻雞啦!」
 
「叫咗就係我錯喇喎!我話去睇醫生,佢又話我痴線,我直頭諗如果早知你係咁,我就唔結婚啦!有人話結婚唔單單係為性,咁同班為咗狗仔聽話而閹咗佢嘅人有乜分別,人無話乜嘢係唔得,閹人都可以生活,但佢生命就少咗一部份,我唔甘心囉!」
 
「唔滿意嘅咪離婚囉!」
 
「喂,係唔係得呢兩句,一係叫雞一係離婚啊!俾少少新意好唔好?」
 
「你可以兩樣同時做!」
 
「無解決方法咩?」
 
「你覺得有幾多人真係肯去為性而改變,同埋直接面對性問題?大家都係得過且過,避而不見啦!玩完喇你!你再同佢講都無用,佢唔會變,咁不如你自己變,正正經經去叫隻雞啦!」
 
睇完呢個故事,忠貞嘅人落得一個咁嘅下場,你覺得公平咩?
 
蔣薇
www.fb.com/maydreaming
IG:maydreaming1123

Read More