2019年09月09日

《怕蝕,咪唔好蝕》

0909 May menclub
 
網上資料圖片
 
喺情侶關係入面,通常都離唔開性,今時今日要搵處,應該要小學先有,性係兩性關係入面十分常見,但常見就會衍生問題,兩性性關係總係充滿問題。
 
仲記得當年買《Yes!》會有個性關係專家Miss Sex,曾經唔少少男睇嗰幾百字產生好多性幻想,今日我哋唔再對性知識陌生,因為網上要搵真係多到數唔晒,可惜,亦因為咁而產生好多矛盾。
 
朋友A有個穩定女友,大家都係成年人,亦唔細喇,一齊當然會有性生活,但朋友佢面臨一個問題,就係要又求又氹先會得到一次quota,兄弟們一聽,咩料啊?quota?駛唔駛填form啊?急就填紅色,唔急就填藍色,有特別要求就要加紙補充咁啊?
 
但佢就係咁慘,真係被限了次數,唔好意思,應該話仲要睇心情,交咗form都唔一定批。
 
有時朋友佢想傾吓呢個問題,就會講你咁不滿可以唔做喎,吓?咁同你唔滿意可以移民喎有咩分別?
 
如果性愛都有五大訴求的話,朋友就好似面對政府咁,無一回應,你鬧事就仲大鑊,會受到不同程度的制裁,如果一段男女關係去到咁唔平等的話,真係好大鑊。
 
有好多女人都會覺得,一講到性就係蝕,做就係益你,大佬啊,咩年代啊,講咁耐男女平等,點解會有一方係蝕?你開心時我開心,大家係雙贏喎!
 
事實係男女關係從不平等,蝕咪唔好做,知唔知有幾多人因為呢句真係嬲嬲地唔做咪唔做,最後兩邊冷戰到有心病,最後感情都出問題。
 
上網有個街訪問,點解男人唔拍拖,有人答得好正,如果你用一百蚊去買魚杆釣魚,你可能一條都釣唔到,但用一百蚊去買魚,你可以買到幾條。
 
明買明賣嘅係男人都知,但好多人放棄咗明買明賣,投身到釣魚行列入面,去追求一條魚,係,釣魚會有驚喜、有等待、有好奇、有耐性,比起一買一賣係有趣得多,亦有意思同意義得多,但問題係,一個人佢需要食魚,如果長期投入但一條魚都釣唔到會點?會餓死!
 
蔣薇
www.fb.com/maydreaming
IG:maydreaming1123

Read More
2019年08月30日

《男女攻防戰》

P171112-2-780x405
 
網上資料圖片
 
最近一次兄弟聚會入面,我提出一個問題:「如果有日兄弟女朋友或者老婆打電話過嚟話,阿邊個之前話同你出咗去,依家電話打唔通,你叫佢聽電話,咁你點算?」
 
作為兄弟嘅,都係講義氣,有乜嘢事都要幫手隱瞞,大家都講出唔同答案,例如:
 
「哦,佢啱啱唔係好舒服,走咗喇!」
「佢飲大咗,我叫叫佢打返比你!」
「係廁所喎,等等!」
 
我相信大部份男人都會明,明知兄弟無搵自己,但佢竟然借你打助攻,肯定係有不可告人秘密,點都要頂住先!呢份兄弟情,我諗大家都義無反顧!
 
但我即時同兄弟講,千祈唔好!因為最近網上女人流行玩一招測試,就係明明男友係身邊,但亦扮晒嘢咁去問佢班兄弟同一個問題,你一幫佢,就陷佢於水深火熱!
 
我知,呢種釣魚執法係唔可取,更有極大道德問題,但同女人講道理都無用,如果真係發生咁點算?
 
其中一個理智嘅老司機講,呢個係資訊唔流通嘅一個問題,好似打波咁,你真係要人助攻,你要叫啊,波!!!咁人哋先識傳比你,但如果你唔出聲,又要人助攻,點會明,明顯係兄弟之間嘅溝通問題。
 
假如每一次有人需要助攻,事先通知,其餘時間都如實通報,咁大家咪有多個準備,亦可以更有效處理問題。
 
咁多年來,兄弟私生活係點,大家都好了解,有時你講唔明佢,佢要點,你勸兩句咪算囉,再難睇,再令你失望,你都無可能通風報訊俾佢老婆女朋友聽大義滅親咩?
 
但問題係,作為兄弟,只想你聰明少少,玩得聰明,我都煩少好多,有好多時睇到佢無交帶又要玩,最後搵成班兄弟出嚟講一個集體大話拆彈,有意思咩?
 
當然,道高一呎,魔高一丈,一個大話好易拆,十幾個大話有邊個拆得到?唔通要講我手頭上無資料,我建議阿嫂你報警之類嘅說話咩?
 
唔想拆,唯一一個方法只係,安份守己,唔好做壞事。
 
呢個方法大家都知,但知同做係無任何關係嘅。
 
蔣薇
www.fb.com/maydreaming
IG:maydreaming1123

Read More
2019年08月24日

《二千個Double May》

unnamed
 
網上資料圖片
 
有日食飯聽到旁邊一對情侶本來好甜蜜,但突然女方睇到男方嘅ig之後突然就發作,我嘗試還原情境。
 
「點解你成個ig都係double may嘅?」
「吓……都唔係啊,我都有follow足球同賽車……」
「嗱,掃極都係嘅,喂!你follow二千幾個……」女方一路掃,一路個樣變臉……「我睇唔到咩足球同賽車喎!全部都係女,你係咪痴線㗎,你有幾喜歡睇女,你有幾咸濕先會follow成二千幾個女仔!!!!」
 
聽到呢句之後,我就知男方即將玩完,乜佢唔知ig可以開幾個account,一個睇自己朋友,一個專睇女咩?不過佢都衰咗,咁都無計,我決定扮睇電話繼續睇吓事態發展。
 
「我睇啫……又無對你唔住……」
「你睇得多就想偷食,我知我無波滿足唔到你,咁你出去搵第二個囉!」
「我無啊,真係睇吓咋……」
「你二千幾個日日睇,你會唔會性上癮啊,日有所思夜有所夢,你肯定會出去偷食!」
 
唔……雖然我唔明個邏輯喺邊度嚟,但我無可能幫佢口,唯有食住花生,最後個男仔喺女朋友嘅監督之下將所有follow都unfollow,你知唔知二千幾個unfollow要幾耐?我唔知,因為15分鐘之後我就走咗,而佢仲未unfollow完。
 
男人睇女,應該係本能,雖然二千幾個有少少過份,但有時儲儲吓就會有,因為ig你睇開乜佢就會「質」俾你,一變二二變三三變無限。
 
當晚我同我老婆講起呢件事,佢問,咁你又follow咗幾多個啊?又有幾想食大波妹啊。
 
我心諗,捉蟲了……
 
我唯有同佢講,其實睇吓就要食嘅就死啦,我睇金田一又想去殺人?我睇球賽又想落場踢咩?咁我睇新聞都會變義士啦!
 
再話,你睇吓你老公我咁嘅樣,咁嘅外表,加上我又窮又毒,你覺得會有女埋身嗎?我睇吓迪麗熱巴就有得食?傻啦,就算真係有,你都應該為我開心啦!我個人就係最好嘅保護同埋安全感!
 
佢聽完滿足咁點頭,然後話我都係幾安全嘅,同時間佢已經奪去咗我部電話打開咗我ig。
 
睇完一輪我問,我都無follow女仔,全部都係朋友,放心未?
 
佢無言以對之後哼咗一聲,將電話俾返我。
 
正如我之前所講,ig可以開second account,而我有冇,就唔知喇。
 
蔣薇
www.fb.com/maydreaming
IG:maydreaming1123

Read More
2019年08月16日

《從傳說對決說團隊關係》

2019_08_16_ May Menclub
網上資料圖片
 
MOBA係一種5v5嘅團隊遊戲,你可以集結五位朋友同對面決一死戰,亦可以一個人同四個陌生人組隊戰鬥,今日我想分享一下從遊戲中學到嘅團隊關係。
 
第一法則,你要接受一個隊伍入面有人會帶領勝利,亦好大機會隊友拖累團隊,正如我所講,每一隊有五個人,咁總會有分高低,有人強有人弱十隻手指有長短。隊友你唔知佢係邊個,有可能係四十歲大叔,亦有可能係中二小朋友,更有可能係女學生,你控制唔到同邊個一隊,但你嘅目的都係一樣,同呢四條粉皮打敗對面迎向勝利。
 
第二法則,分工需要清晰,一隊人入面,有坦克有法師有射手有戰士有刺客,每個角色都有長處,我最睇唔起就係一個刺客打到成績就埋怨隊友唔夠輸出,大佬啊,職業天生就有唔同位置,你要個坦克好似你咁強無意思喎,佢做到自己本份,保護好隊友就夠,有乜嘢好炫耀呢?唔好以為自己衝喺前面就特別有價值,後排有補血有支援都係無比重要,唔需要覺得自己高高在上。
 
第三法則,總有豬隊友,好多時一個唔留神就會有隊友被埋伏被捉死送頭,然後有人就會開始埋怨隊友拖累,朋友,人誰無過?佢都想贏,佢都想推塔,但能力唔夠又好,狀態唔好又好,網路唔好都好,唔小心死都唔想,比起你笑人打得廢、垃圾,倒不如教對方點做,不如出件防裝?唔好出塔等人支援先一齊上好唔好?咁打起碼你仲可以留到一個隊友,令佢有更好多發揮。我見唔少人鬧就開始嘈,嘈到咁上下就不合作、真送頭,甚至打字話比對方知自己動向,呢個時候鬧人嘅係有好大責任,因為你活生生咁將隊友推向對面。
 
第四法則,稱讚隊友,作為隊友,一齊打,你唔可以忽略對方心理,有時讚一句比起鬧十句更有用,有時一句,我們可以贏,比起六分投更有價值,唔好放棄隊友。作為一個路人,你同佢只會打一場,然後可能生死不相往來,輸一局唔係咩問題,但問題係你有機會贏啊,點解要輸?
 
遊戲又好,現實都好,點樣去處理一個團隊,首先要齊心,唔好分化、唔好指罵,聽吓隊友講,一齊行動齊上齊落,一齊去打好呢一局先係重點。
 
當你識得處理團隊關係,你離勝利就不遠了。
 
蔣薇
www.fb.com/maydreaming
IG:maydreaming1123

Read More
2019年08月09日

《情侶的囚徒困境》

2019_08_09_May MenClub
 
網上資料圖片
 
有冇聽過囚徒困境?係一種博奕理論,簡單講就係兩個犯人,分別喺兩間房比人迫供,如果兩個都唔認,咁大家都要坐半年,如果兩個都認,咁兩個都要坐五年,但若果係一個篤對方出嚟,另一個唔認的話,二五仔就會無事,而被出賣就要坐十年。
 
最好嘅做法當然係兩個都合作,但兩個人只需要自私的話就會出現唔好嘅結局。
 
情侶之間好多時都有唔少埋怨,然後愈鬧愈差,最後分手收場,其實都係一種囚徒困境嘅展示。
 
感情之中,總有一方係強勢一方係弱勢,就好似出賣對方嘅囚徒一樣,贏晒嘅點會唔做,可惜現實唔同理論,感情係一直進行中,即係每一日都可以係一個新嘅囚徒困境,你可唔可以保證到次次都係贏家?
 
有邊個想次次都輸?愛情唔可以用理智去判斷,所以唔可以應用太多,特別係熱戀,大家都會吞聲忍氣,因為有愛嘛,愛可以戰勝一切,可以令人忍耐,但你要知道,愛都會被消磨,你每一次贏,對方每一次輸,都係一種磨滅愛嘅行為,當佢無愛或者無咁愛時,就會反擊,你出賣我,咁我都出賣你喇。
 
情況就係有日你發覺佢終於同你頂嘴,終於唔聽你講,然後會點?大鑊囉,冷戰又好,嘈交都好,兩個人都輸,兩個人都唔會開心,就好似兩個互相出賣嘅囚徒一樣,無好結果。
 
成日聽人講,對方對你點點點差,咁我又想問,你又對人有幾好先?
 
想人送禮物比你,咁點解你又唔送先啊?想人對你好,點解你又唔對人好先?想人體貼你,你咪體貼人先囉。
 
情侶之間,凡事由自己做先,自己先付出,後收獲,等對方感受到你嘅好,佢自然會覺得要對你好(當然如果佢係仆街的話就分手啦)。
 
其實感情可以好簡單,有朋友成日話想結婚,但又成日分手,佢會話對方對自己都唔係咁好,想揀第二個,但從來唔睇自己做咗乜,我直接同佢講,你想結婚好簡單,你對佢好到佢覺得唔娶你係一種遺憾的話,咁佢咪會行動囉,但如果平時你對佢不滿,又奉旨咁款,仲結婚?分手吧!
 
如果你明的話,試下今日開始對佢好,你終會得到更多。
 
蔣薇
www.fb.com/maydreaming
IG:maydreaming1123

Read More