2018年10月20日

一命二運三風水

隔離生產線上粉面紅卜卜的Ghibli佳人,我估佢將會是個備受呵護的二奶了。而我,我希望我的主人粗豪有型,會待我如好兄弟,大家一起上山看海追索女,咆哮呼油見車過車。

個天可能真係唔鍾意我,我主子竟然是個靚太, 我認命了,日夜龜速上落半山,無風無浪又一年,當我正又悶到發牛痘的時候,咦,對頭線咪係Ghibli佳人,喂我想同佢打個朝呼咋喎,佢竟然一野錫落黎,頂,我主子邊比得切反應吖,我地個頭,激咀到扁哂!

等緊亞sir 時大家頭貼頭尷尷尬尬咁我咪Gentleman 啲,問候下Ghibli 近況,點知佢一開口就喊,話佢主子(小鮮肉一件)成日將佢踩到盡,見壆過壆,見窿過窿,永不收油,一係一收就dup 到應,重要唔捨得買靚鞋比佢,淨係識得要佢洗白白見人,佢話自己要墮嘅都墮墮地,要鬆嘅都鬆哂喇,重成日比主子嫌佢嘈……

阿sir 來到我們要分開了,我輕輕安慰佢幾句後也無言了。

我靚太主子話明天同我去車房整番靚個頭,不如順便全身檢查check 埋其他嘢,以前我會嫌d女人真麻煩,以後我會感恩有愛惜我的主人,我會健康長命地跟著主子喔。

(以上故事梗係虛構啦)

但大家係怪責自己架車成日要整,成日爆呔之前,不如諗下你部車條命在你手,有冇啲駕駛壞習慣自己未改正呢,例如:

-          衝過減速壆不收油

-          衝過氹或窿不收油

-          好日唔洗車洗鈴,一洗就用d強力清潔劑「拿」,重要唔徹底沖乾淨

-          成日以為d 呔重有紋就唔使換,其實過左安全mark的呔去水功能已經不夠,加埋濕地已經夠令部車跣呔或大失制動功能

-          入窄灣唔偷位,好易刮花裙邊同鈴邊

-          偈油,波箱油,迫力油,迫力皮,水箱水等唔定期檢查更換

-          著鴛鴦鞋(呔),叫車車點行得好

暫時講著咁多先,諗到其他再加。

外邊有紋其實入面已經蝕哂

外邊有紋其實入面已經蝕哂

Read More
2019年02月16日

量力而為

渣打馬拉松就到,近來常聽到專家學者們提大家「量力而為」。大家其實有冇真正行量過下自己的能力?跑之前有冇?平日洗錢時有冇?揸車時有冇?

你估下比對白飯魚給非洲跑手,非洲跑手會唔會跑得慢過你著對千幾蚊曉飛起幾%的勁鞋?不過自量的跑手很多,我暫時都未聽過有人賴對鞋令佢跑得慢左。

同樣揸車時要量自己嘅力,

亦要量埋自己架車嘅力。

比你揸到架車馬力大扭力夠,呔又闊又咬地都好,都唔代表唔會跣呔,點解呢!

因為入灣角度,速度,出灣比油的力度時間配合得唔好的話,做錯揸車程序,比條F1方程式落場呔你都咬唔實撻地跣左出跑道草地或沙池。

其實車呔同你依家着緊對鞋都差唔多,有平有貴,如果你平時有做開運動,有反應和平衡力,等如揸車時有留意吓架車,遇到行街時跣腳或行車時跣呔都可以即時平衡返,唔會跣襯!

你同自己架車溝通良好,明白及發揮到架車同呔的極限,咁就算不是最頂級型號的呔,都可以不論乾濕地都發揮得最好。

我的責任是為你的坐駕配上最合適的呔,但千祈唔好問我「會唔會跣呔?」

呢個問題問你自己先會更加安全,明白未?

 

順便為明天有做好準備的跑手打氣加油!

祝跑出自己的理想時間!祝PB達成!

 

Q&W_43

Read More
2019年01月24日

「我要改裝改到原裝咁!」

 

之前八掛新聞咁啱圍繞P圖改樣的情況,有位美女明星網上直播被改樣,

又有明星被懷疑改到變膠樣但堅稱自己保養得好咋。網上被改圖好簡單鋪番張原圖就得,但如果真係整過樣就好難還原了,前後10年圖對比一出大家就清楚哂!

而車改裝更加好玩,有外貌協會主打改包圍避震呔鈴,有力量協會専改引擎排氣…..等等。

 

我遇過最難處理的要求,可以話好似哲學題咁難。

 

明明架七人車原裝行18吋鈴呔用235/50/18,想改大19寸鈴時個offset又唔同左咁,呔要改行245/45/19呔(以上d數字唔熟悉呔鈴真係唔明)。簡單d講,鈴大左,呔要薄啲先可以維持番個總直徑,應該唔難明吖。但客人係都話要跟番原廠設定,咁19寸鈴行235成個轆咪細左縮入左架車,咪唔靚囉。

 

講極都唔明,改裝係唔可以同原裝一樣,最後唯有問佢如果整容,整完同而家一樣咁樣原裝樣,咁做咩要整呢?

 

哈哈佢竟然明喎!笑左!

 

所以原裝就是原裝:看到清純簡潔平平

改裝就是創新大膽:嘗試明天更一進步

沒有嘗試貼近極限去改裝,就沒有更新科技去改裝(以上改裝精粹純屬個人意見)

upgraded

Read More
2018年12月20日

各花入各眼

發洩文,慎入!

由於工作上經常涉及顏色,為求準確,一般會有3個做法:
1. 請客人來店看實辦
2. 請客人提供車身顏色編碼
3. 請客人提供實物色辦

我們收過很有個人風格的色辦包括:一樽黃色芥辣及一支指甲油。

這些我們都會盡最大努力做到準確的配色。

然而,如果那個顏色放在一隻合金鈴上未必好看的話,我們都會婉轉地告訴客人,這顏色沒有人做過架喎,配襯出來的效果可能未如預期 bla bla bla……正如很多女生喜歡粉紅色,但粉紅色車身未必會如預期般可愛….

選擇婉轉是因為有些客人真的非常喜歡某個顔色,他真的喜歡任何這個顔色的事物,所以我實在不想以批評的角度去看待。

但如果提左,客人都堅持的話,咁我又冇理由同錢作對吖….就只有一次,個客要做個好特別的暗綠色,提左,堅持,咁正常做喇,到交貨一刻佢大聲話乜咁醜樣架,你重咩唔提我,你地一啲都唔専業….下刪千字投訴。

嗰刻我忽然間醒覺喇,我知d零售連鎖店的單為什麼咁輪大張咁輪多字了。
我都要加條terms :個顔色我自己揀嘅,好醜都與人無尤,我唔會唔比錢要人噴多次…

香港人人份人工都係好努力的回報,工時長,保障少,使錢使得謹慎好正常,但如果人人一消費就大爺上身,搞到相方都勞氣,何必呢!

 

8845425115166

Read More
2018年11月29日

由冇到有到好多

不知道大家對輪胎店的記憶是由什麼時候開始的呢?我兒時看到街上和汽車相關的店只有維修的,店內燈光昏暗,地上黑黑的鋪滿油污,記憶中當時並未有很多輪胎店的。

 

直到大約80年代頭,才開始有輪胎店,但主要是換呔為主的。當時的私家車,多數配備的輪圈(鈴)都是鐵造,沒有特別款式的,想要擁有自己的風格,只可選擇更換鈴面的「罩」,那是一塊好像美國隊長塊盾牌的東西,上面有不同的圖案設計,給車主提供一點點獨特性。

 

到80年代中後期,歐洲車多配上款式更型格的合金鈴,日本車則仍然使用鐵鈴,所以當時的台灣及日本合金鈴廠商便開始大量生產給日本車改裝用的合金鈴,加上當時香港經濟一直向好,市面大量新車大賣,輪胎店也相應越開越多了。

 

年紀輕輕的我當時正被不同靚車迷倒,加上機缘便進入了呔鈴這行業,每日被客人的靚車及不同款式和産地的呔鈴包圍住,瘋狂吸收相關的訊息,樂在其中,最享受幫老闆拆貨櫃,執倉,搶先欣賞到不同的靚鈴。

 

當時老闆的生意真的很好,很多熟客,他們等待時也會和我傾談,常常聽到他們訴說自己揸車不小心刮花了寶貝的新鈴,我便試著幫手把刮花的地方修補一下,工夫便一點一滴地累積起來。

 

時至今日,這行業越來越蓬勃,同時亦希望透過分享令大家對我們的工作多一點認識,多一點認同,令呔鈴店的專業形象有所提升。

 

InkedWhatsApp Image 2018-11-29 at 1.46.31 PM_LI

Read More
2018年11月15日

母親不再説母語

在街上在公司見過不只一次這種家庭,老豆同老母之間講廣東話,但老豆同囝囡,老母同囝囡都唔講廣東話,重要見佢地分好工的,一個負責講英文,一個負責講普通話。我家老虎超mean,成日笑人地用英文叫個細路 “walk slowly” “sit properly” “speak quietly” ….

 

老虎自己都係香港成長的,講開港式英語,佢自知如果唔係有兩個混血兒甥,一去美國探親就幾個月,都唔知原來英語日常語會講 “slow down please” “sit on your bottom please” 同 “inside voice please”

佢mean 那些「外語父母」自己都唔肯定啱的都夠膽死用來教自己的孩子,事倍功半。

 

我英文能力近乎零,唔評論咁樣對孩子嘅語言能力有冇幫助,只是很可惜現今的孩子連母語都冇機會去認識。好記得兒時暑假跟父母返鄕下潮州,一玩成個月,潮州話講得唔流利都起碼聽得明,鄕下老表們想恰我都冇咁易;啲地道食物名古怪極都重記得點講,有時候經過九龍城買啲番屋企都氹到老媽子架。

 

我身邊在外國生活的朋友,反而很努力和孩子用母語交談,不少孩子除了在學校講英文,另外再學多一個語言,回家講廣東話,假日見到祖父母講鄉下話(上海、台山、潮州⋯⋯⋯)孩子都是不停從日常生活中學習,教的人就是很輕鬆自在地說自己的母語,孩子亦很自然地學,語言是用來溝通的,這樣不才是最好嗎?

shutterstock_1012146889-s

Read More