2020年07月17日

男人的Fantasy (二八二)真正避疫

2020_07_17_Sit Menclub. CK TSUI
 
圖片來源: CK TSUI
 
完全估唔到,呢個疫情由年頭玩到年中,睇個樣分分鐘去到年尾。
 
我哋呢一代人,聽到疫情出現,頭幾秒可能會驚一驚,但轉個頭又帶住「心存僥倖」嘅心態繼續生活,儘管可能已經減少咗,但係好多「必要」要出嘅街,我哋依舊勇者無懼咁走出去。
 
不過隨住近來嘅再一波爆發,我同我細佬住嘅屋邨都有確診,我又耐唔耐有少少喉嚨痛出現吓,都係要將自己隔一隔,唔可以再「心存僥倖」。
 
我自己一個住,呢種單獨隔離比較有好處,因為只係我一個人唔好出街唔好返工就可以,基於我本來就唔使返工,所以我只要搞掂自己三餐同孤獨,呢個自我隔離都唔算太辛苦。
 
其實呢個時刻嘅香港,真係幾十年都唔逢一次,喺我人生中可以陪住香港經歷呢種變化,都想好好咁記錄低佢,第時國泰民安時,都可以拎出嚟同啲孫講,你睇吓你阿爺嗰時,幾咁生人唔生膽。
 
首先係三餐問題,呢段時間我嘅廚藝真係唔講得笑,進步之快連我自己都覺得驚訝,特別係煮呢個「蕃茄炒蛋」,我夠膽講已經係去到專業水準,好多人話有幾難,我警告你呀細路,唔好落茄膏呀,一落咗就即係承認自己搞唔掂嗰幾個蕃茄,承認你自己嘅能力唔可以令到佢哋發光發熱,要靠啲外來嘅化學嘢。
 
第二味餸就係梅子蒸豬肉,呢個餸又係要拿捏得好好,如果唔係一係太酸一係太甜,比例一定要啱啱好,咁樣先叫成功。
 
就係咁,「蕃茄炒蛋」同「梅子豬肉」就好似黃子華嘅阿強同佢阿爺咁,長伴住我呢段時間左右,好在我係金牛座,我中意食一樣嘢係可以食廿年,如果無人攔住我,我係食到死嗰日都得的。
 
但另一樣要處理嘅,係孤獨,經常一個人生活,自由嘅副作用就係孤獨,無錯你可以打電話,又可以WhatsApp,但始終其他人唔係同你生活,佢哋唔會同你同步,就算你用電話搵到佢哋,佢哋可以俾你嘅就只有係陪伴,而唔係同步。
 
人之所有要同人生活,就係追求呢種同步嘅感覺,有時可能唔使傾偈,都可以得到一份安全感。
 
而暫時都係獨居嘅我,搵唔到同我同步嘅人,長時間呢啲生活可能會令人胡思亂想,不過普通人胡思亂想可能唔好,但對一個作家嚟講,胡思亂想絕對係一個刺激靈感嘅好機會。
 
我希望,可以藉住呢個避疫假期,落實去寫一個故事出嚟,如果成功嘅話,都可以喺呢啲壞事入面嘅一個小快樂。
 
薛可正Facebook Page
http://www.facebook.com/sithoching
IG:sithoching

Read More
2020年07月04日

男人的Fantasy (二八一)利記登頂

C9E143E4-3C25-4764-9563-F663CF24ECB8-scaled
 
網上資料圖片
 
單單係諗個題,我呢個二十六年利迷都已經諗咗好耐。利物浦終於一搔三十年之癢,喺呢個全世界都仲戴緊口罩加無球迷入場嘅情況下,首次拎到球隊第一個英超冠軍,如果你問我呢個利迷心情,開心係必然,但如果加多少少層次嘅話,我更希望呢個世界會變返愈來愈好,喺度祝願香港同大家都一切安好。
 
不過要講嘅始終都係要講,疫情停賽期間,曾經都有好多傳言,今年英超會腰斬,大家都一齊無冠軍拎。如果你問我當時驚唔驚,我覺得時也命也,個世界都可以亂到咁,利記又點解唔可以放到入口嘅冠軍都跌返出嚟?
 
英超史上好似無一隊球隊可以咁樣放離第二位球隊咁多分,我哋利迷見到高普帶到利物浦到呢個程度,其實已經好感謝,歷時五年,由一隊列強入面毫不起眼嘅傳統球隊,變成今日呢隊英超一哥,原來人世間好事壞事都會突然來到,諗都諗唔到。
 
經歷過05年歐聯決賽同早幾年謝拉特跣腳,我老早就做好「命裡有時」嘅打算,由第一眼見到科拿同麥馬拿文,去到今時今日嘅費明奴沙拿,利記就好似我生命入面嘅一部份,有時我會好似身邊人咁唔記得咗,會唔記得睇波,唔記得我哋排第幾位,我從來都唔係一個熱情嘅球迷,但我非常將佢哋放喺心入面,永遠同佢哋一齊同行。
 
有好多人話,今年利記勁過死敵曼聯好多,其實呢一點我有失落,細個睇波時曼聯拎住七小福無可否認係勁少少,但我哋一班Spicy Boys好多時都可以打到勢均力敵,雙方就好似兩股勢力咁,一年兩度雙紅大戰,呢啲大戰好多時都係會變成朋友間一件盛事,大家鬥吓咀一齊睇吓波,足球本來就係娛樂,佢應該要煥發嘅意義本來就係要令大家都開心。
 
可惜到今時今日,曼聯由費格遜走咗之後,的確係盛世沒落,無論係邊一個去教,最後都係事倍功半,令到雙紅會呢一啲值得大家坐埋一齊睇嘅比賽,都好似變得了無意義。
 
今年嘅比賽都大約告一段落,至於可唔可以破分數去完成整個球季,於我來講都無咩大意義,我好希望利記可以襯住呢個開始,好好打開利物浦嘅盛世,雖然你咩成績我都會一直支持,但耐唔耐威吓,我都覺得幾開心,哈哈。
 
薛可正Facebook Page
http://www.facebook.com/sithoching
IG:sithoching

Read More
2020年06月18日

男人的Fantasy (二八十)朋友

images
 
網上資料圖片
 
今日講吓朋友。
 
我相信友情,但我唔相信一帆風順嘅友情,自細我就有一個好古怪嘅觀念,無鬧過大交嘅友情,一般都唔可以走到尾。只不過友情唔同愛情,愛情好多時散聚都會有個記憶點,而友情呢,係隨時都可以無聲無息咁消失喺我哋生命入面,連我哋自己都可能會唔記得,佢曾經存在過。
 
我朋友好多,自細就係出名世界仔,如果我狀態夠好,基本上係可以同任何人拉朋結友。不過年紀大咗,能力亦都大咗,自然要好好處理自己朋友圈子,能力大咗呢句說話唔係驕傲,而係就算你同年經時有同樣嘅能力,因為你本身時間已經慢慢相對減少咗,按比例你係應該留返多啲時間俾身邊值得嘅人,咁樣先係最大嘅時間運用性價比。
 
做我朋友好簡單,真誠同唔好入侵我世界就得。我世界當中包括好多,可能係我處理事物手法,又可能係我情緒,一般普通朋友我都幾相敬如賓,但個別親到無得再親嘅朋友我又毫無底線,只要佢哋願意,係可以隨時走入嚟破壞我嘅情緒又或是世界。
 
呢一種朋友,多數都同我經歷過鬧交,而且係鬧大交。
 
愛情同友情一樣,成日保持住個客氣樣,一去到真實一面時好多人都會受唔到。鬧大交有咩用,作用就係俾你知道對方人性黑暗面可以去到邊一個位,大家易來易去,以後就好相處,就好似兩夫妻我連你抿屎同換M巾個樣都睇過,我仲有咩接受唔到妳?
 
友情都係歷練,過唔到就會自然淘汰,一世人流流長幾十年,人來人往,你永遠唔會知道眼前嘅人係咪真係真正嘅一位。
 
除咗呢幾樣之外,仲有一樣我亦好重視,就係唔好背叛。
 
我係接受到人性黑暗,如果我送一樣禮物俾你,你無錢使要將呢件禮物賣咗佢都好,只要你同我講一聲我就應該唔會嬲你,但如果你一句都唔講,最後我喺另一個途徑見到呢份禮物已經俾你賣走咗,呢條刺就會跟我一世,我哋嘅歷練亦都唔通過,最多都只會係普通朋友。
 
不過上面所講嘅都未算係背叛,真正嘅背叛係你喺其他人面前講我唔緊要,但唔可以用我去換所有嘅好處,就算係為咗存在感而拎我嚟講笑,我都係唔可以原諒。個世界咁大,你有咁多嘢可以講,如果你揀咗用我做話題,呢個其實已經係你一個選擇。
 
做我朋友唔難,我亦唔係一個好好嘅人,不過每個人對每一件事都要有線,如果無呢條線,任何人喺你眼中都係工具,所有嘅事物同關係都係基於利益,咁你只係一個唔配有朋友嘅契弟。
 
薛可正Facebook Page
http://www.facebook.com/sithoching
IG:sithoching

Read More
2020年06月10日

男人的Fantasy (二七九)契弟

2020_06_10_ Sit menclub
 
網上資料圖片
 
契弟呢一類生物,喺我哋朋友圈子入面,就好似一部機械嘅小鏍絲,必定而且必需存在。你可能會好討厭呢一類人,但契弟之所以必定要存在,就係要提醒你,呢一世都唔可以做任何人心目中嘅「契弟」。
 
世界上每一樣事物嘅出現都必定有原因,只係睇我哋點樣去詮釋呢一樣嘢。我唔中意食苦,但食過先知甜味係正嘢;我唔中意契弟,但你見識過,先知身邊其他朋友有幾可貴。
 
契弟一般有幾個性格,主要成份大概係「認叻」同「謙虛」,係咪好出奇呢兩樣咁極端嘅嘢會放埋一齊,其實使用方法就係契弟會話俾你知佢乜嘢都識,「打架飛機落嚟得唔得呀?」「得」、「古天樂個電話你有冇呀?」「點會無呀?」,因為契弟一般都係無料,所以呢啲認屎認屁嘅做法係令人最快睇得起佢,之但係嗰啲嘢佢本來就唔係好識,所以得到其他人初步信任之後,就係佢帶頭盔嘅時候:
 
「喇阿正我同你一場兄弟,問心我一定盡力打,但打唔打到架飛機落嚟我唔敢講到咁死。」
「古仔電話我一定有,但呢幾年無咩搵唔知有冇轉,你知啦有時朋友嘅嘢就算識都唔使周圍講。」
 
放心啦,最後都係咩都無。
 
契弟多數都係用呢啲手法去走入唔同圈子,同甲乙丙丁都混熟啲,聽到甲想搵乙嗰時就行出嚟拍心口幫手介紹,到乙同阿丁一齊飲嘢時又講下丙嘅壞話,下個星期見到丙又同佢講,阿乙同丁上個星期先話你陪老闆去咗歐洲兩個星期呀。
 
如是者左右互搏,呢三幾招反覆使用,只要面皮夠厚,呢一種契弟就好似當年做倫敦金咁,呃完一班又一班,舊嗰班發覺你係契弟嘅身份咩,唔緊要再搵新入行嘅朋友,重覆講一大堆明明係假嘅但連自己都信埋嘅說話,再遊走於「我見係你先講咋」、「我唔信你信邊個丫」同「問心丫同你都算係朋友,想提你少少嘢…」呢幾款貼心開場白,發達就一定無份,總可以喺呢個圈子入面搵到一定存在感。
 
可能有啲人問,咁呢啲契弟成世人都咁樣為乜?其實無,唔好忘記本身最大嘅技能係「面皮厚」同埋啲尊嚴可以隨時收埋,所以佢本身就唔會有太大嘅成就,同啲名人影吓相食吓飯再Post上Facebook已經係佢哋高峰。如果佢厚面皮加有才能嘅,一早做咗生意啦,使咩日日喺度諗要同甲講阿乙定阿丁嘅是非好。
 
契弟攻略講之不盡,但篇幅有限,下回分解。
 
薛可正Facebook Page
http://www.facebook.com/sithoching
IG:sithoching

Read More
2020年05月26日

男人的Fantasy (二七八) 行一次善舉

0526_Sit Menclub_photo 1
 
0526_Sit Menclub_photo 2
 
武漢肺炎已經影響全球幾個月,呢幾個月大家嘅改變都好大,其中一樣就你同口罩相依為命嘅情況。
 
由一月時口罩嘅大炒賣,去到近一個月口罩供量已經有一定嘅數目,市面上搶口罩又或是無良藥房門口大大隻字寫住「口罩一盒$238蚊」嘅情況已經幾近消失,對於大部份市民嚟講問題已經解決,但對於社會上一啲小眾人口來講,問題依然存在。
 
我住喺一個公共屋邨,經常都會見到好多老人家都無口罩,有啲會用廁紙加一條橡筋去DIY,最嚴重有一次,我見到一個老人家用手掩住個口,再用近乎跑嘅速度喺人群入面穿過,走兩步就行埋一邊周圍望望,怕人見到佢無帶口罩,令人好心痛。
 
其實之前都有同朋友去過幾次派口罩嘅小活動,大概都係自己買一啲口罩返來,再周街打遊擊咁見到老人家就派,有時同佢哋傾下偈,了解吓佢哋生活,總算叫出過一分力。
 
但估唔到當我以為疫情慢慢退時,屋邨入面其中一座,竟然有一家三口確診,呢個情況令我不禁擔心,如果喺呢個大部份都係老人家嘅環境入面大爆發一次,個情況可以有幾一發不可收拾。
 
最後我決定大費周章一次,去做一次自己能力範圍內嘅事,我身邊嘅善良朋友唔少,經我向幾位朋友商量之後,決定自組一次活動,向唔同嘅朋友籌集一啲口罩,再派俾出現確診家庭嘅大廈,希望可以盡快將個情況減到無咁壞。
 
善意總係將人拉近,估唔到自己問咗身邊幾個朋友,佢哋都願意仲出援手,謝安琪小姐、古天樂先生仲有小美姐姐都即時作出反應,捐出一定數量嘅口罩,仲有我半個老闆娘梁芷珊小姐,更加親身到佢好朋友鄺博士度買咗一批口罩送到我屋企,見到一大堆口罩堆滿自己屋企,雖然無咩位行,但總係覺得人間有愛。
 
但係今次我要派嘅大樓總共有833戶,而每戶我決定派14個口罩,希望呢個數量可以暫時幫到大家,之但係大部份都係一箱箱嘅口罩由我一個人分成7個一包咁包裝,呢一萬幾個口罩就變成我呢幾日嘅朋友,一有時間就坐低包,載上手套可能一包就係包兩三個鐘,好多朋友話要嚟幫手,但寒舍太細,唯有下次再約。
 
花咗幾日,終於都完成呢次嘅活動,完成一刻非常開心,希望自己少少心意可以幫到老人家,而自己亦都希望可以漸漸習慣行善,將呢一種好心情傳遞出去。
 
薛可正Facebook Page
http://www.facebook.com/sithoching
IG:sithoching

Read More