2020年03月25日

男人的Fantasy (二七三)打台的藝術

2020_03_25_Sit Menclub
 
網上資料圖片
 
最近除咗狼人殺,最沉迷都係去旺角CGA打台。喺呢度要解釋一吓,「打台」個名好似好有型,但其實就係大家心目中嘅「夾公仔」;但又要咁講,你哋心目中嘅夾公仔,睇上去同打台差唔多,實際發展到今時今日,夾公仔已經唔再局限於以前嘅夾公仔,而係好多千變萬化嘅玩法。
 
之前其實都有講過,夾公仔機一般都會大規模出現喺一個經驗轉差嘅地方,今時今日嘅香港,正好就係呢一種玩意嘅滋潤地。原因無他,香港本來舖租已經好貴,一遇到乜嘢經濟問題,一街死舖就即時出現,夾公仔店多數都唔使咩裝修,放啲機入去幾乎就可以做生意,令到呢一個行業呢一兩年突然出現喺香港,而且仲大受歡迎。
 
男人打台,其實就係一種競技,係男人同男人之間嘅鬥法,亦係台主同打台客人嘅決鬥。你將部機Set到有幾勁都好,我嚟到可以用最有限嘅錢夾走你件貨,就代表我嬴咗你,呢種決鬥有多少無謂,夾到嘅貨亦未必係自己中意,但出貨嗰吓虛榮感就係開心,就好似一個足球員入波一樣,你未入過波我真係形容唔到俾你聽。
 
而開首時講過我去CGA,其實CGA係一間電競館,呢篇文亦唔係乜嘢廣告,而係當全台灣嘅公仔機都停留喺地方文化時,香港嘅CGA已經將公仔機引入到電競館,將時下年青人嘅娛樂重組再整合,總之後生仔入到去就唔願走,就係咁簡單。
 
而我去CGA嘅機緣亦都係朋友,因為一班朋友喺嗰度做台主,所以成日都會去搵佢哋傾傾計。當我試過一次打台之後,我已經即時沉迷。其實原因都唔係好難明,以前一班男人要出去玩,實要搵一兩間酒吧飲返三幾個鐘,最後一人使兩三千蚊又飲到成肚酒咁醉住返屋企,又辛苦又無謂。
 
宜家我落到去打台,二三千蚊基本上已夠你打一兩晚,而且仲開開心心同朋友有傾有講,分分鐘仲有獎品俾你打到,笑住咁樣返屋企。係,我上面都講過你打到嘅獎品可能好無謂,可能係一隻海賊王嘅FIGURE,又可能係一隻毛公仔,但點都好過個肚載住一肚酒咁返去,嘔得出又辛苦,嘔唔出又失眠,嚟到呢度,一定係笑住嚟笑住走,仲有咩好玩得過咁?
 
打台嘅藝術,同生活嘅藝術都係一樣,唔係過程入面點樣,而係你經歷完後你得到乜嘢,你認為值唔值得,如果有一樣玩意你係每日都玩,玩完又唔會後悔,仲愈玩愈開心,咁你就唔好理人點諗,去做自己中意做嘅嘢,人生得意時,記得要需盡歡。
 
薛可正Facebook Page
http://www.facebook.com/sithoching
IG:sithochi

Read More
2020年03月16日

男人的Fantasy (二七二)二十年前後的電話時代

2020_03_16_Sit Menclub
 
網上資料圖片
 
二十年前,我出咗人生第一部手提電話,諾基亞398,月費Plan係298蚊200分鐘,當其時去人哋屋企,第一件事就係講:
 
「個電話會響一響,唔使聽,我飛緊線。」
 
無錯,當時係好流行飛線,年青一代一定問咩叫飛線,飛線就係將你手提電話駁去一個固網電話,令到所有打電話俾你嘅人,都變成喺個固網電話度響,咁樣就可以唔使扣我月費入面珍貴而隆重嘅每月二百分鐘通話時間。
 
我以前寫過唔少有關電話嘅文章,我哋嗰個成長嘅人,娛樂相對比宜家少,未有電腦同互聯網前,傾電話就係基本娛樂。用聲音溝通係我哋了解大家嘅主要渠道,無sticker同emoji,你要溝女又好追數都好,都要有一套好嘅表達方法,先會達到自己想要嘅成果。
 
正正係因為咁,我覺得新一代小朋友表達都比較差,但呢一樣唔係佢哋嘅錯,只係電腦時代選中佢哋,又或者只係電話時代當年選中我哋嘅一代。
 
亦都係由二十年前開始,我哋開始放棄單一咁用電話作長距離嘅溝通,我哋有Email,後來嘅ICQ、MSN然後係WhatsApp….Wechat仲有Line等等,打開個程式撳幾個掣,就算遠到去加拿大都可以輕鬆溝通,我哋跨過咗每個月要俾幾千蚊長途電話費先可以解相思之苦嘅時間,但慢慢卻因為「輕鬆」而漸漸變成「艱難」嘅困局。
 
去到我哋呢一個年代,電話慢慢俾人叫做「手機」,有好多人話覺得呢個係大陸叫法,但我反而覺得錯有錯著。一個電話,由二十年前只可以打出打入,直到今時今日成為我哋生活嘅必須品,拎住一個電話可以購物翻譯煲劇睇波打機,要傾偈時我哋會用WhatsApp錄個語音,但呢種溝通好多時都變成一迅間嘅「交接」,絕對稱唔上係連繫。因為好多時你講完一句嘢就會走去睇新聞,又或者係有朋友叫你打機,好快你就唔記得咗自己個語音,亦遺忘咗一個可能等緊你傾偈嘅朋友。
 
偶而有一次朋友打俾你,你仲好奇怪咁問佢:「你做乜打俾我嘅?」
然後佢答你:「我WhatsApp你都無覆我。」
 
二十年,佢只係一部可以聽同講嘅電話,
 
二十年後,佢咩都有,只係大家都唔會用佢嚟聽同講。
 
薛可正Facebook Page
http://www.facebook.com/sithoching
IG:sithochi

Read More
2020年02月28日

男人的Fantasy (二七一)當爸爸的話

2020_02_28_Sit Menclub
 
網上資料圖片
 
我係一個失敗嘅爸爸。
 
同輩之中,我比較早做爸爸,當時無咩比較,邊做邊學,感覺良好。呢幾年,屋企有好大轉變,離開咗個仔嘅生活,我經常都會反思,自己有邊啲應該做,邊啲唔應該做。
 
好多年前我父母分開,我對爸爸曾經有一段時間嘅誤解,但傳統父子就係唔識溝通,我記得要去到我離家出走嘅階段,我爸爸先意識到我嘅問題,趁我返屋企沖涼時,偷偷哋放咗一封信喺枱面,令到我明白佢有佢嘅難處。
 
所以我放棄做一個威嚴嘅爸爸,同阿仔玩WhatsApp時啲sticker唔會比佢少,希望喺佢人生入面帶住佢行之餘,都想佢當我係朋友。我經常會同佢講我自己心入面嘅感覺,因為透過電話表達,的確比較容易。
 
不過自從好多朋友都成為爸爸之後,自己都會有比較,對個仔嘅照顧,的確唔夠多。
 
呢一樣嘢曾經都令我有一陣子嘅糾結,自己的確唔可以經常同佢見面,而佢亦都長大,有自己嘅世界。
 
有時我會諗返起,我細個嘅生活。
 
我細個比賽自由,父母唔算經常喺身邊,但喺我自己可以照顧自己嘅時間,我的確缺少咗佢哋為我開路嘅時期。我經歷過跌碰嘅日子,但我從來都無怪佢哋,因為我認知呢個係我自己嘅人生,我有時反而慶幸自己喺呢段時間學識好多,令到我相信無嘢係解決唔到。
 
媽咪以為我為當年嘅事而一直嬲佢,但其實我從來都無;早面對困難嘅小朋友從來都只有著數,就算父母可以將你抱得幾實都好,你始終有一日要離開呢個溫室。
 
溫室並唔係必然,呢一個道理我好細個就已經知道。
 
直到而家面對阿仔,我都想佢可以更早明白呢一個道理,父母喺身邊係幸福,但愈早有自己解決問題嘅能力,呢一樣都係另一種快樂。
 
寫到呢度一定有好多人以為我同個仔好疏離,其實只係換咗一個方法相處。就好似喺呢段隔離時間,大家都好耐無見,我依然會每日問吓佢有冇照顧好自己,有冇打機,有冇拍吓片,學識剪接未,想唔想去食飯。
 
不過多數佢都答我,都係一句起兩句止,有時我會好似個女人咁怪佢應我太小,佢就好似氹女咁用多幾隻字去向我解釋,又或者用一兩個sticker將我打發。
 
我唔知咁樣算唔算好,不過我希望阿仔你可以早啲成長,畢竟世界轉得太快,溫室會令你難以適應世界,心痛但我無奈。
 
薛可正Facebook Page
http://www.facebook.com/sithoching
IG:sithochi

Read More
2020年02月18日

男人的Fantasy (二七零)狼人殺節目面世

2020-02_18_sit menclub
 
我唔知呢一篇係咪廣告文,不過呢個星期我嘅人生唯一只有呢件事,所以點都要講講。
 
「狼人殺」呢個遊戲,接觸咗一年〈係我知有啲遲〉,玩咗大半年,組團五個月,再籌備三個月,我心目中嘅狼人殺節目終於都面世。
 
呢排正值肺炎襲地球,所以喺屋企每日都係隔離加做後期工作,我唔識落手落腳剪片,但聯絡工作始終要自己去負責,入面好多細節都搞到我一頭霧水。
 
我人生入面做過好多工作,好多時都係想做就做,其實無咩大不了,只要計過數死唔去嘅,男人係應該試多啲唔同嘅嘢。
 
今次狼人殺節目令我獲益唔少,無論係人脈同經驗都係。因為幫手落場玩嘅朋友好似Kimi、阿Me、小影又或者係阿聲等等都係YouTube層面有唔少Fans嘅紅人,所以合作嘅方向都非常之多。
 
事實上經過第一次拍攝之後,第二次拍攝地點已經移師到去CGA電競館,呢個亦係我前文有提過嘅夾公仔基地,更大嘅地方,更多嘅設備,出嚟嘅效果,單單係睇初剪已經好有電視台級數。
 
上面一堆好似新聞稿咁嘅嘢講到周身唔自然,其實我係想講,香港半年已經愁雲慘霧,自己做創作,其實市面上已經唔多題材可以寫,我自己亦唔中意因為新聞熱話而即時創作〈利申:唔反對人咁做〉,所以近幾個月真係好似少咗好多娛樂。
 
人生係需要娛樂,無論個比例係幾多都好,我哋始於都需要平衡。唯有喺自己可以做嘅範圍入面,搵一班志同道合嘅人,做一啲大家都中意玩嘅娛樂出嚟。當然搵到錢更加好,因為我寫專欄其中一個目的都係搵錢,就算我識光合作用,我個仔都唔識。
 
香港人任重而道遠,只有生活時生活,運動時運動,要休息時就好好休息。因為戰事難測,每日打開眼都係新事,唔打理好自己,又點樣打理將來?
 
好似講得有啲遠,最後都想宣傳一下,如果大家呢排喺肺炎仲未捨得走嘅情況下想搵啲嘢睇,不妨留意下我呢個小頻道,每個星期一集,易入口又睇得開心,中意分享埋俾朋友更好,多謝定大家先。
 
隨意門:https://www.youtube.com/watch?v=E06BLOiBLng&t=246s
 
薛可正Facebook Page
http://www.facebook.com/sithoching
IG:sithochi

Read More
2020年02月07日

男人的Fantasy (二六九)深夜打台

download-2
 
網上資料圖片
 
我哋呢個年紀,一諗到「夾公仔」呢個玩意,就覺得係過時嘢,不外就係用個一蚊去夾一啲已經發黑嘅毛公仔,唔好玩又無創意。
 
但近年香港因為受台灣影響,好多新型嘅「夾公仔」機開到成行成市,而且仲多咗一個好有型嘅叫法,佢哋去夾公仔會叫做「打台」。
 
而打台所得到嘅禮物,已經唔係傳統嘅毛公仔,而係上至最新iPhone下至絕版FIGURE,好多時一個五蚊銀,就可以買到個希望。
 
受惠認識多年朋友細B係香港打台界入面嘅頭號人物,呢排有時間我都會去旺角嘅CGA度打台。CGA本身係一個電競館,幾個月前我仲喺嗰度玩過「傳說對決」嘅比賽,但轉頭佢哋已將一部份地方改成打台專用,放咗百幾部機,成為好多年青人通宵好去處。
 
越寫就越似賣廣告,但利申呢一篇真係誠心分享嘅文嚟,我認識打台呢個玩意,唔多唔少都係因為我就嚟十二歲嘅仔仔。
 
雖然佢未必知道,但我好多時都會諗,到底佢呢個年紀會中意乜嘢。所以我用好多時間去睇Youtube,因為我知道好多年青人嘅玩意就喺入面。有一次阿仔有講過佢中意打台,但五蚊一次實在唔係佢呢個年紀嘅小朋友可以隨意負擔嘅玩意,做老豆嘅又唔係百萬未開頭,佢識慳錢其實都係一個好習慣。所以我用好多時間睇片,想睇吓打台有咩技巧同歷史,同阿仔傾起上嚟都有共同話題。
 
點知睇睇吓自己就入咗魔,一種已經過時嘅玩意變成流行,一定有佢當中細節。我係一個中意研究細節嘅人,慢慢我就開始由打台嘅技術,直到佢哋嘅市場銷售技巧都開始研究,當中同細B傾過好多次,每次我廢話式嘅問題佢都好用心咁講解,上至一隻爪要點做,台灣機同大陸機做法嘅分別,都好似平時我教個仔咁教我,我未必完全記得住,但的確俾呢一種氣氛吸引住。
 
有錢人中意落夜總會,窮嘅中意踢波,年青人唱歌,上流貴婦就酒店HIGH TEA,其實目的都係想一班人聚埋一齊,開開心心咁過三幾個鐘。
 
去CGA睇人打台,自己玩返一二百蚊已經好開心,帶個仔嚟呢度,佢想打幾耐就打幾耐,希望喺呢個過程入面佢好似我一樣覺得開心。佢暫時未負擔到嘅錢,等爸爸嚟幫你。
 
薛可正Facebook Page
http://www.facebook.com/sithoching
IG:sithochi

Read More