2013/04/16

晃眼十年

哥哥死於沙士期間,死於愚人節當日,死於香港風風雨雨既多事之秋,每次諗起果段日子,感覺都特別心酸。

哥哥當紅既時間我仲係一個小學生,對娛樂圈既事唔太了解,佢引退、佢封咪、佢風再起時既回憶我都係好零碎,直到95年佢復出,我先真真正正去學識欣賞佢。

細個返鄉下,落後既大屋入面只有一部仲大過衣櫃既卡式帶錄音機,我細個其中一個回憶就係一邊聽張國榮,一邊除哂衫沖涼一邊大唱「Monica」,又或者係坐住表哥既單車,會一路隱約聽到佢哼住「Hi,妳好嗎?外國的風景好嘛?」

哥

 

果個年代,就算你唔鐘意佢,你生活上都唔會缺少佢。

到後來復出既「追」、「今生今世」、「有心人」,陳可辛既鏡頭底下我地依然係見到一個風采不減當年既哥哥,微退既髮線依然可以同退出時既「鴨仔尾」媲美,麥當雄約左麥當娜去麥當勞道果間麥當勞食麥皮撈當歸,你試下而家叫林峰跳一次,TVB一定又收到幾百宗投訴。

後來我反叛期,已經冇太留意哥哥既行蹤,只係知道佢好似有抑鬱症,又或者係每次見到佢既報導都好負面,一直都冇留意,直到佢自殺。

果段時間,每日都要帶住口罩由屯門去中環,哥哥死果刻,我記得自己身處中環街市既網吧,返屋企前一刻,收到好友報來既消息,入屋之後,第一件事就係跟爸爸分享。

「痴線,張國榮都要自殺?」呢個時候,突發新聞既記者証實左呢個消息,然後,我地一家人都冇再講任何說話。

爸爸經常懷念香港八十年代既光輝,我受佢影響,亦都會好珍惜八十年代帶俾我既果份回憶,但見到一個又一個回憶入面既人物紛紛撒手人寰,就好似將呢幅咁靚既畫一塊一塊咁拆落嚟,香港心目中最美麗既時代,好似慢慢咁消失喺呢個世界之中。

禽晚睇住哥哥既紀念演唱會,一邊見到好多人話個表演好嘈,班人唱得好難聽,但如果呢班人可以唱得好聽過哥哥,咁果一個就唔係哥哥。

如果哥哥可以再次唱俾我地聽,根本就唔會有呢一個演唱會。

我好懷念佢既唱腔、佢既大熱、佢最愛既歌佢都總算唱過,希望風有日再起時,香港既風氣唔會再係計較與奔馳,

哥哥雖已告別了,下一句,留返俾大家自己唱。

梁朝偉講果一句「不如我地重頭嚟過。」,我聽果一剎那,好似係唔單止向哥哥講,就好似係,向我地昔日最懷念既黃金時代講。

今日起身又見到工人罷工,香港,幾時先可以每個人開開心心,歌舞昇平?

COMMENT