但特別睇到戲中呢一幕，我特別深刻，因為我都試過幾次同爸爸講呢句說話。

⋯⋯ 「老豆，我搬出去住。」

「搬去邊？」

「市中心。」

「啲租搞得掂呀？」

「我得架喇。」

「嗯。」

仲記得當時嘅我係懷住衝出宇宙嘅心情去講呢句說話，講完之後我就拎起支筆計劃，上次去宜家睇果張床幾多錢，雪櫃買貴啲好定係應該留錢買部靚電視？
我諗左好多，計劃左好多，睇過好多，亦資料搜集左好多。

但我當時好似唔記得睇下爸爸嘅心情同表情。

我覺得如果有造物者，我總係覺得佢將父母同子女嘅感情係根據住陳奕迅首『十面埋伏』去做設定，你來我往，我去你又留。我地總係搵唔到相交點，又或者係只可以喺回憶入面搵到。

我地都係潮州人，爸爸係典型鐵漢，喜怒哀樂唔會由面上睇到，而我亦係標準不孝子，除左佢生日同父親節之外都係搵唔到勇氣向佢示好，

其實好多時連呢兩個日子都冇任何表示。

我記得第一次搬屋最後我係用哂我所有嘅錢依然買唔齊我需要嘅嘢，然後父母商量過後每人俾左三仟蚊我去解決整件事，我再次內疚係因為當年我只係拎住六仟蚊然後眼入面真係只係睇到呢六仟蚊，但我從來睇唔到呢六張一仟蚊後面嘅愛。

十幾年前嘅我，一路都係望住謝霆鋒做人。

但由做爸爸開始，每日對小朋友嘅成長都會令你有唔同改變，呢種過程會將你以前只係識諗自己嘅諗法磨蝕，令你對眼識得慢慢向外觀察，從以我地只會愛自己，到今日我終於知要愛他人。

阿仔慢慢長大，接觸多交流亦多，某一日我同佢傾到巴斯光年住邊度呢個問題果時，佢問左我一個問題。

「爸爸，咁我第時可唔可以自己一個人住？」

「當然可以。」

「咁你同媽咪會唔會好悶？」

「點解咁問？」

「因為你地話我係你地最錫嘅仔嚟，你地唔可以成日見到我咁點算？」

果一刻，我先意識到同一個鏡頭入面仲有一個羅蘭。

就算係一個問下都覺得心痛嘅問題，但我知道雀仔成長後一樣要往外飛嘅道理，然後好輕鬆咁答小朋友：

「爸爸唔會悶，你唔阻住我寫故仔同打機，唔知幾開心。」

小朋友好似唔太明白，又離開我懷抱跑去會合索克天王。

感覺，又好似爸爸以前同我講嘅一樣，

「啲租搞得掂呀？」

「我得架喇。」

「嗯。」

「我會成日返嚟食飯。」

「你係先算啦，你唔返嚟我賭馬仔都可以賭我大聲啲，唔知幾好。」

父親節快樂。