男人的Fantasy (五) 搬大屋
男仔過咗十八歲，為咗証明自己已經蛻變做男人之後，一般都會即時做幾件事。考車牌、入賭場…仲有一樣，搬出嚟自己住。
前兩者比較容易做，今日我想講最難嗰一樣。
小弟比較古怪，十八歲之後，反而係做咗最難嗰一件事先。當年比較反叛，對阿爸阿媽所講嘅事總係覺得唔順耳，成日都想往外跑，覺我自己好有本事。十八歲幾有一日，同阿爸已經唔記得爭執乜事，我嘈完幾句，跑出樓梯打電話俾喺外面嘅媽，好有型咁話要搬走。
發育期嘅事就係咁荒唐，最後我成功搬走咗，但俾錢我買傢俬嘅，亦都係我阿爸。當年覺得所有事都係理所當然，因為的確唔知道乜嘢係人情世故，乜嘢叫將心比己。
當年同女朋友住嘅第一間屋，真係可以用生靈塗炭去形容，4300蚊一個月，三百幾呎都唔知有冇，仲學人養著牛咁大嘅牧羊狗。兩個人又唔係乾淨，本身年紀又細，搞到成間屋好似狗竇咁。
好多年之後嘅今日，我阿媽都會講返我呢間屋，話個廁所好似公廁咁，不過我已經對當年嘅事冇晒印象。
打後嘅幾年，我搬過好多次屋，一個人又住過，兩個人又住過，好多好多人一齊住我都試過。但總係覺得搬一間就比一間覺得日子難過。我曾經有好嚮往過返到屋企冇人理嘅日子，亦試過後來返到屋企好想有人理嘅心情。
我人生最高嘅紀錄，係連續九年嘅聖誕都喺唔同嘅屋企入面過。
喺我離開由細住到大嘅祖屋十年之後，某一日我返到去，坐喺細佬隔離，我開始諗當年我點解會離開呢個地方。當年我離開我係覺得自己需要自由，但當我得到呢份自由之後，我反而好似冇咗其他嘢。
喺祖屋住時嘅新年係最開心，一大朝早隔離屋就會走過嚟鬼殺咁嘈，但我總係記得一起身我就有利是收同埋有蘿蔔榚食。自己住嘅日子，年三十晚一定係玩到唔肯訓，大年初一又會黃昏先起身，最後變成缺席任何拜年活動。
當年仲未有Whatsapp呢類東西，自己一個人住嘅時間，我就好似同佢地隔絕咗咁，就算佢地打電話俾我我都係幾句就收線，又幾個月唔見一次，感情亦都慢慢變差。
當年我第一次搬走，我計劃入面係得到自己自由之後，我就會一間比一間搬得好，搬得大。然後我事業會一路高歌猛進，最後接阿爸阿媽嚟住，由我去照顧佢地。我成日覺得當日同阿爸嘈交係因為我冇本事，只要我有本事，就唔會有人質疑同成日鬧我。
好多年之後我先知，其實呢種只係自己嘅一種謬誤。
喺我有本事之前，我唔記得咗好多事。
我唔記得咗要返屋企陪佢地食飯，
我唔記得咗大年初一要同佢地拜年，
我亦都唔記得咗家人係要見。
就算最後我可以搬到一間大屋，失去咗呢一堆嘢，一間屋又算係乜嘢本事？
薛可正Facebook Fanpage
http://www.facebook.com/sithoching