男人的Fantasy(十一)做個好爸爸
最近一堆朋友做咗爸爸，搞到我都變咗做「送禮勤」，不過穿插喺一堆新生命嘅誕生入面，又係一件令人快樂嘅事嚟。
我成日覺得，有自己嘅下一代出世，絕對係男人開竅嘅里程碑。無論一個人性格有幾多缺憾嘅男人，一旦做咗爸爸之後，心態上唔多唔少都會有改變。﹝人渣不在此列﹞
我都試過呢個階段，所有嘅念頭，都不外係來自「因果」呢個想法。
自細我就已經唔聽阿爸阿媽話，冇好好讀書，冇學好一技之長，唔識為將來作準備，待人接物又唔見得特別好。所以成長之後，唔多唔少都會遇到好多失意嘅情況。
不過我從來都唔覺得係咩問題，我只係覺得人生就係有高有低，慢慢就會好。但有咗小朋友之後，佢嘅一舉一動，就變咗你眼前嘅一塊鏡。
佢一切一切嘅事，都會深刻咁喺你面前出現，令你重新咁去細味，到底一個小朋友應該點樣成長。其實呢一點都只有一個做法：以身作則。
我哋想小朋友點樣，我哋自己就要點樣。所以慢慢，我哋就會見到一眾平時又冇禮貌又沙塵嘅大男孩，個個都變晒謙謙君子。
冇他嘅，「我爸是李剛」呢啲事笑人地就過癮，發生喺自己身上都幾家門不幸。
係呀，又係我老友，又係叫阿文，今次係一個啱啱做爸爸嘅阿文呀。識咗佢十幾年，真係估唔到浪子都有回頭嘅一日。
阿文係一個有錢仔，由細到大都同我幾啱玩，因為大家把口都夠賤。但佢人品就好一般，成日持住屋企有幾個錢，踩人就好似唔使本咁。朋友都唔係咁鍾意佢，但實際上佢又冇咩其他缺點，有時仲會好醒目咁請人飲飲食食嚟拉關係。
玩咗咁多年，三年前搞咗過百萬嘅婚禮之後，最近終於做咗老豆。因為大家各有各忙嘅關係，我呢大半年都係透過FACEBOOK先見到佢嘅事。一見到咁高興，當然要即時去探下佢同個B仔啦。
點知一去到佢屋企，我當堂嚇一跳。幾年冇去，以前一屋奢華裝修嘅豪宅，竟然變咗一間又實用又溫暖嘅安樂窩。雲石枱唔見咗，變咗一張有安全防撞膠角嘅多用枱；裝飾櫃上面嘅豪華藝術品呢，就變咗一家人嘅合照。我再睇睇阿文，成個人唔同晒，以前著到成個土豪咁又粗金鏈又勞力士，而家就BOSSINI輕便型為主。
「嘩，你好似變咗好多喎。」
「係呀…人結咗婚，啲心機都去晒個屋企度啦。而家仲要話個仔出咗世，仲好似以前咁洗腳唔抹腳咩，你估我真係好識搵錢，我咪又係老豆照住。而家做咗人老豆先知自己老豆有幾辛苦，所以起居飲食嘅嘢，慳得咪慳囉。」
「真係大個仔喎。」
「梗係啦，諗返自己以前啲沙塵嘢，搞到朋友都唔多個。而家諗返就真係無謂，明明就係自己自卑，成日覺得屋企有錢就高人一等咁…我都唔想個仔第二時好似我咁諗嘢，所以而家咪做好啲，俾佢習慣下樸素嘅生活，起碼朋友都多啲嘛。」
「咁又係。」
所以你話做爸爸係一件幾咁神聖嘅事，真係令到阿文呢啲頑石都可以點頭，都唔好話唔神奇。人生在世，每個階段都有唔同嘅事做，我都曾經有一個「做個好爸爸」嘅階段，呢個階段帶俾我好多快樂同學習，希望大家都會遇上，同埋好好利用呢個階段。