男人的Fantasy(十二) 我的主題曲
「男人唔可以窮」兩年前空降網絡，帶俾我嘅收獲好多，不過其中有一樣，係我最引以自豪。
由細到大，阿爸教落識人好過識字，所以我對「朋友」呢兩個字睇得好重。踢波、讀書、工作同上網都好，有機會識到朋友，我都會份外珍惜。
曾經有一段時間，喺屯門經營一間餐廳，所認識嘅朋友也來自五湖四海，朋友又會帶新朋友幫襯，令我朋友圈子擴大咗不小。
我有個由細識到大嘅朋友叫偉仔，偉仔有個中學同學又叫陳軒，佢地同時又有個屯門嘅朋友叫Rock哥，三條友喺大興工廠區原來有個BAND房。去到呢個BAND，我又識咗Raymond同細廉，就係咁，我一年之內認識咗成隊Senseless。
佢地以前出show，雖然我都因為開舖關係而冇睇過。但佢地嘅歌，我都會喺支持返﹝雖然唔算係咩支持﹞，因為我覺得，可以向自己嘅嗜好奮鬥，係一件非常有意義嘅事。
到咗我寫男人唔可以窮之後，呢班友都算交足戲，一個二個都話本書好好睇。有一次我上佢地Band房，成員之一陳軒就講咗句：
「不如我地都寫返首男人唔可以窮。」
佢地嘅一呼百應，令我當時好感動。但我知道，寫一首歌唔易，所以我唔敢諗真係會有呢一日。到咗幾個星期後，一次踢波途中，偉仔同我講原來佢地已經開始作緊曲，我就好開心咁話：「搵日我一齊上嚟，一齊填。」
最後歌入面，真係有一句係我有份參與。而當首歌完成MV嗰一日，我喺youtube足足聽咗二三十次，感覺好開心。開心嘅原因，除咗擁有自己第一首主題曲之外，仲有就係呢一班本來唔算親厚嘅朋友一份心意。
我用時間同心機，去成就其他人嘅一件事，我覺得呢個係一種美事，亦係樂事。每次聽到呢首歌，我都會記得我寫呢本書嘅情況，又或者係戲入面好多好多嘅畫面，當然仲有，我地一齊喺band房填詞嘅嗰半個夜晚。
「窮得只得堆鈔票，才知青春槓桿不了。」呢兩句的的確確係我寫呢個故事嘅中心思想。多謝陳軒﹝好似係佢諗﹞強而有力咁激射呢兩句歌詞出嚟，第一次聽raymond唱出嚟嗰時，真係有想喊出嚟嘅感覺。
喺呢度，好多謝呢五位朋友，多謝你地嘅好意。呢首歌，永遠係我地之間嘅一件美事。我當天發誓，以後我每次去Red MR，都一定會點呢首歌唱兩次以上，仲會盡量唔走音。
感謝。
圖片來源：互聯網
薛可正Facebook Fanpage
http://www.facebook.com/sithoching