男人的Fantasy (十四）花市文化
好多年冇去花市，事關我係一個典型嘅男人，又辛苦又冇著數嘅非必要事，我係好少主動參與。不過今年，老婆開到口叫我陪佢去行吓買吓得意公仔，呢件本來冇著數嘅事頓時又變得意義重大。
諗返起都有好多年冇去過花市，細個一班朋友，冇錢但時間多，一行十幾人總係搵地方去而唔捨得返屋企。平時大家就坐公園，嗰個年頭就連通宵老麥都未有，我地只可以買個杯麵就搵地方坐天光。
所以一去到新年前，行花市係我地最開心嘅活動，特別係最後一晚嘅通宵，我哋都唔捨得走，直到天光先返屋企。不過時間總要過，呢支歌仔亦都冇唱好耐。
潮流，同友情一樣，隨住時間會變。但係變好定係變壞，有時都未必係我哋自己可以決定。
今年嘅香港，風雨飄搖，大是大非之後嘅呢個新年，點都希望大家可以搵返一點點節日嘅氣氛。但走入花市之後，我特別留意今年年青人嘅創意。因為每一年嘅花市貨品，就好似係前一年香港次文化嘅潮流產品放題咁。
但今年見得比較多嘅都會係一啲同政治有關嘅貨物，首先我唔反對亦冇權反應呢個做法，因為其他人有其他人嘅自由，只要唔牽涉法律問題，任何人想做任何事都係可以嘅。
見到呢一類貨品，我唔會選擇停步，呢個亦都係我嘅選擇。因為呢一年嚟，可以接收民主訊息嘅渠道已經有好多，需要睇或者應該睇嘅我都已經睇過。所以新年開開心心嘅日子，我都係想用簡單小小嘅心情去迎接。
不過講開自由，我就見到有某一種貨品係明顯侵權。由外形同個名，都會令人即時諗起一啲既有嘅大品牌，就好似維他奶又或者係其他電視遊戲咁。見到呢個情況，我有小小感慨。
到底自由係乜嘢？我地香港人又點樣去好好利用呢樣我地朝思暮想嘅信條？
雖然只係短短幾日，又或者可以話呢啲貨物都係為增加氣氛而出世。但商業社會入面，版權就係版權，特別係有利益嘅前題下，咁樣公然侵權，變相偷走人地嘅資源，咁嘅做法唔係正正違背咗我地一路以嚟爭取嘅嘢？
呢個只係我一個小諗法，喺呢度就唔著墨太多。不過，科技走得太快，喺人心同本性都唔可以緊隨嘅情況下，好多人和事，都已經慢慢失去咗純粹嘅感覺。
有啲可惜。
薛可正Facebook Fanpage
http://www.facebook.com/sithoching