男人的Fantasy（十五）男人新年做乜好？
男人過年，其實真係冇咩好做。
開工開到年廿九，老婆喺屋企大掃除又掃晒﹝但其實就算未，男人都係唔會幫手﹞，年貨我地唔識買，入利是又嫌煩，年三十晚嗰餐又唔駛我哋煮……
大年初一前，乜都唔使做。
去到年初一，難得可以瞓晏小小，老婆又一早撬我地起身。就又係，拜年唔通入黑先去咩，唔係拜山呀大佬。不過呢啲禮數男人又係唔多會理，我地嘅理論係人到咗，利是派晒，夜晚餐飯就算食唔食都冇所謂，求求其其咪過咗個新年去囉………
除非有錢賭啦。
一講新年有錢賭，女人未起身，就會見到個老公已經換好衫準備隨時出門口；
一講新年有錢賭，女人個身唔使帶Cash，因為男人個身一定會帶足彈藥；
一講新年有錢賭，就算喺三姑媽度由朝拜年拜到晚，個男人唔會扮攰扮第二日返工做藉口想早走；
一講新年有錢賭，一班本來唔太熟悉嘅男性同行朋友，都會即時情如手足，又或者係狗咬狗骨，總之感情就係澎湃啦。
所以我覺得，賭錢就係唯一一樣，新年期間男人會自動自覺去做，同時又覺得有意義嘅事。
其實咁都啱，因為拜年本身就係一樣幾無聊嘅活動，一班成年唔見嘅朋友或者親戚，趁住所謂嘅新年氣氛，硬生生將一班本來就唔係太熟嘅人，困喺一個平均香港居住面積三百呎鬆小小嘅空間入面，講埋一堆完全係發條式嘅對答。
阿B仔你讀中幾呀？姨媽成年冇見你囉…
姨媽我上年咪同你講咗我升咗大學囉，下年都畢業喇。
阿詠詩都成三十歲仲唔嫁，仲想逗利是逗到幾歲呀？
我幾時嫁關你X事咩，俾嗰兩封青蟹咁多嘢問…
阿志明呢個你女朋友呀？同同上次唔同樣嘅？哈哈哈哈我講笑咋。
我知你講笑，你拍拖十年，年年拜年你都係講緊呢個笑啦笑匠
你哋睇下，幾咁尷尬…女人其實都已經比較好，因為講兩句是非或者係交流下淘寶經驗就好快已經熟絡。但我地雄糾糾嘅男人又點可能咁快打得破啲隔膜呢？所以賭錢就真係最好嘅一道橋樑。
一副啤牌，五十二隻，牌過三巡，情同兄弟。
男人嘅浪漫，又點止係青島同火腩飯？可以發乎情止乎禮，喺適當嘅時間爆發，又喺適當嘅時間收藏，呢啲處理感情嘅男性獨有方法，先係真正嘅浪漫。
薛可正Facebook Fan Page
http://www.facebook.com/sithoching