男人的Fantasy（十六）男人唔讀書
呢個年頭，個個都話要個學位，相比起我地嗰個年頭，大學生已經由榮耀變成基本條件，成日都聽到班做老闆或者係CEO嘅朋友講：
「而家嘅大學生，起薪點最多咪得萬幾蚊。」
次次聽到呢句我都會心諗，我個仔第二時點算？
香港政府唔照顧香港新一代已經唔係新聞，起居飲食幾個人生大問題，未來都會愈來愈困難。得萬幾蚊一個月，望住個升到完全見唔到頂嘅樓市，我地下一代仲可以點做？
而家唔係佢地盡唔盡力嘅問題，係就算佢地盡晒力，讀好書搵好工，最好嘅代價都可能只係僅僅夠兩餐。
正所謂：做嚟托呀？
去到呢類問題嘅盲點之時，我好多時都會倒返轉咁諗，如果我個仔唔讀咁多書，用讀書嘅時間同心機去出嚟社會學習打拼，佢嘅人生又會唔會豐盛小小。佢老豆我讀書其實唔多，就連我朋友讀書都唔係好多，但見到佢地嘅發展，又真係一啲都唔差。
本來今個星期我唔係寫呢個專題，之所以改，係因為兩隻動物：一隻河馬，一隻狗仔。
河馬同狗仔都係我中學同學，當然呢兩個係佢地花名，佢地兩個都係女人，但能力本事就一啲都唔會輸蝕。十幾歲嗰年，冇讀中學之後就識咗個女朋友，同女朋友去旺角行街時，都會成日喺一間全港最大嘅化妝品連鎖店到，見到河馬同狗仔。
當時，佢地都應該只係初級職員，喺門口度執吓貨，同笑到好似傻咗咁招呼客人。
當年，化妝品店入面都仲係全部香港人。
後來，我每隔一段時間都會喺唔同嘅分店見到佢地，有時係旺角，有時係尖沙咀。但見到佢地嘅感覺，已經慢慢唔同晒，由一個貌似最初級職員，到有小小阿姐格，跟住就直情係管理級。
但我呢幾年都冇同佢地打招呼，因為太耐冇見，怕醜。到後來經過Facebook嘅舊同學聯絡返，幾年前我地又重遇上。呢個時候我先知，佢地已經係一間分店嘅店長。
跟住呢幾年，我從佢地嘅facebook度見到佢地嘅工作，同工作帶俾佢地嘅所有。雖然我都好認同佢地工作嘅辛勞，但一年可以遊幾次歐洲，郁吓可以全家去旅行，呢類成就又點會係時下年青人伸手可及嘅生活？
今次呢個Topic，就係我睇住河馬同狗仔喺機場嗰個寫住去羅馬個牌影相時所啟發出嚟。與其用十幾年時間去行一條唔知有冇出口嘅路，不如放手一搏，跨過呢類世代既有規範，搵自己嘅一片天。
好，返屋企叫阿仔唔使讀咁多書先。
薛可正Facebook Fan Page
http://www.facebook.com/sithoching