男人的Fantasy（十八）潤唇膏
圖片來源：互聯網
「我今日唔想講嘢。」
天氣乾燥嘅日子，我成日都會同身邊嘅人講呢句說話。
我唔係臭脾氣，亦都唔係裝模作樣，我只不過係覺得個嘴唇好痛，甚至有時一講嘢就流血。呢一種唔可以擘大個口講嘢同大聲笑嘅天氣，係我由細到大都最討厭。
每到呢一種天氣，我起身嘅時候都會小心翼翼。小心翼翼地洗面，然後小心翼翼去合好我把口，冇咩事都唔會同陌生人講嘢。
我嘅大腦會一直發出訊號
「唔好擘大口講嘢。」
「唔好擘大口講嘢。」
「唔好擘大口講嘢。」
「唔好擘大口講嘢。」
「唔好擘大口講嘢。」
「頂………又唔小心整爆咗個唇……」當我好唔情願咁拎出紙巾印走嗰三幾滴血跡嘅時候，心入面又會再提醒自己，下次真係一定要小心。
可能會有人問我：「點解你唔用潤唇膏？」
咁我又反問一句：「點解我要用潤唇膏？」
我係有好充分嘅原因唔用潤唇膏：
第一，講得做唇膏，好明顯就係撥入「女為悅，己者容」嘅範圍入面啦，我有咩可能會用呀？
第二，無端端整啲黐立立嘅嘢上塊唇到，我講嘢會好唔方便囉，好似食完豬油榚無抹嘴咁囉。
第三，男人老狗出街一向以瀟灑為主，銀包電話鎖匙咁多嘢帶喺身其實就已經超出上限，我有咩可能會帶支潤唇膏喺身？俾朋友見到我仲得了嘅？
呢三個原因其實就已經夠晒理據去講明，男人點解唔拎潤唇膏出街，我相信九成男人都會同意我所講嘅嘢。不過，如果天氣有時真係太乾燥，我出街之前都會借太太支潤唇膏好輕好輕力咁印一印個嘴唇，但講明絕對唔係搽囉。
呢輕輕嘅一個動作，係表達到我地男人其實都係好講道理，唔係我睇唔起呢支潤唇膏，而係呢一支潤唇膏嘅外型真係同我地唔太匹配，肯用一下已經係我地最大嘅包容。
不過，我知道仲有好多男人好憧憬「喜劇之王」入面柳飄飄同天仇喺沙灘搽潤唇膏嘅一幕，又真係好甜蜜同好有感覺……
醒未呀？
一套戲嘅經典情景，永遠都只會喺電影入面發生。現實世界裡面，你可能會遇上一個同你一樣個嘴唇都係咁乾燥嘅對手，佢可能係乾到甩晒皮，就算佢用個唇嚟幫你搽潤唇膏，到最後都只會令你落得好似俾砂紙割咀一樣的痛苦。
信我啦，潤唇膏真係唔係男人用架。
圖片來源 Facebook : soulmade
可正Facebook Fan Page
http://www.facebook.com/sithoching