男人的Fantasy（二十三）話題終結者
「喂，呢個我知呀，阿媽係女人嚟㗎嘛。」
「喂，嗰個我都知喎，喇我教你啦，爺爺就係爸爸個爸爸呀嘛。」
你哋身邊，有冇呢一款國內土豪型號嘅「話題終結者」？如果有嘅話，咁呢篇文你應該會感同身受。
科技一日千里，近幾年WhatsApp嘅興起，令到一大班朋友傾偈嘅機會大大增加。係喇…我知我知…唔好做咁多低頭族嘛，但WhatsApp傾偈都係算傾偈，你唔可以否定佢地當中情感嘅交流同存在住嘅一份真摰㗎喎。
最大嘅變化係，有時可能因為一兩個聚會，你會有機會同一啲唔係太熟嘅人，去進行一個群組討論，呢個時候，你就會發現好多「話題終結者」。
呢一種人，多數有一個特徵：唔衰得。
無論喺呢個群組入面，遇上啲任何人講任何話題，終結者都會出聲。佢會用超認真嘅口脗，好語重心長咁教你哋，應該點做，同埋點樣做。
可能個情況係：
A：「我覺得牛角嘅和牛好好食。」
終結者：「我教你啦，我去過日本，牛角嘅牛肉邊好食，要食嘅，梗係食………﹝下刪三百字冇人睇嘅意見﹞。」
又或者個情況係：
A：「今個月天氣好，好想去台灣玩。」
終結者：「呢個時候點會去台灣，我上次去……﹝繼續下刪五百字冇人睇嘅意見﹞。」
最後，佢地會精神自瀆咁唔理其他人嘅感受，一直喺一班唔太理佢嘅人面前，去講晒自己想講嘅事。
當然，呢一堆都係啲炫耀、自大同討厭嘅說話。
就係咁，本來可以好好地咁討論嘅話題就俾佢終結咗。
一次可能唔覺意，第二次可能會唔好意思講，第三次你就會覺得煩，到第四五六七八九次……終有一次你會頂唔住，同群組入面其中一個成員………私訊。
而你第一句講嘅說話會係：「佢好X煩。」
面對方嘅回答亦會係：「你都覺得呀？」
跟住大家都有一種相逢恨晚嘅感覺，繼續笑呢個終結者第一、二、三四五六七八次嘅事跡。
最後經過分析，你哋會發現，呢一類人其實可以簡單咁透徹佢嘅性格構造：自卑、溝通能力偏低同埋價值觀短路。
佢哋唔識得用最友善或者係平和嘅方法同其他人建起橋樑，佢哋會認為，只要我威，或者有好處，你哋自然就會親近我。所以長期訓練之下，佢會慢慢形成一種近乎係說教式嘅口脗，每一次其他人有問題想討論時，佢就會以一反三咁，以為幫其他人解決咗問題。
完全符合性格。
不過佢哋從來都唔會諗，其實討論不外就係討論。要討論嘅好多時都唔會係個結果，其實只係要個氣氛。
我哋尋常人家，唔使用強勢令到其他人仰望；我地深信，如果平和咁去展示大家嘅誠意，好多友情都會隨之而來。只不過係呢一類嘅終結者經常以為每事要分高強，凡事要比勝負，先有咁嚴重嘅價值觀短路問題出現。
其實傾偈原因就只不過係傾偈，並唔係一定要有一個結果出嚟，又唔係比賽，咁執著做咩呢？
圖片來源：互聯網
薛可正Facebook Page
http://www.facebook.com/sithoching