2015/05/14

男人的Fantasy (二十六)稱身的老戲院

20150514 sit menclub photo
 
啱啱嗰個星期日,帶住一家大細走去睇呢排最紅嘅復仇者,為咗試下視覺上嘅享受,我仲揀咗間號稱九龍區最先進嘅戲院去睇。最後睇完戲出嚟,好唔好睇就各有睇法,但我自己就有另一番嘅感覺。

 

原來宜家香港睇戲都已經咁貴。

 

我呢個屋邨仔喺屯門長大,成個屯門最享負盛名就係位於新墟嘅巴倫紐,個名係咪好怪?其實只係我懶,佢全名叫巴黎倫敦紐約。

 

一間細細嘅戲院入面分三個細細嘅映院,九十年代嘅時候幾乎係我同一班同學每個月都會去一兩次嘅地方。因為有時下晝會有特別場係俾專為我哋學生哥而設﹝唔係鹹戲﹞,所以夏天時我哋撞啱有戲睇都會走入去嘆下冷氣。

 

走去櫃面指幾個位,一人放低十五蚊,行到去紅頭髮嘅巴基斯坦叔叔面前俾佢撕走飛尾,成班人就可以鬼殺咁嘈咁衝入戲院。食物唔使一定要買戲院入面嘅,我鍾意去隔離麥當勞買個包入去食又得,又或者掃街掃三幾串雞腎入場都得,冇人會理你冇人會搜你個袋。

 

呢一種廉價嘅快樂自由,一直都陪住我成長。到後來呢間戲院再加多個叫米蘭嘅映院,但我已經離開咗屯門,冇再返去睇戲。

 

嗰日行入最先進嘅戲院睇復仇者,坐嘅位的確係好舒服,但冷氣大到好似入咗殮房咁,呢種溫度已經習慣咗好幾年,所以去戲院要帶外套呢個觀念早早就植入咗我哋嘅腦度。

 

而另一樣已經習慣嘅觀念就係食物,戲院執行唔可以帶外來食物入去食呢個規矩,仲認真過香港警察拉謀殺案疑犯,一見大袋就搜,一見水樽就收。無他嘅,唔係點逼你哋買佢哋又貴又唔好食嘅熱狗餐?

 

有時我會諗,呢種冇咩自由嘅享受,仲算唔算係享受?

 

香港愈來愈發達,但偏偏我哋就愈來愈少選擇。唔使講到咩政府層面上嘅問題,起居飲食早就統統同自由沾唔上邊,慢慢已經去到睇一套戲都搵唔返享受嘅感覺。

 

科技先進的確帶嚟好多方便,但加上利益就好快變得失衡。某日WhatsApp傳嚟朋友去巴倫紐米睇戲嘅疏肝樣,搞到我好想一家大細入屯門,試一次喺真正自由享受嘅環境下再睇多次復仇者,我諗就算唔會好睇啲,個銀包都會重返啲。

 

唔知個紅頭髮巴基斯坦叔叔升咗做經理未呢?
 
圖片來源:互聯網
 
薛可正Facebook Page
http://www.facebook.com/sithoching

COMMENT