2015/05/21

男人的Fantasy (二十七) 說不出再見

謝拉特

 

對於謝拉特離開利物浦嘅事實,到宜家都仲係唔識點形象自己嘅心情。

 

由上年季中開始,我就開始覺得佢狀態跌得好快,唔好計車路士嗰腳波,而係整體上已經追唔上英超嘅水平。
我一直都想佢退一步,由最前線嘅球員慢慢變成昔日喀麥隆米拿嗰種「30分鐘球員」,俾多啲機會真係有能力嘅球員去幫球會出力,而唔係賣老本咁霸住個正選位。但估唔到去到佢真係要走嘅一晚,我真係一條麻甩佬對住個電視喺度喊。
謝拉特對我嚟講,已經唔止係一個球員咁簡單。
對於一個屬羊今年啱啱三十六歲嘅男人嚟講,完整咁目擊一個球員生涯起落,並唔係慣常事。謝拉特係我由佢十九歲開始,睇住佢一路由利物浦攻城拔寨,而同時一直喺國家隊俾雙特問題困擾住,足足十六年。
而實不相瞞,小弟踢波嘅打法係幾刻意模仿謝拉特。先唔好鬧我住,我係話我模仿佢,但我冇話自己似。試諗下,以一個中場中嘅球員去睇,有邊個打法夠佢可以咁舒服﹝當然你自己要周圍跑我冇你辦法﹞。有波就放個四十碼長傳,等啲天生跑得快嘅隊友去接應,遇上個別真係跑得快過隻狗嘅朋友,有時好多醫院波都可以幫我救返生,咁咪顯得我嘅長傳好似好準咁囉。
另外就係遠射,老實講我踢波從來冇試過跑得快過,扭人技術亦係好有限,最鐘意就係中場推埋小小就起腳抽埋去。正常嚟講如果你技術唔係太離譜嘅,起十腳點都有一兩個波射得入。入咗波,其他人話你符碌咩都唔使理,自己夠爽就得喇。
就係咁,我嘅足球生涯其實一直都依靠住謝拉特嘅足球生涯。著住件利物浦波衫行落場,企落個中圈位度,我就覺得自己係自己世界入面嘅謝拉特。佢年青時我都仲有氣有力;到佢開始做人爸爸,我亦開始有自己嘅家庭;最後到佢垂垂老矣嘅一日,已經轉變咗好多嘅我,何嘗唔係已經筋疲力竭。
所以到佢走嘅一日,我的確係傷心到唔識形容,曾經以為佢需要退,唔好再阻住球隊發展。其實自己一路都唔記得咗,佢遇到嘅問題,自己都一直遇上緊。

我會開始怕落退,我會開始怕自己已經唔係無所不能,我會開始怕喺人群當中慢慢暗淡,不過我知道,呢啲就係男人開竅走到另一個層次嘅必經之路嚟。
希望你有一日再進步,晏菲路見。
圖片來源:互聯網

 

薛可正Facebook Page
http://www.facebook.com/sithoching

 

COMMENT