男人的Fantasy (三十) 時代的分水嶺
南韓又發現新沙士，令人諗起當年沙士殺到香港嘅時期。不過對香港嚟講，沙士唔單止係一個恐怖嘅病，仲可能係兩個時代嘅分水嶺。
2003年，沙士殺到香港，全個香港人心惶惶。淘大封鎖、醫院酒店都試過隔離有關人等，對生於香港嘅我地嚟講，係一件從來都冇諗過會出現嘅事。每日睇住新聞報導死亡數字，嗰種恐怖得嚟又唔真實嘅感覺瀰漫住整個環境；加上張國榮自殺，市道又低迷，股市樓市一齊瞓街，對我哋香港人，真係一個好大好大嘅經驗。
最後沙士走咗，自由行政策跟住出現。
我唔係數據派，亦都唔係一面倒咁支持自由行，不過自由行對香港經濟再起飛嘅頭幾年，有好大嘅幫助。但同一時間，亦都帶嚟咗一班炒樓炒物資嘅內地人，對香港人嘅影響，愈來愈大。
水貨客問題，無日無之，但從來冇被正視。
近呢幾年，政府日新月異嘅垃圾政策，令到民怨愈嚟愈高。中港兩地嘅矛盾，令到香港人對內地旅客嘅觀感每況愈下。有啲人話香港人偏激，我唔否認有小數，但更大部份嘅都係嚟自生活中嘅不滿而折射出嚟嘅訴求。
直到呢幾年，樓市已經炒到一個唔係正常人可以住﹝不適用於Ironman同batman﹞嘅地步，政府嘅地拎嚟賣而唔會拎嚟解決房屋問題，一個真正令香港人憤怒嘅問題已經出現。
以前，係影響香港人衣食住行；而家，香港人係住都冇得住。
屯積十年嘅怒火，最後由一個由一個嘅警號叫醒香港人，最後經雨傘運動嘅催化，形成今時今日，我哋香港人每日只可以苦中作樂地盡力生活。
我經常覺得，十二年前一場沙士帶嚟嘅影響，最後會以咩形式改變或者結束？
我有好多內地嘅朋友同親人，咁多年嚟我都唔認為，內地人嘅天性係差劣。我試過喺內地有急事發生，由一位內地朋友奮力咁幫助下捱過；亦記得兒時喺鄉間，一堆內地長大嘅表哥係點樣將我照顧得無微不至。
可惜近年嘅嘅情形，好似將我同佢地，愈拉愈遠。
又一次好大機會嘅沙士重臨，對我地嚟講當然唔係一件好事。但我相信最壞嘅地方都可以搵到一啲小得著。希望今次沙士事件，大家都可以安然無恙咁渡過，再將我哋香港人，順順利利咁帶到下一個真正歌舞昇平嘅新年代。
圖片來源：互聯網
薛可正Facebook Page
http://www.facebook.com/sithoching