男人的Fantasy(三十二)小天堂
細時家貧，喺公共屋邨一家四口住咗幾十年。屋邨帶俾我嘅歡樂，我成日同我個仔講係佢永遠都唔會感受到。好似我住井字型，一梯三十四伙人，屯門呢類當時新發展嘅城市，入得去住嘅都係差唔多情況嘅家庭，所以鄰居之間嘅小朋友年齡相差都唔會多得去邊。
一個打開門就有十個八個差唔多年紀朋友嘅環境長大，有咩法子唔開心？
就好似我咁，八歲開始長期都有四個玩伴出雙入對，一齊跳樓梯一齊射波子，玩「捉依因」永遠都會捉捉下返咗屋企飲雪水，舊曆七月又會係唔係都同人講自己見鬼。當時嘅生活好樸素，夏天就算開住大門瞓都唔會怕有賊，嗰一份安全感，我已經唔記得咗好耐。
我地冇名校觀念，只要唔好包尾唔好要老豆請半日假去見家長，阿爸阿媽都唔會俾好多麻煩我哋。我哋唔使跳舞書法吹蕭珠心算同打功夫。只要我地做晒功課，我想去邊度玩都可以。
最記得細個最鐘意就係玩紙皮，每逢有邊一戶人買雪櫃電視呢類大電器，個紙皮箱都一定會係我嘅目標。大紙皮箱其實玩法都有好多，狀態100%時我就會放喺樓梯隔離，一等到有人行過就會「嘩」一聲彈出嚟嚇人。
我試過嚇到人爭啲跌落樓梯，同俾人打到我真係跌落樓梯，但我對呢個玩意從來都係樂此不疲。
玩到咁上下，個紙皮皺皺地，我就會摺埋佢放喺樓梯度坐上去，跟住就連人帶紙皮衝落樓梯。咁危險嘅活動我當然有試過玩到流血，但好返之後一見到大紙皮箱我都係諗都唔諗就繼續玩。
時代唔同晒，好多年都冇見過新一代小朋友會玩呢類又失智又危險，但偏偏又咁窩心嘅白痴遊戲。我唔知佢三十年後會唔會記得自己玩過iPad上乜嘢遊戲，但我肯定自己到死嗰日都記得我坐住一塊樂聲牌紙皮撞埋牆度要返屋企止血嘅情景。
我唔鼓勵小朋友玩太危險嘅事，但事實上呢個世界已經變得愈嚟愈靜態，唔夠入骨嘅事我地永遠都唔會銘心，呢個定律嚟架嘛！
我成日都會諗呢個課題，但每次到最後我都說服自己，時代變咗就係變咗，任你點留戀以前嘅世界，佢都係唔會等你。
所以我最近開始諗緊，除咗得閒同個仔玩打交之外，仲有乜嘢玩意可以俾佢玩得盡情啲男仔頭啲，等我可以製造另一個小天堂俾佢，好好地咁過呢個童年。
圖片來源：互聯網
薛可正Facebook Page
http://www.facebook.com/sithoching