男人的Fantasy(三十三)討厭的懷舊
一年幾之前，我曾經喺其他專欄寫過我對以前荔園嘅情感。估唔到一年幾之後，當年荔園老闆之一，已故嘅邱德根先生位公子，會決定再次將荔園呢個樂園帶返嚟2015年。
收到消息時，我同身邊嘅人講，荔園真係開返的話，我一定會支持。我一定會同老婆阿仔去一次呢個我由細到大都咁鍾意嘅地方。可惜，當園內設施一層一層咁公佈之後，我覺得好迷茫，呢個係乜嘢荔園？
荔園，有佢獨特嘅感覺。園內每一樣玩意，對於當年嘅小朋友，都係目不暇給，又非常刺激。恐龍洞當年未入就已經俾門口嗰把恐龍聲嚇到失魂，只要你企喺佢門口，無論你聽幾多次，我肯定每個小朋友都會俾佢每一次嘅叫聲嚇親。
入去恐龍洞就更加唔使講，我對入面嘅記憶唔係太深，因為我每一次都唔係好敢打開眼行晒成條路，次次都係拉住朋友親人合埋眼行過去就算。
鬼屋，更加係我另一個至愛，因為佢係要坐車入去，所以我夠膽開眼去睇。呢個鬼屋俾我感覺更加大，喺入面我試過企喺車上面去摸周圍嘅鬼，亦都試過中途落車，企喺一個角落度等下一架載住我朋友嘅車嚟，先一齊出返去。
加上飄雪樂園、碰碰車、子彈車、過山車、動物園等等，所有嘅設施雖然都係殘舊，但佢哋有佢哋嘅靈魂…靈魂呀你哋明嘛？
而呢一次再重臨香港嘅荔園，我完全搵唔到佢嘅靈魂所在。恐龍洞已經變咗滑梯，鬼屋跟住香港嘅土地問題變化一樣，縮到變咗一間鬼劏房。咖啡杯上因為贊助印咗品牌嘅名，四十蚊一隻雞脾…
整個感覺，都只不過係消費我嘅七十後一輩腦入面嘅回憶，將一堆唔係材料嘅材料求求其其咁炒埋一碟，再用一個近年嘉年華活動式嘅收費，呢個就係今次荔園俾我嘅感覺。
每一樣嘢俾唔到大家有用心做嘅感覺，呢種延伸創意嘅念頭，就正正好似而家香港一樣。好多人已經唔會用腦去製造創意，好多人只會因利成便，將網上或者身邊最流行嘅資訊炒作一次。
可能係改一首歌，又或者係畫幾格漫畫。呢一樣二次創作我唔否定佢有自己生存空間，但現況去睇，真在係太多。
創意減小，生活趣味自然都會小。暴龍哥話齋，呢個真係定律嚟。
望住荔園嘅網上潮文，我真係好感嘆，一個長存我腦入面十八年嘅回憶，已經俾一碟福建炒飯式嘅創意，正式閉幕。
圖片來源：互聯網
薛可正Facebook Page
http://www.facebook.com/sithoching