2015/07/08

男人的Fantasy(三十四) 相信愛

20150708 薛可正MenClub Column 相信愛

朋友飯局,一般也逃避不了幾杯下肚。

 

席間喝多了的毛小妹突然放聲大哭,把我們在場的人嚇倒了。她在我們心目中一直是個樂觀的人,工作能幹而且漂亮動人。

 

這種接近天之驕女的產物,到底有什麼事,要讓她出醜於人前?

 

這頓飯最後草草收場,毛小妹也在朋友的陪伴下回了家,這迷團存在我心中一段時間,直至我忘記了。

 

再次記起的時間,已經是在中環巧遇毛小妹的那一晚。

 

星期六晚,蘭桂坊人多鬼也多。我這晚因為一點事而有點納悶,由雲咸街一直沿荷里活道走,直到我看見一個熟悉的人影坐在路邊。

 

是毛小妹。

 

「喂,妳又喺度嘅?」我走上前,故作興奮新奇的大叫。

 

毛小妹看著我,眼神有點散漫,然後一撲上來就摟著我大哭。半個小時之後,她把我拉到一個小公園聊天。

 

其實我認識了毛小妹沒多久,這類朋友的朋友,基本上如果沒有跳過我們本身的共同朋友,我們一輩子也不會是朋友。所以我對毛小妹的認識不是太深,起碼我不知道她住在哪裡,交過幾個男朋友。

 

「我唔信我男朋友。」她突然說

 

「點解?」

 

「我覺得佢出面有第二個。」

 

聽到這一句,我試著重組整個案情:

 

「妳係覺得佢有,定係肯定佢有?」

 

「我唔問,我見到佢電話有張女仔相,呢個女仔我冇見過。」小妹斬釘的說

 

「咁妳有冇同佢嘈過?」

 

「我想分手。」截鐵也湊合好了。

 

「會唔會太衝動?」

 

「唔係點?等佢飛我呀?」

 

毛小妹狠勁的瞪著我,我頓時覺得有點尷尬,想跟她解釋得罪她的是她男朋友而不是我。

 

我思索幾回,最後想出一個比較有技巧的問題:

 

「妳唔信佢?」

 

「我點信?個女仔好似佢以前女朋友。」

 

「妳見過佢以前女朋友?」

 

「冇。」

 

「咁咪即係搵煩惱俾自己?」我坐下,沒好氣的說

 

「唔通我要忍佢?我唔想到佢講分手時我先好似個傻婆咁。」

 

「但而家十劃都未有一撇,妳要分手都要證明佢對妳唔住呀。」

 

毛小妹沒有說話,我看著她的側臉,暗忖這個世界最大威力的,還是愛情這東西。無論妳姓甚名誰,一旦擊中要害,多長袖善舞的小姑娘也頓時變成潑婦。

 

「如果唔信,妳哋做咩要一齊?」我問

 

「我想叫自己信,但呢個可能係我性格。每次我覺得有問題,我就好想同佢分開,我唔想見到佢,我唔想佢有一日真係同我講分手,我會接受唔到。」

 

「所以妳自製呢個心目中嘅結果先呀?」

 

毛小妹點點頭。

 

「我覺得呢…愛情、友情……總之感情都係好簡單。

 

妳遇到一個人,妳相信佢同時佢又相信妳,妳哋就會擁有妳哋嘅關係同感情。然後妳哋點樣對待呢份感情,佢就會點樣去對待返妳地。

 

妳唔信佢,佢就會令妳唔信所有嘅人同事;如果妳信,佢就會令妳睇見世界上所有美好嘅事。」

 

「如果最後我哋都係分手呢?」毛小妹問

 

「咁係因為妳哋夠鐘要分手,唔關妳信唔信愛嘅事。起碼喺妳信愛呢段時間,妳可以感受到最真誠嘅事。」

 

毛小妹聽著,像是想到了某一些東西。她站起來,轉個身問我:

 

「點解你又會喺附近嘅?」

 

「我去完蘭桂坊嘛。」

 

「去嗰度做咩?」

 

「我女朋友三日冇搵我,有朋友話見到佢喺呢度,所以我嚟搵佢。」

 

「佢嬲咗你?」

 

「唔係,佢話同我唔夾,想同我分手…佢冇嬲我…」

 

「所以你想追返佢…?」

 

「係,我想叫佢試下,再相信一次我哋嘅感情。」

 

薛可正Facebook Page
http://www.facebook.com/sithoching

 

COMMENT