2015/07/15

男人的Fantasy(三十五)犯太歲

Sheep6

 

小弟屬羊,今年本命年,年頭睇過電視入面嘅風水節目,話我今年會犯太歲,不過我唔信。

 

其實又唔可以講信唔信,因為「犯太歲」呢三個字由細到大真係聽得太多,令我感覺呢樣嘢好似傷風咳咁,就算到佢真係有發生過,我哋有時都唔係好覺。

 

不過今年我有唔同體會,我慢慢先明白原來佢嘅形態唔只係傷風咳,當錯嘅時間遇上錯嘅太歲,係分分鐘可以變重感冒。

 

早兩年算係小弟喺人生際遇上最順利嘅日子,雖然會有唔開心事,不過總算調整到自己世界與生活。但自從踏入今年之後,個情況就有啲唔同。

 

點講呢?我諗犯太歲唔可以純粹咁歸納於黑仔呢一科入面,當中嘅層次同節奏都係我咁多年嚟冇感受過嘅。

 

概括咁講,就以我接工作為例。如果係用黑仔計,我認為係直情工作機會都唔會有,日日等運到。不過犯太歲就唔同,首先你係會有好多機會,然後有好多同其他人交流傾吓點樣合作嘅機會,再跟住就係大家傾到天花龍鳳如真如假,互磨咗一段時間之後,就會傾到自己完事之後可以得到幾大嘅利益喇…

 

係咪好開心呢?係好開心㗎。

 

之後呢?Sorry係冇之後㗎喇…所有嘅事好似賭神入面啲賭局封牌咁,無先兆亦都冇通知,所有嘅事突然間停喺一個點上面,再無寸進。

 

開始時你會去搵出個原因,瘋狂咁追查一番之後,你先會發現原來係冇原因。機會突然冇咗,交流亦只變成單方向咁流,就好似你唔知邊一年邊一個女朋友咁,突然間唔搵你,唔再聽你電話。

 

但犯太歲最恐怖之處,唔係一個女朋友唔搵你,係突然間所有女朋友無聲無息之間,慢慢同你疏遠。

 

不過好似我開頭咁講,犯太歲係唔同黑仔,我個人對黑仔再深層次嘅理解,黑仔係可以死人,但犯太歲係唔會。

 

就好似所有女朋友都唔搵你,你只不過係冇咗愛情,而個人係唔會即刻死得去。我今年上半年,就係咁樣徘徊喺不斷戀愛而又不斷失戀嘅情況當中。

 

我曾經問過一位風水師傅,而佢俾我嘅答案我亦都好同意:「犯太歲你當係阿伯屙尿咁,唔係冇得屙,係所有事都窒下窒下。」

 

明晒。

 

不過我人比較樂觀,相信人生每一件事都係順住走。冇早兩年嘅順利,我唔會有而家嘅工作機會,而我亦唔會遇上如今工作上嘅唔順利。人生不外高高低低,只要未脫離,我依然可以喺呢條軌跡上繼續玩落去。

 

最近運氣好似好返啲,遇上唔少好嘅人同事,希望遲啲可以再寫多篇文同大家交代,我已經脫離咗犯太歲行列。
 
圖片來源:互聯網
 
薛可正Facebook Page
http://www.facebook.com/sithoching

 

 

COMMENT