2015/07/23

男人的Fantasy (三十六) 窒機

20150723 sit mc

 
已經唔記得,有幾耐冇將自己「重新整理」一次。
 

就好似電腦一樣,你愈少做呢個動作,最後累積嘅人和事只會愈來愈多。閒人閒事還好,如果積落太多錯嘅人同錯嘅事,過度瘀塞唔識清理,「窒機」只會係遲早嘅事。
 

不過「窒機」呢一事兒,對天生急速嘅香港人嚟講,可能只係小菜一碟。就算我哋因為呢個原因做錯一兩個決定,得失一兩件小事,以我哋嘅生活節奏,幾近係毫無影響。
 
「窒機」之嘛,又唔係「死機」,城市人心態嘅修復速度永遠係可以快過閃電。
 
我都曾經係一個咁嘅城市人。
 
有好多年,當我記起某一個範疇嘅事,涉及某一類記憶,個人就會開始「窒機」。
 
嚴重時會影響生活、社交、甚至係生存意志。影響到生存都已經夠嚴重,但好多時都只會視為係間歇「窒機」,極其量係放空一下,但從來冇諗過好好重新整理。
 
最後,我迷失過、放棄過亦都自怨自艾過。死唔去捱得過,最近我先記得,世界上有重新整理呢回事。
 
多謝最近一位朋友,身體力行咁向我解釋,呢個世界所有事都有深淺有量度,太多太少都只會令自己再次陷入開始「窒機」嘅歪路。
 
做人要定時面向陽光,你自然會好快揾到方向。
 
我記得小時候學過嘅一首兒歌。
 
小太陽
 

曲:顧嘉輝 詞:鄭國江
 
太陽像那大紅花 在那東方天邊掛
 
圓圓面兒害羞像紅霞 只是笑不說話
 
太陽像個大南瓜 在那高高天空掛
 
照得滿山歡樂融融 草兒發嫩芽
 
大嘴巴 笑哈哈 落了也要往上爬
 
敬他 愛他 我把心兒交給他
 
太陽倦了便回家 夜裡休息少驚怕
 
明晨月兒落旭日重來 依舊往上爬
 
薛可正Facebook Page
 
http://www.facebook.com/sithoching
 

 

 

COMMENT