男人的Fantasy(三十八)感謝DSC
圖片來源：互聯網
好多男仔一到十八歲，就會出現離家出走嘅念頭，我就係其中一個。
其實無他嘅，離開屋企嘅原因嚟嚟去去都只係得一個，自由。搬到屬於自己嘅屋企，如果你有試過嘅話，你會明白我所講嘅說話，因為你都呼吸過同一啖空氣。
不過世間上所有嘅理想，都幾乎係要用金錢嚟配合。十八九歲仔，自己一個搬出嚟住，我俾你叻極咪得三幾萬，俾得上期定夠買電視？
當然，蔡加讚嗰類就例外啦；所以好多男仔，都會多謝DSC。
我仲好記得，當年極其希望呼吸自由空氣兼同阿爸鬧交嘅小弟，拎住萬幾蚊就話學人搬出嚟住。你冇睇錯我都冇打錯，係萬幾蚊。
我同女朋友去宜家傢俬走咗一轉，除咗佢啲肉丸之外，就冇一件睇得上眼。因為太貴，我買唔起。無計可施之外，我收到一個朋友建議，轉戰DSC。
去到佢哋間舖行咗個圈，雖然發現好多蔗渣板做嘅櫃，但勉勉強強之下，我都買咗新屋基本需要嘅傢俬。
新屋入伙嗰晚，我聞到一陣好似我第一次行入DSC舖頭嗰陣味。眨下眼，原來又十幾年。
我仲好記得，同女朋友鬧交時發脾氣，俾我一拳打爆咗嘅櫃門；又或者係嗰張，永遠都好似得三隻腳，企來企去都唔會平嘅茶几。
張米色布嘅梳化，都唔知陪我過咗幾多個唔小心睇波睇到瞓著咗嘅夜晚。
如果冇DSC，我諗當年我要死死地氣咁返屋企住，同老豆認句錯，然後放低呼吸自由空氣嘅理想。
十幾年後，我三十幾歲，我知道自己唔會再用DSC嘅產品。好多人事都係留喺一個階段先係最恰當。我翻過咗嗰一頁，就等下一個人去承接。
所以今日見到DSC倒閉嘅消息，再上網見到好多人鬧佢哋嘅貨品質數差，抵死之類嘅說話，就好想為佢哋平反一下，佢哋都曾經幫過唔小周身冇錢又學人扮型要自由嘅年青人。
計吓計吓，當年拎住萬幾蚊，跟住又問人借幾千蚊。湊夠二萬三千蚊首先用三千蚊租個二百幾呎嘅單位，一按一上六千蚊；跟住再用萬四蚊買咗小小傢俬同電器就可以開開心心咁擁有自己嘅屋企。
如果俾著而家呢個年代，DSC都死埋，你哋班友仔拎住二萬幾數想出嚟搵屋搬？
得，瞓街啦去。
薛可正Facebook Page
http://www.facebook.com/sithoching