男人的Fantasy(三十九)老狗公
我成日都話，呢個世界永遠都唔會有男女平等。好簡單，女人溝仔最多咪溝到四十零歲，一個唔覺意年過五十都仲未有歸宿，唔好話溝仔，妳想識個後生小小都難過中六合彩啦。
男人就唔同，幾多歲都可以溝女，簡簡單單如果有蒲開置地嘅朋友都一定會見過，呢個地球上溝女溝到最大年紀嘅健力仕保持者，謝賢先生。我曾經有幸喺佢隔離枱食一次飯，席間所感受到佢對女伴嘅細心同關懷，真係抵佢再溝多廿年都仲得呀。
冇錯冇錯，以謝賢先生作引子，其實都係想講一類生物。
就係老狗公。
唔好誤會，我絕對唔係指謝賢先生。我所講嘅老狗公，係嗰類年紀又偏大，但又唔係好鍾意打理自己；以為有小小錢，又或者係一啲權力，就肆無忌憚咁向身邊佢認為係美女嘅獵物埋手嘅中古代生物。
OKOK我明，男人見到女人起痰係正常吖嘛，我都會我都會。但喺一段本來已經有小小反常理，年紀講緊可以做得上父女嘅男女感情交往上面，阿先生你可唔可以唔好太奔放，畀小小空間你眼前呢位，只係出於禮貌先同你準備問好嘅美少女呢？
你嘅頭髮已經甩得七七八八，如果我係你唔好再撥佢，更加唔好再染。喂，瀕臨消失架喇，你見中國人再大膽都唔敢幫四川啲熊貓染髮就知啦，死一隻就冇一隻喇大佬。
同埋可唔可以唔好講嘢嗰時，一臉自信，笑容接近劉德華咁哄埋人哋度？你呢個做法就好似嗰班，喺西洋菜街跳舞嘅阿姐一樣，以為自己芳華絕代，望你就好似想同你過人世咁。
你有冇諗過，人哋只係時運低，唔小心畀你見到，又唔小心畀你走咗埋嚟。少女唔介意同你交個朋友，但唔一定會畀你認為有吸引力嘅條件所迷惑，以後未肯定對方態度前，可唔可以檢點小小呀老狗公先生？
男人係可以咸濕，甚至可以淫賤。但最重要問題係，你要先睇清楚對手，佢對你嘅咸濕有冇興趣，又想唔想回應你嘅淫賤。愛情本來就係用外表去吸引大家，成功與否，唔一定係講彩數，仲要講包裝。老狗公先生，乜你唔記得你今朝好似冇梳頭出街咩？但又唔怪得你，得幾條毛，有冇梳過都唔係咁易記得。
寫呢篇嘢係細佬有感而發，亦都想同所有弟兄講，就算要做狗公，都要俾個時間自己。過咗黃金競技時間就要認命，千萬唔好以為金錢可以買到愛情。金錢可以換嘅永遠都係商品，絕對絕對唔會係真摰嘅人與事。
再者，你都唔想下次溝緊個細自己廿幾年嘅少女時，俾人一句就將你收檔架？
「阿叔，返屋企湊孫啦。」
薛可正Facebook Page
http://www.facebook.com/sithoching
圖片來源：互聯網