2015/09/10

男人的Fantasy(四十三)長髮

20150910 薛可正MenClub Article
 
圖片來源:互聯網
 
每一個男人都會遇上警號,一個令到你知道歲月不留人嘅警號。
 
我係九十年代長大,由九十年代初期就開始進入青春期。呢個時間我哋會開始接觸異性,甚至係親近異性。正所謂有著我便有著你,青春期時代嘅你,除咗一身入時打扮之外,點都唔小得另一個殺著。
 
冇錯,就係髮型。
 
我中學嗰個年代,唔使講清一色都差唔多係郭富城嘅杜拉格斯頭,每晚苦思用咩方法去將個頭保持高昂,係一項比功課更重要嘅事。仲要每個學期尾,老師捉得冇咁緊時,我哋就會自己染金毛。嗰個年代我哋冇染髮用品,靠嘅只有係雙氧水加錫紙。
 
係呀你冇睇錯,係雙氧水呀,即係食神用嚟加水晶膠就可以寫個心字出嚟嗰啲雙氧水呀。
 
到後來出嚟做事,我好快就轉咗髮型,就係一個完美嘅伊健頭。冇錯,因為呢個時間已經去到九十年代中後期,聶風都差唔多拍得成戲喇。
 
後來去到我廿幾歲,喺一次剪頭髮過程中,我嘅髮型師突然同我講:
 
「喂,你甩頭髮甩得好勁喎。」
 
呢句說話對當時嘅我嚟講,就好似坐喺過山車車頭咁,一下就將我衝到落山谷底。個髮型師用手指比劃我額頭嘅兩邊。
 
我心諗:「係喎,又真係好似高咗好多喎。」
 
就係咁,我就畀佢屈我做咗一個成千蚊嘅療程。
 
做完之後我返屋企左照右照,可能照慣睇慣咗,開始覺得其實都唔係太小頭髮…心情又沿住過山車上返正常水平。
 
自此之後,我成日都會望住自己頭髮。盡量都想做到唔染唔吹唔電,望嘅都係唔想自己咁快變大內密探零零發入面嗰個西門吹雪。
 
而且為咗令自己好過小小,我開始研究吓身邊又或者係報紙上嘅明星,邊個睇落小頭髮過我,一旦發現有靚仔係小頭髮過我,我個心唔知點解就會好返好多。
 
呢十幾年,坐呢類嘅過山車真係坐唔小…
 
我知道呢個係必經階段,但人總係要呃自己,拖得一日就點都多一日,到有一日我個仔都娶老婆時,我甩到成個Q太郎咁都冇所謂。
 
千帆盡過,就連碧咸都比我發現佢守唔住髮線時,我自己亦都開始唔太注重呢件事。人嘅內在點都係重要過外表,雖然我都知呢啲廢話係講嚟安慰自己,但總叫都係樂觀說話。
 
今日照鏡,見到自己頭髮又真係小咗。不過呢件以前視為警號嘅事,到今日已經變成只係一個訊號。
 
薛可正Facebook Page
http://www.facebook.com/sithoching

 

COMMENT