2015/09/17

男人的Fantasy(四十四)K房感情文化

20150917_薛可正MenClub_K房感情文化
 
圖片來源:互聯網
 
年青時,K房就係我哋溝女嘅重要戰線。嗰時冇錢,娛樂就自然小,同埋睇一個女仔適唔適合自己,再決定出唔出手,唱K一定係一個最好而又最平嘅方法。
 
不過當年都有啲小貼士可以慳錢,就係用自己嘅Kfun儲分,雖然唔可以即時變返錢,但閒時拎嚟換下戲飛,拎嚟同女朋友仔去睇都有著數吖。
 
入得K房,每條仔都總有幾首殺手鐧嘅。
 
我哋嗰個年代,仲有四大天王,陳奕迅啱啱冒起,李克勤都仲未送禮,喺電視台同阿叔講緊波。
 
我有個朋友,次次去唱K,一有女仔喺度就會表演巫啟賢嘅 《傷心的情歌》。次次都唱到七情上面,唱完都仲要睇吓班女仔有冇望住自己,但次次我都發覺係冇人理佢。
 
有兩次全男班去唱歌,我多口問佢:
 
「今日唔唱巫啟賢?」
 
佢就答我:
 
「唔啦,冇女喺度,首歌好嘥氣。」
我冇答佢,不過個心就好想話俾佢知「原來你都知咁做係嘥氣。」
 
講返睇女仔,打牌睇女婿,唱K就睇女友,呢個講法我夠膽講係百發百中。要留意啲咩?聽住喇!
 
第一,係唔係攝鐵手
 
食飯有食飯禮貌,唱K都有唱K禮貌。如果你識條女第一次去唱K就拎住個咪唔放,張學友又話識,張惠妹又話最愛,一日到黑搶住個咪嚟唱,就算其他人唱緊佢都要好似隻鬼咁細細聲以為自己和緊音,呢啲女娶到返屋企你就知死。
 
所以第一樣就係要睇佢隻手有冇磁石。
 
第二,洗版
 
呢一樣同攝鐵手差唔多,我曾經試過同幾個新朋友去唱K,當時班朋友入房先,我就去小個便,點知五分鐘後返到入房,其中一個女仔已經點滿咗三版歌。冇錯係三版…跟住佢就好滿足咁放低個遙控,仲好溫柔咁同我地講:
 
「你地點歌啦。」
 
你老闆吖,你叫我點歌定點我呀?呢啲又係冇得留低,OUT!!
 
第三,K房阿愁
 
有一種女,我唔知佢係精神病定愁善感,次次唱K唱到咁上下,就會無啦啦喊。嗰種喊法係唱緊歌時突然爆喊,跟住成班人就走埋去問咩事,呢個時間梗有兩三隻兵或者姊妹驅散人群,仲要邊揚手邊講:
 
「唔好嘈佢啦,佢唔開心呀。」
 
喂,大佬我唔係想嘈佢,但你喊還喊,畀返個咪我先啦大家姐,下一首到我呀。
 
一次半次冇所謂,但總有啲重病嘅,十次有九次唱到中途就喊,大佬我哋嚟慶祝生日,妳喊乜Q呀?下次同你去殯儀館唱K啦咁鐘意喊。
 
總之我話嘅,以上三種,是但中一樣嘅女你都唔駛要,講完。
 
薛可正Facebook Page
http://www.facebook.com/sithoching

COMMENT