2015/09/24

男人的Fantasy (四十五)女人,請於球場放低電話

20150924_MenClub薛可正
 
圖片來源:互聯網
 
阿強今日踢波好神勇,因為佢上個星期先追到嘅女朋友,今日嚟咗睇佢踢波。
 
男人就係一樣好傻豬嘅動物,平時太陽猛小小都話唔想郁。但今日個新女朋友嚟咗睇佢,就好似食咗金霸王咁亂咁跑。
 
阿強五呎六吋,體重好似近一百八十磅,以前冇女朋友喺度嗰陣我哋叫佢豬肥腩,有時仲會喺佢跑嗰時,指住佢啲肉叫佢唔好震。不過今日有新女朋友,開波前嘅WhatsApp group入面,佢要求我哋叫佢做朗尼,因為佢新女朋友係鍾意曼聯。
 
阿強頭頂腳踢,差唔多每一個波都用盡全身嘅力去追。同埋我發現佢每隔十秒,就會望一望女朋友有冇望住佢。
 
可惜,佢女朋友一直都喺度玩電話。
 
不過阿強冇放棄,繼續用自己嘅表現去爭取。終於,喺阿強門叮兩碼執到隻死雞之後,佢發現女朋友係望住佢,佢即時一個疾步衝過去,做出一個入波嘅慶祝手勢。
 
其實街波入咗波之後慶祝係好低能嘅做法,不過佢啱啱墮入愛河都應該冇樣嘢正常,由佢沉醉下。
 
佢衝到埋女朋友面前,但竟然換嚟女朋友嘅一句:
 
「你走埋嚟做咩?踢完喇?」
 
「我入波呀…」
 
當時我距離阿強五個身位左右,但嗰種尷尬到想窒息嘅氛圍,的確係四方八面咁向阿強衝埋去。
 
「哈哈哈,我掛住玩電話冇睇到呀。」女朋友打圓場,但阿強嘅內心都已經好傷悲。跟住嘅比賽時間,阿強已經變到唔再活躍,無晒心機。
 
離開時,我聽到阿強同女朋友嘅對話。
 
「妳又話鐘意睇足球比賽嘅?」
 
「係呀,我平時睇英超呀。」
 
真係自取其辱,人哋話鍾意睇英超你就叫人嚟睇你比賽,就算你哋啱啱墮入愛河,個麻醉藥都未至於令到阿強你變成一個英超明星啦。
 
但我明,一個男人可以喺自己女人面前,呈現出最威風最有活力嘅一面,絕對係一種光榮嚟。試諗下,喺香港地嘅男人,一至六要返工,星期日分分都仲要OT,個樣明明唔似隻狗都做到隻狗咁,難得有一日放假女朋友又肯跟埋嚟睇我踢波,就點都想拎返小小男性嘅尊嚴嚟備用啦。
 
因為當女朋友慢慢變成未婚妻或者係老婆之後,佢就唔會再睇到你踢波。唔好誤會,唔係唔再嚟球場,係佢唔會再俾你去踢波呀傻仔。
 
所以,男人要珍惜自己踢波嘅時間,女人都要珍惜男人仲肯喺妳哋面前揮灑自己汗水嚟搏妳哋一笑嘅光陰。
 
下次去球場睇男朋友踢波,俾吓面望多佢兩眼啦。
 
薛可正Facebook Page
http://www.facebook.com/sithoching

COMMENT