2015/09/30

男人的Fantasy (四十六) 好頭好尾的男神

福山雅治
 
圖片來源:互聯網
 
早幾日有唔小上咗年紀嘅中女,都不約而同咁喺個Facebook呻吟,一齊為自己二十年前嘅偶像福山雅治結婚而同哭一聲。
 
新一代玩數碼暴龍大嘅美少女,當然就唔會識呢位當年曾經同木村拓哉爭一日之長短嘅日本男星啦…咩話?木村拓哉妳都唔係好記得係邊個?權志龍靚仔定係佢靚仔?okok對唔住,以下呢堆字妳唔使再睇落去。
 
二十年前嘅福山雅治的確係非常屈機,當年一套「同一屋簷下」,佢同江口洋介爭酒井法子嘅新世代亂倫愛情故事,的確係睇到青春期嘅我非常陶醉。每個星期日睇完套劇,都會幻想自己身邊幾時出現一個好似酒井法子咁嘅女仔。
 
當然,最後呢個諗法都冇實現。
 
福山雅治係傳統嘅靚仔,純粹係用五官已經可以將任何對手收皮嘅一種美男樣。喺好多年之後嘅今日,江口洋介把長頭髮都唔知甩剩幾多同埋酒井法子已經唔係我哋心目中嘅酒井法子之後,福山都仲可以用保持得唔錯嘅狀態去宣佈結婚,總算係另一種嘅全身而退。
 
冇人可以將自己嘅狀態保持一世,除咗四哥。所以時光係會逼福山雅治呢副曾經嘅萬金之軀,一直喺人生路上競逐各種嘅乜乜之最,直到佢而家宣佈結婚。
 
因為一宣佈結婚,即係佢已經進入另一個人生階段。佢做咗人老公,亦有可能做人老豆。喺美男子明星嘅燈光之下,佢有資格老、佢亦都有資格甩頭髮,佢可以將曾經嘅一個寶座傳承落去…
 
可惜,日本娛樂界已經俾韓國追過,近年已經再冇邊個出名靚仔嘅男明星可以接棒。
 
所有嘅中女都可以返回現實…
 
三十八歲嘅美儀,曾經喺十八歲嗰年,儲錢飛去日本睇福山雅治嘅音樂會;而家佢係三個仔女嘅阿媽,除咗平時玩下Facebook睇到一啲日本娛樂新聞之外,都唔記得自己有幾耐冇留意日本嘅娛樂圈。
 
三十六歲嘅阿欣,佢都趕住下個月同拍拖十三年嘅男朋友,去法國旅行結婚。信和佢已經好多年冇去,以前去買福山3R相嘅舖頭,都已經變咗做格仔舖。
 
三十五歲嘅安琪,亦都籌備緊幾時再去睇BIGBANG嘅演唱會。近二十年嘅佢,追過謝霆鋒車,接過小豬同周杰倫嘅飛機,近年轉戰韓星嘅佢,已經去咗韓國睇演唱會同順手整容好多次。
 
就係喺呢一日,佢哋三個人同時喺網上睇到福山結婚嘅呢個消息,三個人同時覺得有小小失落。呢一種好頭好尾嘅結局,為福山雅治嘅人生作一個開始,亦同時為十八歲嘅美儀、十六歲嘅阿欣同十五歲嘅安琪共同擁有嘅曾經,作出一個總結。

 
薛可正Facebook Page
http://www.facebook.com/sithoching

COMMENT