2015/10/08

男人的Fantasy (四十七) 拆局

北上尋歡

 
圖片來源:互聯網
 
阿峰終於都出事喇,我一早就講咗,佢一定會出事。
 
阿峰係我嘅好朋友,朋友堆中大家都叫佢「歡樂峰」,原因?因為佢平時負責我哋成班朋友嘅歡樂,可以講得上係康樂組嘅組長。
 
由細個開始,無論係考完試大家一齊去打波動拳,一班人畢業之後去旅行,跟住落老蘭溝女,呢類活動都係由阿峰一手承辦。地方佢搵,人又係佢約,有時錢都要佢比埋,阿峰就係一個咁抵得諗嘅朋友。
 
直到,唔記得邊一年,阿峰鍾意咗北上尋歡之後,我哋一班人就好少一齊去玩。原因唔係我哋唔再齊心,而係我哋身上嘅歡樂卡,唔係個個都可以隨身帶備,好多都係鎖喺老婆個櫃筒入面。
 
從前去親邊度玩都前呼後擁嘅歡樂峰,慢慢就變成一個隻影形單嘅獨行俠。
 
其實唔係我哋清高,而家北上尋歡呢樣嘢,真係唔係人人都鐘意。單單係人生路不熟呢五個字,已經足夠我哋呢班飽讀詩書嘅精英卻步,因為一計個出事率,大家都知搏唔過。
 
我哋勸過阿峰好多次,但佢都冇聽。今次,終於都出事喇…
 
阿峰自己一個人上咗去玩,已經失去聯絡接近二十個鐘,峰嫂Toby開始四出打電話俾我哋呢班朋友去搵佢。
 
三十分鐘後,有朋友查到,阿峰真係掃黃時俾公安拉咗。我哋一班兄弟,即時開咗一個救急WhatsApp group。
 
「Toby仲未知咩事,兄弟們,有冇計幫阿峰兜?」
 
「斷正要坐十幾日,點兜?」
 
「不如兵分兩路,一班上去救佢先,另一班喺香港諗下點解釋。」
 
「我喺大陸識朋友搞呢類嘢,點快都要幾日先出到嚟。乜都係假,幫佢諗咗個原因頂三幾日先,唔係家散人亡都有知。」
 
大家苦思幾分鐘後…
 
「話俾人打劫,而家喺大陸醫院得唔得?」
 
「喺醫院點解唔打得電話返香港?」
 
「話佢俾人打到昏迷囉。」
 
「一陣Toby走上大陸點算?即穿啦,諗過啦。」
 
「話佢坐白牌車,同人有爭執,打交俾人拉咗返公安局得唔得?」
 
「呢個似樣,有冇人有意見?」
 
「所有人都覺得呢個原因得就去馬,記得由同一個人俾資訊Toby,唔好一人一句,一夾唔到口供阿峰就係咁先。」
 
「得,我而家上去救人,我未必夠錢呀,一人過一皮嘢俾我先,有咩事唔好WhatsApp我,我同老婆講要喺公司開長途會,唔可以成日睇WhatsApp。」
 
「好兄弟。」
 
三日後,我地終於救返阿峰落嚟。Toby信唔信佢我哋唔知,但最後阿峰屋企安然無恙冇離婚,我地已經覺得大家都任務完成。
 
之後,我每一次諗返我哋呢班三十幾歲嘅男人今次所做嘅事,好似一班「職業雜工隊」咁用好認真嘅心情去做一件好似好戇居嘅事,就覺得我哋嘅感情好濃厚、好溫暖。
 
老土小小講句,有時呢啲咪就係大家成日講嘅「男人的浪漫」囉。
 
薛可正Facebook Page
http://www.facebook.com/sithoching

COMMENT