2015/10/15

男人的Fantasy(四十八) 婚禮法官

20151015_薛可正_MenClub20151015_薛可正MenClub_ 婚禮法官2
 
圖片來源:互聯網
 
呢幾個星期,一打開個FACEBOOK,就俾黃曉明同楊穎小姐嘅婚禮洗版,當然大部份留言都係唔太好,部份仲算OK歹毒。
 
睇咗幾日,歸納吓佢哋兩個嘅罪狀先:
 
整容、土豪婚禮,仲有太無品味。我見到好多港女,起勢咁鬧楊穎,又話人哋係人造人,小心洞房嗰時個鼻會甩呀之類嘅問題。
 
我愈睇,就愈覺得恐怖,愈覺得身邊瀰漫住一股酸味。不過我唔會低手到話「人哋結婚關你咩事」呢類唔夠水準嘅廢話,我只係想講吓大家所指出嘅罪名到底係咩一回事。
 
整容,呢個問題其實我聽咗好耐,高登嘅「我的樣子如何」師兄仲係當中嘅追擊佼佼者。
 
其實我諗咗好耐,佢整容關我哋咩事?
 
你話佢整到同幾年前個樣完全唔同,我挑!你條女化妝之後夠同今朝瞓喺你隔離嗰時個樣完全唔同啦,唔見你話飛咗佢?
 
如果大家覺得整容係錯、蠢、亂用錢等等幾百個原因嘅話,我就要點醒你哋喇。因為自古整容要牽涉嘅事都只有一樣,就係當時人肯自負盈虧,無論第時你係單雙眼皮,下巴移位又或者係鼻樑崩塌都好。只要當時自己唔介意仲可以勇敢生存,關你哋咩事呢又?
 
第二同第三個原因係土豪婚禮加冇品味,呢兩樣基本上可以撈埋一齊講,因為而家呢個世代,土豪本來就同無品味一早掛咗勾。只要你係土豪,無論你做嘅事係幾苦心經營都好,外面嘅反應都只會係冇品味。
 
而婚禮用太多錢呢樣嘢就真係搞笑,香港男人個身有多小小錢都要買隻勞力士傍身,驚人睇唔起佢啦。而家兩個身家段億億聲計嘅明星搞個婚禮嚟打吓飛機過癮下,係咪真係咁十惡不赦先?
 
個世界自從有咗互聯真係愈來愈壞風氣,好多人自己食餐飯都要放上網,驚死人唔知自己去咗度食好嘢咁,但同時又會唔鍾意其他人好,唔鍾意其他人好似自己咁喺FACEBOOK度放閃光,呢一類到底係咩風氣?
 
世界真係太多批判,每一個人都覺得自己係最好,慢慢產生出好多不必要嘅爭執,一個唔好嘅風氣就係咁慢慢形成。
 
希望大家今日開始可以諗諗,有時唔好用「戲言」就去亂衝亂撞。何謂風氣,其實就係存在住喺我哋身邊嘅人同事,今日影響唔到你哋嘅,唔等如聽日唔會影響到。
 
共勉之
 
薛可正Facebook Page
http://www.facebook.com/sithoching

COMMENT