2015/10/23

男人的Fantasy (四十九) 男人的絕對

20151023_薛可正_MenClub_absolut

 
圖片來源:互聯網
 
好多女人成日都話唔明男人,但其實呢個係一個盲點。就好似一隻貓成日話俾你知,佢唔明隻狗諗咩,但其實如果妳明,妳就係隻狗啦。
 
一個正常價值觀嘅男人,其實係有好多絕對。
 
鬧交時,男人絕對唔會想將場仗搬過夜打,所以如果可以嘅話,男人大多數都想舖舖清,免得第二朝起身又要浪費時間再起壇。如果唔信嘅,女人們可以試吓下次鬧交時唔好咁不死不休,俾小小位妳嘅伴侶走,得到嘅回報可能仲可觀過啲金山四國基金架。
 
收兵時,好多女人都鍾意收兵,其實一般男人都唔係太介意,只要女人收嘅兵透明度夠高的話。但偏偏好多女人收兵收到搵老公咁,講個電話又要鬼鬼祟祟,食餐飯又要呃呃氹氹。收兵之嘛,使咩怕呀?妳估妳哋條仔以前冇做過其他女嘅兵咩,佢明架,佢真係明架。
 
所以下次女人收兵就分清楚,呢個世界係冇曖昧嘅兵,一隻都冇。
 
講錢時,男人唔會太鍾意同女人講錢,因為要講錢嘅時間多數都係男人冇錢嘅時間。妳好難叫個男人同妳哋講「今日食老麥得唔得呀?我冇錢呀。」點解?因為呢個係一個猜心遊戲囉。
 
男人冇錢,就會覺得女人會嫌棄自己;呢個情況有小小似冇胸嘅女人都會覺得男人會唔太愛佢一樣,你點勸佢哋都唔信,呢個世界真係有人唔太鍾意錢,同埋大胸。
 
呢個問題要講清楚,因為所以就算有時啲有錢兵仔送禮物俾妳哋,妳哋都需要好好處理吓。我知道,我知道收一隻皮幾嘢嘅錶,仲要唔使用潛規矩單純用吸引力就可以成功,係一件非常快樂嘅事。
 
但唔該望吓妳條仔,如果有一日如心姐姐番生無啦啦送架法拉利俾妳條仔,妳都唔會信佢哋係冇嘢。人之常情嚟,唔好怪自己。
 
不過好多男人都可以接受到,但女人收到禮物時唔好扮到太開心咁樣會好小小囉。
 
其實男人比女人簡單,因為佢哋本來就用單線行車嘅人種。可惜呢個世界只有兩個人種,所以先顯得男人係一樣咁怪嘅動物嚟。
 
薛可正Facebook Page
http://www.facebook.com/sithoching

COMMENT