2015/10/29

男人的Fantasy(五十)世間無豬扒

20151029_薛可正MenClub_photo
 
圖片來源:互聯網
 
成日聽到好多男人嘅對話,一講起揀女都不外乎…
 
「嗰條女?豬扒嚟喎你唔係食呀?」
 
又或者係…
 
「喂,條女好樣衰,我射落海都唔會益佢。」
 
同埋…
 
「冇感情我搞唔到,畜牲咩你當我?」
 
好多女人聽到自己男人咁講,都不期然產生一個幻覺。覺得如果呢個男人都幾高質素,佢會溝嘅女都一定係好嘢。
 
我話俾妳班傻豬知:全部都係大話嚟。
 
冇男人會知道自己嘅覓食界線喺邊度,亦唔會有一條真正嘅「戒除豬扒信條」喺佢哋嘅心入面。我打個比喻,一條四十分嘅女,喺中環見到佢又唔同,又或者喺蘭桂坊見到佢都有唔同。
 
唔明呀?再講清楚小小。如果你同一大班朋友,喺中環見到一條得四十分嘅女,你好可能即時同身邊嘅朋友講:「嘩,頂你個肺條女咁樣衰嘅。」
 
因為喺呢個時刻,你踩得愈勁,就代表你揀女嘅眼角係愈高。其實呢個係錯覺,因為當時根本冇其他女喺你手上比較,就連眼前呢條四十分女你都未必可以溝到。
 
個情況就好似我指住天壐同人講呢啲咁嘅樓俾我都唔住一樣,因為根本就唔會有人俾我。假設而冇成本嘅道德場地上,男人嘅擇偶條件,有機會高到林志玲咁佢都要考慮。
 
但調轉頭又咁講喎,如果如果俾你有一晚,喺老蘭飲酒遇著條索女,大家喺酒店入面磨合咗三個鐘,當你以為今晚得米嘅時候,條女男朋友打電話嚟嘈到拆天,條女要即時返屋企…
 
度火谷到上頭嘅你沿條斜路一路行落士丹利街一路講粗口之際,你見到嗰條四十分嘅女就坐正喺翠華對出個十字路口,佢好迷離咁行嚟行去,個樣好似飲到好醉,而最重要係,佢一路望住你好似想食咗你咁嘅樣。
 
呢個時候,你知道自己身邊冇朋友,你唔使扮高尚。冇女性,你唔使為咗日後有機會溝邊個女同事而扮要求高嚟留伏線。今晚,你一肚都係火,仲要係唔出會上腦嗰隻火。而眼前呢條四十分嘅雌性,佢係可以幫你解決你所有嘅煩惱。
 
我再問多你一次,你會點揀?
 
薛可正Facebook Page
http://www.facebook.com/sithoching

COMMENT