男人的Fantasy (五十二) 鬍鬚阿榮
圖片來源：互聯網
十三歲嗰年，我見到老豆放咗喺廁所洗手盤嗰把剃刀，突然覺得好奇。呢把刀我平時撞口撞面都會見到，唔知點解，要去到十三歲呢一年我先對佢有興趣。
或者，人生所有事都係有一個排列。
十三歲呢一年，我開始上中學，同時我開始學溝女，要溝女就當然係跟住學識咩叫打扮。鏡頭返嚟我當時嘅外表，一套跟阿媽去屯門新墟時用六十九蚊買嘅老翻龍珠衫褲，仲要係鮮紅色，我講緊係心口嗰個孫悟空嘅頭髮喎。
髮型唔使講就梗係磨碌咁，但當時嘅我望住塊鏡，總係覺得仲有一樣嘢係唔妥。我望嚟望去，都總係搵唔到係咩原因，但當我見到老豆把剃刀時，我終於知道問題出嚟邊度。
係我嘴上面嗰幾條唔知可以叫鬍鬚定係叫毛嘅物體。
我一拎起把刀，就忍唔住向我嘴上面嗰幾條毛掃咗幾下，再照一照鏡…嘩，我從來都唔覺得自己有咁靚仔，乜原來老豆呢把嘢有咁妙不可言嘅功效？
跟住，我開始望自己身上其他地方，無論係手指或者係腳指，我見到上面嘅毛都覺得好礙眼，跟住我就開始連呢啲地方都剃埋。
第一次玩剃刀，我除咗何B嗰個位之外，差唔多全身可以剃嘅地方都剃過，最後好愉快咁懷住哥倫布嘅心情瞓覺。
第二日返到中學，我第一次件事將呢樣嘢同同學講，其中有一個…嗯……你當佢叫阿榮啦。我同阿榮講剃刀嘅好處，跟住又俾佢睇我嘴上面光滑嘅成果，最後仲說服咗佢加入我嘅一群。
喺嗰一日，我幾乎放棄哂所有去玩同食嘢嘅時間，一見到男同學就同佢地講呢件事，最後有百份之九十九嘅同學都當我係白痴，除咗一個阿榮。
阿榮本來只係我一個萍水到唔萍水嘅同學，因為我哋之前喺學校幾乎係冇相逢過。但估唔到，喺我發現新大陸，需要大量信心同支持嘅時候，竟然係佢一個相信我。
第二朝，阿榮行埋嚟我度，佢未開聲我已經知道，前一晚佢有因為我嘅邀約而試過用剃刀。因為佢嘴嘅兩邊貼咗兩張膠布，右邊嗰張仲有小小滲血添。
「阿榮，你咩事呀？」
「我聽你講試下用剃刀，搞到咁…」
「點解會咁？你有冇聽我教你咁去用咩？」
「你都冇同我講，我唔小心打橫拉咗一下，啲血就流到爸爸聲。」
我企喺舊屋啲廁所，拎住支二十幾年前嘅剃刀諗起呢件事。如果唔係屋企大裝修，我都唔會喺個窿度搵返呢支剃刀。
相比起宜家我用嘅貼面電鬚刨，剃刀真係好唔方便；但如果冇呢把又平又唔好用嘅剃刀，我又點會記得返以前好多已經唔記得晒嘅片段？
薛可正Facebook Page
http://www.facebook.com/sithoching