2015/12/01

男人的Fantasy(五十五)學輸

20151201_薛可正 _MenClub
 
圖片來源:互聯網
 
科技發達,人同人之間溝通容易得多。平台多,時間方便,令你隨時隨地想同邊個傾偈都無問題。
 
不過副作用就係,一屏之隔,所有小事都容易化大,所有情緒都唔需要再有掩飾。人嘅劣根性就係咁,望唔到對方就特別容易鬧人,所以大家可以睇到臉書同各類聊天平台都特別多大戰。
 
我哋自己嘅朋友都唔會例外,細個時要接觸就要見面,就算唔見面都要用電話聽住對方把聲。有時覺得唔順心又或者唔高興時,都會因為唔想即時表達,而將件事放慢咗。
 
呢個係好處,一瞬嘅感覺好多時都只係情緒;情緒放慢咗,其實好多爭執都可以避免。
 
好多偽專家﹝包括我﹞教人,想發脾氣時個心數一二三。呢個做法聽過好多次,但我話俾你知絕對奏效。但做人最難永遠都係放低自己,自己嘅尊嚴、自己嘅身段、自己嘅脾氣…
 
要數呢三聲,其實有一定難度。所以好多時,有好多不必要嘅戰火,就會喺呢個盲點度升起。所以水能載舟亦能覆舟,縮短距離同時間同時,我哋都可能要學習呢一種方便所帶嚟嘅沙石。
 
我從細就係炮仗頸,就算同朋友見面時,好多時都因為一啲小事爭執到面紅耳熱。一步都唔可以讓,正正就係我劣根性之一,每一次講到拆天之後,自己一個人慢慢諗返,其實根本唔知道為乜要咁。
 
後來有WhatsApp呢個程式,開火場面更加多。有時嬲到自己一個人拎住電話,好似電子神童入面個哨牙仔出「火焰陀螺」咁起勢篤蹶電話回覆,諗返都覺得幼稚。
 
人慢慢成長,開始明白呢一種根本就係執著。覺得其他人唔接納你意見,覺得佢哋枉費你心機,其實全部都係錯覺。我呢個諗法只係幻想自己講嘅事一定要啱,其他人一定要聽。但就算我嘅諗法做法係啱,都唔一定代表適合其他人。
 
賠夫人又折兵嘅事,上演咗一段時間後,我學識咗一個做法。
 
同任何人傾到冇結論時,搵一秒空間放鬆自己,再學下講輸。係一種好虛無嘅諗法,唔使有理據亦唔使講道理。你無端端認輸就得,成個對話完結,你會感到前所未有嘅舒服。
 
你會突然覺得,幾分鐘前講咁多事做咩?連自己感覺都唔好,又點樣去打理其他人嘅事?
 
我哋唔係上帝,唔好妄想自己係救世者。
 
薛可正Facebook Page
http://www.facebook.com/sithoching
 

COMMENT