男人的Fantasy (五十六) 對MK妹的回憶
圖片來源：互聯網
MK妹，一個用嚟形容女仔無論品味同修養都唔夠水準嘅貶詞，彷彿係一種唔會受男人鍾意嘅女人種類。
我可以同你講，錯_晒。
每一個男人嘅青春期記憶體入面，至少都會對一個MK妹仰慕過，甚至有過肌膚之親。
女性結構一般都係比男性早熟，特別係十三四歲呢個發育起步時期，大家一街都可以見到好多生到高頭大馬嘅中學妹妹，拖住一個未發育，好似幾日冇食飯嘅同校男朋友甜甜蜜蜜。
女仔比男仔早熟，早發育，而且早接觸呢個世界。出街玩、落Disco、食煙、飲酒、講粗口，好多時都係女仔接觸得比男仔更加早。
細佬……即係我……亦即係筆者，十三歲嗰年，都試過有一個咁嘅經歷。
話說當年我表姐都算係暴風女孩，九十年代初仲興踩Roller嘅佢，有一晚玩完因為冇車返屋企，就上咗我屋企瞓。
同行，仲有一個都係十三歲，叫慧慧嘅女仔。
第二朝，表姐好早就走咗，留低慧慧一個喺我屋企瞓。唔使諗太多，冇咸嘢發生過，除咗褲嘅朋友可以著返先。
「你好，我叫慧慧。」呢句係慧慧同我人生嘅第一個交接，對於當年仲係中學雞，叫女同學會響全朵嘅我，叫人個名仲要係疊字，未免係太過親密。
慧慧係一個新晉暴風少女，中一唔讀書就日日出街玩。佢用雙氧水自己染頭髮，佢每日食一包煙，而且佢仲會出入波樓同當年仲要自己打碟嘅卡拉OK。
神奇…超卓。對於仲係袋住三十蚊就可以走去機舖玩一日嘅我，慧慧嘅生活真係豐富到我完全冇諗過。我同佢係同一年出世，但就好似生活喺兩個世界咁。
就係咁，我同慧慧呢個現代稱為MK妹嘅女仔就熟稔起嚟，我哋一齊玩一齊食嘢，夜晚仲會傾電話。儘管我仲係未習慣成身煙味嘅佢，但同時間，我間唔中都會喺佢身上聞到一陣女人嘅味。
我由細到大，同我一齊瞓得最多嘅唔係阿媽，就係一班大表姐。我從來都無試過，聞到佢哋身上有呢種味。我覺得呢種味好吸引，所以時不時都會借機會行近慧慧去聞。
雖然後來我知道，呢一種應該係成日唔返屋企，加小量汗線發達而引伸出嚟嘅味。但對我嚟講，呢一種係我第一次，自己由異性身上搜獵返嚟嘅獨有味覺。
我幻想過，自己會同慧慧拍拖，我哋會拖住手行街，然後係打茄輪，生仔。慧慧呢個MK妹身上，我搵到自己第一次希望佔有對方嘅勇氣。
我嘅幻想每一日都愈來愈多，直到有一日，我突然間唔見咗慧慧。佢冇再打電話俾我，亦都冇上我屋企搵我。我打電話去佢屋企，佢屋企人都係話佢未返，佢老爸心情唔好時，間唔中仲會話佢死咗。
我好失落，我好似冇咗半個世界咁。佢嘅離開同時帶俾我人生首次失眠，仲有我竟然因為掛住佢而唔玩孖寶兄弟。
最後我忍唔住問表姐，慧慧去咗邊？
表姐話，慧慧喺Disco識咗個男人，好耐都冇見過慧慧喇。我聽到嗰一刻，感覺好似個心俾人插咗一刀咁，個感覺細膩到，我Feel到插我嗰把係生果刀。
我嘅第一個夢就咁完咗，有好大段時間，我行喺街上都會留意一啲同慧慧差唔多打扮嘅女仔。
金頭髮、背心、短褲加一副未發育嘅身形，仲有煙不離手嘅習慣。
一個永遠都忘記唔到嘅MK妹身影。
薛可正Facebook Page
http://www.facebook.com/sithoching