男人的Fantasy（五十七）要輸，都唔好輸俾情緒。
圖片來源：互聯網
Jason係一個潮州人，典型金牛座嘅潮州大男人。
我睇住佢同佢女朋友Ella，由相識到拍拖、然後係訂婚再到下個月就擺酒。不過上個星期，Ella單方面宣佈唔會同Jason結婚。
我哋一班朋友都好驚訝，左拉右拉咁故意製造咗一個酒局。我哋嘅安排係上半段時間，搵幾個女性朋友，圍住Ella去痲痺佢嘅神經。不斷咁講Jason平時有幾好，再嘗試搵出佢唔同Jason結婚嘅原因。
而下半場我哋一早安排咗，Jason會以罪犯身份，當眾咁向Ella認錯。跟住我哋一班朋友會四散，成個地方留返俾佢哋慢慢講數。
係咪好完美？不過我哋計漏咗一樣嘢，就係Ella要同Jason分手嘅原因。
「係呀我係覺得妳好煩呀，臭嘟~~~我去飲吓酒又唔得，使唔使俾嘟埋條命妳呀？嘟妳老嘟！」
呢段係Ella喺上半場播俾我哋聽嘅錄音，講呢句說話嘅係半醉嘅Jason，情景係Ella知道Jason偷偷地出咗去飲酒，而Jason又唔知Ella走咗上佢屋企瞓嘅一個凌晨。
Ella知道Jason真係同朋友出去飲酒，佢亦都只係循例式咁話咗Jason幾句，跟住Jason就開始恃醉行兇。
Ella話，Jason係慣犯。個情況嚴重到佢根本唔使搵機會，只係拎個電話出嚟，三分鐘內就錄到以上呢段說話。
Ella錄低嘅原因係，係佢已經心死。三年以嚟，佢身邊可以俾Jason鬧嘅親人都已經俾Jason鬧過。爸爸媽媽命中嘅次數，仲已經達雙位數以上。
佢知道自己唔會同Jason結婚，亦唔會再信呢個男人。錄呢段說話，只係俾大家一個交代。話咗比所有姨媽姑姐知，自己點解會一個月前先悔婚，如果邊個覺得Jason呢個男人可以嫁得過，佢包埋花紙送上。
我哋所有朋友都無言，一致裁定Jason係有罪，而且要死刑。不過我哋趕唔切，亦都唔敢通知Jason，佢就算下半場出場都係冇用。
學北斗之拳健次郎話齋：「你，已經死咗喇。」
下半場，Jason隆重登場。佢好憔悴因為我知道佢好多日冇瞓，佢之前一日同我講過知錯，佢知道自己飲醉嘅問題，亦都發誓會改。
不過到咗呢一刻，聽完Ella一番說話之後，我有另一種理解。
「Jason佢知道自己飲醉會鬧我，亦都知道我會唔開心。我喊過鬧過割手都試過，如果佢會改根本一早就改咗。呢個已經唔係有冇飲醉嘅問題，而係佢根本覺得，我唔夠佢嘅性格重要。
佢寧靜犧牲我，都要維持住佢身上一種可以殺得死人嘅性格。
呢個係我同佢分開嘅原因。」
Ella最後好冷靜咁，聽晒Jason所有嘅認錯台詞。最後Ella講咗一句「保重」，就笑住咁離開我哋呢個聚會。
或者Ella講得啱，情緒從來就係一種選擇，就係嗰兩三秒你選擇咗拎出嚟，向痛錫你嘅人行兇。之後所有嘅事，已經變得唔再實在。
因為呢把刀割開嘅，唔止係對方嘅心，仲有兩個人一齊建立嘅回憶。
薛可正Facebook Page
http://www.facebook.com/sithoching