2015/12/31

男人的Fantasy (五十九)老公愛打機嘅女人最好命

20151231_薛可正MenClub_2
 
圖片來源:互聯網
 
男人嘅圈子,最早期嘅話題來來去去唔係踢波賭馬就係十三張。不過隨住年紀愈大,增加嘅項目仲可能愈來愈多。
 
正所謂酒色財氣,成年男人世界,有錢就多玩意,所以呢個年代嘅女人就愈嚟愈難做。
 
遇到上進嘅男人又怕佢太上進,一衝前就唔識得收掣。最後生活保障到,但愛情守唔住;唔生性嘅又怕佢太懶,
第時生完仔女都仲要憂柴憂米。
 
男人嘅演變,可以由佢嘅生活圈子話題去睇。群住班玩音樂嘅朋友,好自然會一日聽歌聽到黑;
識著班賭錢嘅,見面第一句好自然就係「今晚曼聯咩盤?」
 
女人要由呢個角度去觀摩自己另一半嘅改變,但觀摩改變又唔一定要影響改變。
 
我見到好多太太,總係阻止老公做鍾意做嘅事。如果係賭錢爛蒲呢啲我都尚可理解,但踢波運動都要簽証先批行,又真係唔太講得通。
 
如果覺得老公乜都唔做,陪喺自己身邊先叫好。其實呢個諗法同養狗係差唔多。比佢食比佢住,你總之喺我視線範圍下乖乖地就ok,完全漠視咗對方嘅諗法。
 
呢一種惡性循環慢慢演變到個老公喺屋企做鐘意嘅事,女人都開始睇唔過眼。
 
如果一個有正常事業,每日辛苦工作嘅老公,連喺屋企自由地打吓機都唔可以,真係生不如死。
 
佢哋嘅生活朋友圈已經去到成人階段,但喺一大堆引誘嘅花花世界下,佢依然放棄好奇,去選擇打機。
 
其實,佢已經係選擇咗妳。老公一日喺屋企打機嘅女人,一定係最好命。
 
薛可正Facebook Page
http://www.facebook.com/sithoching

COMMENT