男人的Fantasy (六十)白紙。夢
圖片來源：互聯網
我哋喺呢個世界上，每過一日，其實就代表我哋對呢個世界嘅新鮮感減少一分。新鮮感係自製美夢嘅必要原素，好多人都認為，新鮮感就好似鬼揞眼咁，只要藥力一過，擋住喺你哋眼前面嘅鬼手一鬆，皇宮會變破廟；龍床會變返棺材。
愛情亦都係一樣，我哋永遠記得第一次戀愛時，仲有新鮮感包圍嘅嗰一種感覺。所有嘅事都係新奇，所有嘅過程都係刻骨。到咗我哋年紀漸大，重重覆覆一啲似曾相識嘅人和事，我哋嘅記憶開始重疊，我哋嘅情路上亦再見唔到好奇同埋神往。
就好似知道一個又一個曾經演過嘅劇本一樣，對方幾時會開心，幾時會失落；幾時會疏遠，然後幾時會消失。
我哋會由傷心，之後係失落。慢慢變到麻木，最後剩返習慣。
人活到一個年紀，如果最後連愛情世界都變得無晒動力，我哋嘅人生又點會唔攰？
生無可戀可能大概就係呢個意思，人去到一個年紀，手上可以押出去嘅已經唔多。面對了無生氣嘅情感，我哋仲可以點樣做？
可能正正就係已經變成習慣，所以好多人都覺得，既然程序有寫，而時辰又到，最後係未開戰就已經認輸，仲未搵出原因就認命。
生活已經磨人，邊個仲有心情去談情說愛？但求應付到生活，應付到身邊所有人，惡性循環之下，我哋又點記得，當年係點樣對待我哋曾經珍而重之嘅愛情？
其實所有事，都不外係「相信」呢兩個字。
我哋年輕時相信愛情，相信得義無反顧，相信得要生要死。最後我哋屢屢遍體鱗傷，大叫過癮，但我哋卻從來冇於愛情中死去。
我哋會用盡手上嘅籌碼，去賭博去闖關。我哋唔知自己想做咩，但情呢一件事本來就係，你從來掌握唔住，但只要沐浴於外，就會覺得非常快樂。
就好似一張白紙，冇過去亦未有將來，該愛就愛，跌倒就企返起身；亦都好似一個夢，你未必可以搵到，但我哋必須要追趕。
唔好等自己嘅愛情慢慢咁枯死，要死就死喺你自己決定嘅愛情賭局上面。
薛可正Facebook Page
http://www.facebook.com/sithoching