男人的Fantasy(六十二)不自卑的愛情
圖片來源：互聯網
今晚，心怡就要同阿昌講分手。
佢哋兩個喺一個飯局認識，職業係一個售貨員嘅心怡對外國留學返嚟嘅阿昌一見鍾情，女追男隔層紗，兩個人好快就一齊咗。
喺拍拖嘅呢半年，阿昌對心怡非常之好，令心怡好開心。就係因為愈好，心怡就開始有一種好愧疚嘅心。
心怡有過一段佢認為不堪回首嘅時期，佢犯過事，入過女童院；拍過唔知幾多次拖亦都數唔到自己試過幾多次一夜情。就喺佢同最後一個男朋友分手之後三個月，發現自己有咗BB。識阿昌之前嘅四日，佢自己一個人去旺角做咗一次墮胎手術。
佢一直覺得自己嘅生命就係唔需要規劃，前面三米有乜嘢路，就行乜嘢路。直到識到阿昌，先知道原來人生係可以計劃。
阿昌今年三十歲，係一個中產家庭長大嘅獨生子，十四歲就去咗英國讀書。返嚟香港三年嘅佢，喺爸爸幫助之下，計劃開始自己人生第一盤生意。同阿昌拍拖喺呢半年，心怡開過好多眼界，去過好多佢覺得自己一世人都唔會去嘅地方。就係呢一種越級嘅感覺，令到佢覺得自己同阿昌嘅感覺愈來愈唔踏實。
佢好驚有一日阿昌會知道自己嘅過去，唔想到咗嗰一個時間，因為自己嘅過去而同阿昌分開。如果要分嘅話，寧願選擇自己去分手。
人嘅性格大概都有啲一種不勇敢嘅劣根性，總係覺得逃避永遠比面對好，喺未有事發生之前，自己就將件事提前發生為之最好。
心怡約咗阿昌去尖東一間餐廳見面，誰不知一坐低，阿昌就問咗一個心怡認為好恐怖嘅問題。
「妳鍾唔鍾意小朋友？」
心怡以為阿昌想向自己求婚，所以喺阿昌未講出嚟之前，心怡一口氣講咗自己所有嘅事出嚟，最後一句回覆係：
「我想同你分手。」
「點解？」
「我覺得自己配唔起你。」
阿昌苦笑，向心怡身後不遠處揮手，跟住有一個大約八至九歲嘅小朋友走埋嚟。
「呢個係我喺英國嘅仔。」
心怡唔可以相信自己嘅耳仔，然後阿昌再將一啲心怡從來都唔知道嘅事講出嚟。
阿昌二十七歲返香港，心怡一直都好奇怪，佢畢業之後嗰幾年喺英國發生過咩事。最後阿昌坦承，佢喺英國犯過事，亦都坐過監，愛上過一個英國女人，但最後因為用情不專，呢個女人拋低咗個仔就走咗去。
阿昌返香港之後，用咗好多時間振作自己。佢嘅生意就係阿爸為佢打開嘅第一度門，呢半年時間，唔單止心怡覺得自己大開眼界，就連阿昌都覺得好開心。
開心係冇原因，佢同心怡一齊就係覺得好開心，開心到今日打算同心怡講個清清楚楚，去為佢哋未來嘅每一個階段作準備。
講到呢度，我哋已經唔需要再去諗佢兩個可唔可以白頭到老。最重要嘅係，我哋每一個都係心怡，亦每一個都係阿昌。每個人都有過去，就係睇我哋點樣去疏理，點樣去消化。好多回憶可以係攔路石，亦都可以係花裡肥，只係睇我哋點樣去演繹。
薛可正Facebook Page
http://www.facebook.com/sithoching