男人的Fantasy (六十三) 男女不平等
圖片來源：互聯網
「你哋有冇試過打女人？」
阿民喺一班老死面前，問出呢個問題。成班人你眼望我眼，過咗五分鐘都冇人肯講第一句。
「咁即係你哋有試過啦？」阿民拎起支啤酒，微微笑咁講。
「我講先，有…三年幾前Michelle，俾我發現佢勾佬。我唔打女人嘅都忍唔住打咗佢一巴。」阿星舉起右手，一口氣講完之後，佢好似如釋重負一樣。
「勾佬又真係抵打，唔怪得當年佢咁索你都飛佢飛得咁狠。」Michael搭訕，但冇正面回應阿民嘅問題。
「咁你有冇打過女人？」阿星問Michael。
Michael聽到阿星嘅追問，好快就收起自己嘅嬉皮笑臉。三分鐘後，佢好認真咁答阿星：「好耐喇…兩個人嘈交，鬧到火遮眼…俾佢指住我塊面講多兩句，就忍唔住打咗佢一巴…」
阿星：「邊個呀？天娜定阿儀？」
「阿儀……」
「唔怪得啦…早排我睇到Michelle同阿儀宜家不知幾FD…」
阿民：「關咩事？」
阿星：「咁兩個都俾男朋友打過……有話題嘛…」
「低能！」
「做咩突然間咁問？」Michael問阿民。
「想同大家講，男人，一定唔可以打女人…
無論我哋爭執乜嘢、對方有咩錯…又或者係講咗幾多難聽嘅說話，我哋都唔可以郁手郁腳…
一件事去到盡頭，就算俾你郁手郁腳，打到佢半死，件事都係解決唔到。男人郁手只可以解決到自己心入面嗰度火，但永遠唔可以幫到一件事甚至係一段關係上嘅難題。
男女天生就唔會係公平，男人天生就係要保護女人；我地唔好好保護佢哋不特止…我哋仲要…」
Michael同阿星一路望住阿民，一路覺得唔妥。阿民邊講邊有淚光，仲開始慢慢激動。
「你冇事嘛阿民？」阿星問。
「阿琪走咗。」阿琪係阿民女朋友。
「點解？」
「為結婚嘅事…我同佢嘈咗佢兩句；佢一時口快話我點解搵咁少錢…我一時火遮眼…」
最後佢地三個人對望，但已經無奈到唔知道可以再講乜嘢。
薛可正Facebook Page
http://www.facebook.com/sithoching