男人的Fantasy (六十四)我們的家有囍事
圖片來源：互聯網
從來冇諗到，我第一百三十二次睇家有囍事呢套戲，係會喺戲院入面欣賞。
第一次睇呢套戲嘅時候，我十四歲，讀中二。我仲記得當年嗰兩張票務員用手寫嘅飛，我足足收埋咗十六年。
呢一套戲，係我初戀萌芽嘅第一套戲。但由於呢套戲太好笑，當年嘅我，完全忽視咗我身邊嘅女朋友，只係一直對住個銀幕不斷咁笑。
我女朋友叫凱兒，佢係我同班同學。我哋就喺呢一套戲之下，正式開始。我同凱兒由十四歲拍拖，一直去到二十五歲結婚。
一九九二年之後嘅每一個農曆新年，我同凱兒都會翻睇呢一套戲。最初幾年係睇錄影帶，然後睇VCD，到後來變成電視重播。每一年我都會因為周星馳拎住個尿壺唱歌而狂笑，凱兒每一次一見到張曼玉就話佢好靚。
二零零三年，我二十五歲嗰年發生咗兩件大事。第一件事係我同凱兒結婚；第二件事，係哥哥自殺。時間巨輪一直咁轉，我感覺到佢終於喺我人生入面留低第一道傷痕。
之後每一段時候，家有囍事都會出現喺我哋身邊；我哋慢慢習慣「佢」嘅存在，但亦都慢慢漠視佢嘅出現，就好似我哋嘅感情一樣。
二零零八年，我同凱兒離婚。到宜家我諗返起，我都唔記得點解我哋會離婚。係感情轉差？定係我哋有第三者？我都已經唔記得咗…當年兩張手寫票，我就因為咁樣而將佢燒成焦炭。
離婚之後，我嘗試好好過日子，亦都試過結識其他女朋友。但無論喺邊一方面，我都總係覺得，我搵唔到自己嘅存在。
我同凱兒試過失去聯絡三年，與其話失去，不如話大家都抗拒聯絡對方。直到最近，因為我知道佢爸爸因病而離開，我哋先重新見面。
一切一切，都好似尋日嘅事咁。
冇見幾年，大家都有一種恍若隔世嘅感覺。我哋曾經熟悉到好似家人一樣，但亦都陌生到超過一千日冇見面。只要其中一個人稍有意外，我哋可能今生今世都唔會再見到對方。
「戲院做返家有囍事，不如我哋去睇。」凱兒嘅提議，令我哋最後走入戲院。
同場有好多年青人，由開場到散場，不停咁笑。
不過我冇笑過。
望住呢一套喺我心目中已經泛黃嘅戲，我一路回想起，每一個鏡頭，我到底經歷過幾多件事？
我同幾多個講過「阿諾豬華」呢個爛笑話，哥哥又離開咗我哋幾耐？外人眼中嘅一套笑片，其實喺我哋心目中，係一套載滿我哋生命片段嘅一個容器。
一生人有幾多套戲，會睇咗一百三十二次之後，都會俾錢再入場睇一次？所有事都係唔會再發生，就好似我哋生命入面每一件事一樣。
珍惜。
薛可正Facebook Page
http://www.facebook.com/sithoching